Pieravydańnie hučnaha ramana i pierakład Brodskaha. Knižnyja navinki lutaha pa-biełarusku
«Naša Niva» sabrała śpis novych vydańniaŭ (i pieravydańniaŭ) minułaha miesiaca. U śpisie jak biełaruskaja litaratura, tak i pierakładnaja, kniha łaŭreatki sioletniaj Stralcoŭskaj premii i navukovyja vydańni.
Iosif Brodski. Bałada pra maleńki buksir
Vydaviectva «Januškievič», pierakład Alesi Alejnik.
Simvalična, što «Bałada pra maleńki buksir» była pieršaj publikacyjaj znakamitaha ruskaha paeta ŭ siabie na radzimie — u dalokim 1962 hodzie. U vieršy dla dziaciej buksir raspaviadaje pra svajo cikavaje žyćcio i pryznačeńnie.
Košt — 22.99 rub.
Hanna Sieviaryniec. Haścinica «Bielhija»
Vydaviectva «Limaryus», pieravydańnie histaryčnaha ramana 2017 hoda z dapaŭnieńniami.
U centry ramana — maładyja paety, jakija budujuć asabistaje žyćcio i žyćcio respubliki pa kanonach novaha mastactva. Kniha stvorana na padstavie archiŭnych materyjałaŭ i miemuarnych krynic.
Košt — 25 rub.
Stanisłaŭ Lem. Zornyja dziońniki
Vydaviectva «Halijafy», pierakład Lva Kazłova.
U knihu ŭvajšli cykł apaviadańniaŭ i raman «Futurałahičny kanhres», abjadnanyja ŭ sieryju «Z uspaminaŭ Ijona Tychaha». Razam jany ŭtvarajuć častku znakamitych «Zornych dziońnikaŭ» prasłaŭlenaha vandroŭnika i daśledčyka kaśmičnych hłybiń Ijona Tychaha i apisvajuć pieravažna ziamnyja pryhody hieroja.
Raman, pryśviečany maralnym i materyjalnym aśpiektam raźvićcia cyvilizacyi va ŭmovach deficytu resursaŭ i ŭładarańnia farmtechnałohij, siońnia hučyć nie mienš aktualna, čym paŭstahodździa tamu, kali jon byŭ upieršyniu apublikavany.
Košt — 24 rub.
Ryhor Baradulin. U kata Mirona čornaja karona
Fota: knihi.by
Vydaviectva «Knihazbor».
«Što ahulnaha ŭ hienija biełaruskaj litaratury šanoŭnaha dziadźki Ryhora, maładoha talenavitaha mastaka Michasia Dajlidava, prostaj układalnicy ciotki Aksany z vami, darahija čytačy i čytački ŭ vieku ad 0 da viečnaści? Viadoma ž, luboŭ da katoŭ, jakija ŭpryhožvajuć śviet, ale najpierš našu Biełaruś. U čorna-biełych litarach i malunkach dzivosny kaciny śviet, nie pakińcie jaho biez vas», — havorycca ŭ apisańni zboru vieršaŭ.
Košt — 12,80 rub.
Antanina Chatenka. Vierbnica: paezija, proza, publicystyka
Vydaviectva «Knihazbor».
Za «viernaść kłasičnym litaraturnym tradycyjam, tematyčnaje i vobraznaje bahaćcie movy, papularyzacyju paetyčnymi srodkami narodnych zvyčajaŭ i abradaŭ» Antanina Chatenka atrymała premiju Michasia Stralcova ŭ 2022 hodzie.
U prastory knihi «Vierbnica» syšlisia ŭ suhučča jarkija, emacyjna vostryja vieršy aŭtarki, stvoranyja jašče naprykancy XX stahodździa, i hłybokija, rozdumnyja tvory niadaŭniaha času.
Admietnaść mastackaha stylu, vobraznaje, mietafaryčnaje asensavańnie hetkich fiłasofskich katehoryj, jak žyćcio i śmierć, płynnaść ziamnoha byćcia i viečnaść, śviatło i ciemra, dabro i licha, stvarajuć niepaŭtorny ŭzor aŭtarskich zdahadak, adkryćciaŭ, azareńniaŭ u darozie paznańnia siabie ŭ śviecie i śvietu ŭ sabie.
Košt — 17 rub.
Kryštaf Piatkievič. Vialikaje Kniastva Litoŭskaje pad uładaj Alaksandra Jahiełončyka
Vydaviectva «Inbiełkult».
U historyi Alaksandr Jahiełončyk zastaŭsia jak słaby kiraŭnik, pazbaŭleny zdolnaściaŭ i charaktaru, jakija dazvalali b jamu adekvatna adkazvać na vykliki, što paŭstali pierad dziaržavaj u čas, kali jamu vypała joj panavać. Mienavita tady stali vidavočnymi hramadska-palityčnyja źjavy i pracesy, jakija zastavalisia prychavanymi na praciahu paŭviekavoha (1440—1492) panavańnia baćki Alaksandra Kazimira Jahiełončyka. Dźvie prajhranyja vajny suprać Maskvy ŭ 1492—1494 i 1500—1503 hadach pazbavili Vialikaje Kniastva Litoŭskaje kala traciny terytoryi na ŭschodzie. A paŭdniovaja miaža pastajanna znachodziłasia pad niebiaśpiekaj napadu krymskich tataraŭ.
Aŭtar hetaj manahrafii, historyk z Poznani, razhladaje i postać samoha Alaksandra, i jahonaje kiravańnie pieradusim z punktu hledžańnia ŭnutranaj palityki.
Alaksandr Karabanaŭ. Kultavyja i histaryčnyja vałuny Biełarusi
Vydaviectva «Biełaruskaja navuka».
Kniha pryśviečana aktualnoj prablemie vyjaŭleńnia i vyvučeńnia na terytoryi Biełarusi vałunoŭ — admietnych pryrodnych abjektaŭ, pomnikaŭ jazyčnickich i chryścijanskich kultaŭ, ź jakimi źviazany lehiendy, padańni, roznyja histaryčnyja źviestki. Pryviedzieny apisańni bolš za 500 kamianioŭ, dadziena ich hieałahičnaja i etnahrafičnaja charaktarystyka.
Pryznačana dla śpiecyjalistaŭ u halinie pryrodakarystańnia, historykaŭ, archieołahaŭ, daśledčykaŭ narodnaj kultury, a taksama dla šyrokaha koła čytačoŭ.
Alena Laškievič. Tradycyjny kalandar
Vydaviectva «Biełaruskaja navuka».
U knizie sabrany narysy pra śviaty, jakija pisalisia ŭ 2014 — 2021 hadach, sa zvarotam da vialikaha dyjapazonu navukovaj litaratury i palavych materyjałaŭ, a taksama repartažy z vyjezdaŭ na śviatkavańni ŭ asobnyja vioski. Abrady hadavoha koła razhladajucca na ahulnajeŭrapiejskim fonie. Niekalki tekstaŭ pryśviečany paraŭnańniu biełaruskich i polskich śviat.
Prezientavana kniha «dla šyrokaha koła amataraŭ narodnaj kultury».
Čytajcie taksama:
«Staražytnych zamkaŭ viežy bierahli ajčyny miežy». Vyjšaŭ novy multyvierš palitviaźnia Andreja Skurko
«tut skanali ad rospačy kafka, orueł, chakśli» Novyja vieršy najlepšych paetaŭ: Nasta Kudasava
«Jana nie ŭ turmie, a na śpiecdačy KDB!» Kanśpirołahi nakinulisia na Kaleśnikavu5
Kamientary