Генадзь Коршунаў: Каб у свой час сусветная супольнасць так стала побач з беларусамі, як сёння з украінцамі, то нішто не ляцела б з акупаванай тэрыторыі
Сацыёлаг Генадзь Коршунаў адгукнуўся на сённяшні зварот Уладзіміра Зяленскага да беларусаў. Ён катэгарычна не згодны, што беларусы цяпер спяць. Большасць не спіць, большасць пад акупацыяй.
Гэта Беларусь, дзе ўжо паўтара года людзі жывуць у стане жорсткай акупацыі.
Дзе на вуліцах па людзях стралялі і кідалі ў іх святлошумавыя гранаты.
Дзе калючы дрот і БТРы выстаўлялі супраць беларусаў.
Дзе Лукашэка са сваімі сілавікамі здрадзілі беларусам і збівалі, і забівалі іх.
Дзе людзі гінулі, а за кратамі жанчыны гублялі ненароджаных дзяцей.
Дзе больш за тысячу чалавек — палітвязні, і дзясяткі тысяч беларусаў прайшлі праз турмы.
Дзе ў палон дзясяткі і сотні людзей трапляюць нават не за свой сцяг, а за падпіску на канал у Тэлеграме, за лайк пад пастом, за аўтамабільны сігнал. Дзе з вуліцы ці роднага дома могуць забраць любога і ў любы час…
Спадар Зяленскі, Вы прачнуліся і не спіцё колькі дзен. І мы таксама не спім. Беларусы прачнуліся у 2020-м і начуюць з «трывожным чамаданчыкам» ужо 18 месяцаў запар.
Я не буду казаць пра тое, што нехта гандляваў з Лукашэнкам цягам апошніх гадоў. Не буду казаць пра тое, што хтосьці за гэты час так і не здолеў сустрэцца з тымі, хто кінуў выклік Лукашэнку. Не буду казаць пра тое, у якой краіне Лукашэнка быў самым папулярным замежным палітыкам. Як і пра санкцыі, якія ўвялі шматлікія краіны, а нехта іх не падтрымаў — пра гэта таксама не скажу. Не буду.
Не буду так казаць, бо ў нас адна вайна. І беларусы супраць гэтай вайны. І нават пад акупацыяй, пад пагрозай гвалту і страты родных — яны кажуць сваё слова. Яны супраць вайны, яны супраць Лукашэнкі, яны за мір і годнасць вольных народаў!
Паглядзіце сёння на беларусаў! На тых, хто цяпер фактычна ў канцлагеры выходзіць пратэставаць супраць вайны і акупацыйнай адміністрацыі! На тых, хто з розных краін збірае грошы для Украіны! На тых, хто побач з украінцамі стаіць у шэрагах тэрытарыяльнай абароны, здае кроў, набівае пяском мяхі!..
Беларусы спяць? Беларусы не вырашылі, з кім ім быць? Беларусы зрабілі свой выбар даўно! Але не ўсе захацелі яго ўбачыць, схаваўшыся за «глыбокай заклапочанасцю».
Каб у свой час сусветная супольнасць так стала побач з беларусамі, як сёння з украінцамі, то нішто не ляцела б з акупаванай тэрыторыі. Ды і акупацыі б не было.
Цяпер у Беларусі беларусы выказваюць сваё «Не — вайне!». У сітуацыі, падобнай на тую, што, напрыклад, у Данецку. Вы можаце ўявіць сабе сітуацыю, каб цяпер у Данецку пачаўся мітынг супраць уварвання Расіі ва Украіну? А ў Беларусі на выбарчых участках беларусы гукаюць «Не — вайне!».
«Беларусы спяць…», блін… Большасць не спіць, большасць — пад акупацыяй. Але ўсё роўна беларусы — поплеч з украінцамі!
Каментары