Amal biesprecedentnaja apieracyja: jak NATA dastaŭlaje zbroju Ukrainie
Uvarvańnie Rasii va Ukrainu dało adlik adnoj z najbolš maštabnych apieracyj pa pieramiaščeńni zbroi ŭ historyi čałaviectva.
Tolki za apošni tydzień Čechija pierakinuła va Ukrainu 10 tysiač reaktyŭnych supraćtankavych hranat. Aeraport polskaha Žešuva, što znachodzicca za 100 kiłamietraŭ ad miažy z Ukrainaj, nastolki pierapoŭnieny vajennymi samalotami, što ŭ subotu častku rejsaŭ adtul davodziłasia časova pieranakiroŭvać, piša Wall Street Journal.
Dastaŭka zbroi va Ukrainu — apieracyja, anałahaŭ jakoj amal nie było ŭ historyi. Zachodnija sajuźniki Ukrainy admovilisia ad adpraŭki tudy svaich vojskaŭ, ale zamiest hetaha sprabujuć uzmacnić uzbrojenyja siły krainy.
Čornaje mora z ukrainskaha boku kantralujuć ruskija karabli, a za kantrol nad niebam krainy jašče vajujuć. Tamu ZŠA śpiašajecca pieravieźci jak maha bolš zbroi pa ziamli, pakul takaja mahčymaść jašče isnuje. Pientahon užo dastaviŭ va Ukrainu bolšaść z abiacanaha pakieta zbroi i inšaj vajennaj dapamohi koštam 350 miljonaŭ dalaraŭ, ale amierykanski Kanhres razhladaje mahčymaść pieradać Kijevu zbroju jašče na miljardy dalaraŭ.
Da honki dałučajucca dziaržavy, jakija kaliści nie chacieli supraćpastaŭlać siabie Rasii. Šviecyja paabiacała Ukrainie 5 tysiač adzinak supraćtankavaj zbroi, Bierlin zaraz dasyłaje Kijevu bolš za 2 tysiačy adzinak supraćtankavaj i supraćpavietranaj zbroi. Pastaŭki sa svajho boku paabiacała Italija, jakaja doŭhi čas była pasiŭnym hulcom u NATA, a Ispanija prapanavała Ukrainie reaktyŭnyja hranatamioty. Navat prostyja jeŭrapiejcy i amierykancy pierasyłajuć siabram va Ukrainie amunicyju dla palavańnia — kab paźbiehnuć zabarony na pierasyłku vajskovaj amunicyi.
Ale ŭkraincy śćviardžajuć, što hetaha mała. U adnym sa svaich videazvarotaŭ Uładzimir Zialenski zaklikaŭ Zachad dasyłać Ukrainie bolš zbroi i ŭstanavić nad krainaj biespalotnuju zonu, kab źmienšyć kolkaść pavietranych atak na mirnych žycharoŭ. Bajcy atradaŭ terabarony składajuć śpisy taho, što im patrebna — ad šlemaŭ i binoklaŭ da łokšyny chutkaha pryhatavańnia i vatnych pałačak.
U sučasnym śviecie amal niama precedentaŭ taho, kab u zbroju układvalisia sotni miljonaŭ dalaraŭ. Bolš za toje, apošni raz zbroja z Zachadu pierakidvałasia ŭ Jeŭropu tak chutka i ŭ takoj kolkaści tolki ŭ pačatku chałodnaj vajny. Tady amierykanski prezident Trumen zaprasiŭ u Kanhresa 400 miljonaŭ dalaraŭ vajennaj i ekanamičnaj dapamohi Hrecyi i Turcyi.
Amierykanskija čynoŭniki papiaredžvajuć, što chutkaść pastavak moža źnizicca, kali rasijskija vojski akupirujuć darohi i harady ŭ Zachodniaj Ukrainie, kudy jakraz i prybyvajuć kanvoi sa zbrojaj. Ale ciažka acanić, kali heta moža adbycca.
Kamientary