Hienadź Koršunaŭ: Kab u svoj čas suśvietnaja supolnaść tak stała pobač ź biełarusami, jak siońnia z ukraincami, to ništo nie lacieła b z akupavanaj terytoryi
Sacyjołah Hienadź Koršunaŭ adhuknuŭsia na siońniašni zvarot Uładzimira Zialenskaha da biełarusaŭ. Jon kateharyčna nie zhodny, što biełarusy ciapier śpiać. Bolšaść nie śpić, bolšaść pad akupacyjaj.
Heta Biełaruś, dzie ŭžo paŭtara hoda ludzi žyvuć u stanie žorstkaj akupacyi.
Dzie na vulicach pa ludziach stralali i kidali ŭ ich śviatłošumavyja hranaty.
Dzie kalučy drot i BTRy vystaŭlali suprać biełarusaŭ.
Dzie Łukašeka sa svaimi siłavikami zdradzili biełarusam i źbivali, i zabivali ich.
Dzie ludzi hinuli, a za kratami žančyny hublali nienarodžanych dziaciej.
Dzie bolš za tysiaču čałaviek — palitviaźni, i dziasiatki tysiač biełarusaŭ prajšli praz turmy.
Dzie ŭ pałon dziasiatki i sotni ludziej traplajuć navat nie za svoj ściah, a za padpisku na kanał u Telehramie, za łajk pad pastom, za aŭtamabilny sihnał. Dzie z vulicy ci rodnaha doma mohuć zabrać luboha i ŭ luby čas…
Spadar Zialenski, Vy pračnulisia i nie śpicio kolki dzien. I my taksama nie śpim. Biełarusy pračnulisia u 2020-m i načujuć z «tryvožnym čamadančykam» užo 18 miesiacaŭ zapar.
Ja nie budu kazać pra toje, što niechta handlavaŭ z Łukašenkam ciaham apošnich hadoŭ. Nie budu kazać pra toje, što chtości za hety čas tak i nie zdoleŭ sustrecca z tymi, chto kinuŭ vyklik Łukašenku. Nie budu kazać pra toje, u jakoj krainie Łukašenka byŭ samym papularnym zamiežnym palitykam. Jak i pra sankcyi, jakija ŭviali šmatlikija krainy, a niechta ich nie padtrymaŭ — pra heta taksama nie skažu. Nie budu.
Nie budu tak kazać, bo ŭ nas adna vajna. I biełarusy suprać hetaj vajny. I navat pad akupacyjaj, pad pahrozaj hvałtu i straty rodnych — jany kažuć svajo słova. Jany suprać vajny, jany suprać Łukašenki, jany za mir i hodnaść volnych narodaŭ!
Pahladzicie siońnia na biełarusaŭ! Na tych, chto ciapier faktyčna ŭ kancłahiery vychodzić pratestavać suprać vajny i akupacyjnaj administracyi! Na tych, chto z roznych krain źbiraje hrošy dla Ukrainy! Na tych, chto pobač z ukraincami staić u šerahach terytaryjalnaj abarony, zdaje kroŭ, nabivaje piaskom miachi!..
Biełarusy śpiać? Biełarusy nie vyrašyli, z kim im być? Biełarusy zrabili svoj vybar daŭno! Ale nie ŭsie zachacieli jaho ŭbačyć, schavaŭšysia za «hłybokaj zakłapočanaściu».
Kab u svoj čas suśvietnaja supolnaść tak stała pobač ź biełarusami, jak siońnia z ukraincami, to ništo nie lacieła b z akupavanaj terytoryi. Dy i akupacyi b nie było.
Ciapier u Biełarusi biełarusy vykazvajuć svajo «Nie — vajnie!». U situacyi, padobnaj na tuju, što, naprykład, u Daniecku. Vy možacie ŭjavić sabie situacyju, kab ciapier u Daniecku pačaŭsia mitynh suprać uvarvańnia Rasii va Ukrainu? A ŭ Biełarusi na vybarčych učastkach biełarusy hukajuć «Nie — vajnie!».
«Biełarusy śpiać…», blin… Bolšaść nie śpić, bolšaść — pad akupacyjaj. Ale ŭsio roŭna biełarusy — popleč z ukraincami!
Kamientary