Kiraŭnik NATA: My zaniepakojenyja, što Rasija moža prymianić chimičnuju zbroju
Čarhovaja chłuśnia Kramla pra najaŭnaść va Ukrainie «tajemnych bijałahičnych łabaratoryj» i chimičnaj zbroi źjaŭlajecca asabliva niebiaśpiečnaj, pakolki moža być prykmietaj padrychtoŭki Rasijaj pravakacyi «pad čužym ściaham», u tym liku z vykarystańniem realnaj chimičnaj zbroi. Pra heta siońnia ŭ Brusieli padčas pres-kanfierencyi napiaredadni nadzvyčajnaj sustrečy ministraŭ abarony NATO, jakaja pavinna adbycca zaŭtra, zajaviŭ hienieralny sakratar NATA Jens Stołtenbierh, piša «Ukrinform».
«Na praciahu miesiacaŭ my nazirali doŭhi śpis ruskaj chłuśni. Jany zajaŭlali, što nie majuć namieru ŭryvacca va Ukrainu, ale jany zrabili heta. Jany zajaŭlali, što advodziać svaje vojski, ale tolki dasyłali bolš vojskaŭ. Jany zajaŭlali, što abaraniajuć hramadzianskich, ale na samoj spravie zabivajuć ich.
Ciapier jany zajaŭlajuć ab najaŭnaści bijałahičnych łabaratoryj i chimičnaj zbroi va Ukrainie. Heta tolki čarhovaja chłuśnia. Ale my zaniepakojenyja, što Maskva moža płanavać apieracyju «pad čužym ściaham», vierahodna, z pryciahnieńniem chimičnaj zbroi», — zajaviŭ kiraŭnik NATO.
Jon adznačyŭ, što luboje vykarystańnie chimičnaj zbroi Rasijaj budzie parušeńniem mižnarodnaha prava, Kanviencyi pa zabaronie chimičnaj zbroi, padpisanaj samoj Rasijaj.
Pry hetym Rasija ŭžo vykarystała chimičnyja ahienty dla napadaŭ i zabojstva palityčnych apanientaŭ, padtrymlivała režym u Siryi, jaki niekalki razoŭ vykarystaŭ chimičnuju zbroju suprać ułasnaha naroda.
«Luboje vykarystańnie chimičnaj zbroi nieprymalna, i vielmi važna, kab Rasija heta razumieła. My vielmi pilnyja adnosna takoj vierahodnaści i padrychtoŭki Rasijaj pieradumoŭ dla praviadzieńnia i apraŭdańnia schavanaj apieracyi ź vierahodnym vykarystańniem chimičnaj zbroi», — padkreśliŭ Stołtenbierh.
Kamientary