«Dyk a ludziam navošta pra heta kazać?» Dyjałoh sudździ Anžeły Kaściukievič i błohiera Uładzisłava Savina

Uładzisłaŭ byŭ zatrymany 8 krasavika 2021 hoda supracoŭnikami viciebskaha HUBAZiKa. Pa infarmacyi MUS, z 2016 hoda jon znachodziŭsia ŭ miždziaržaŭnym vyšuku.

«Mužčyna padmanuŭ bolš za sto čałaviek, paabiacaŭšy im udzieł u roznych realici-šou. Žadajučyja stracili ŭ ahulnaj składanaści bolš za miljard niedeminavanych rubloŭ. Zajmieŭšy hrošy, arhanizatar admoviŭsia ad svaich abiazalnictvaŭ, a kali ŭ dačynieńni da jaho raspačali kryminalnuju spravu za machlarstva, schavaŭsia ŭ Rasii», — zajaŭlali ŭ MUS paśla zatrymańnia mužčyny.

Havorka viadziecca pra pieršyja ŭ Biełarusi realici-šoŭ — «Bandity v Mieksikie», «Korabl», «Avtobus» i inšyja.

U 2020 hodzie Uładzisłaŭ viarnuŭsia ŭ Biełaruś i dałučyŭsia da pratestaŭ — jon udzielničaŭ u akcyjach pratestu i aktyŭna aśviatlaŭ heta na svajoj staroncy ŭ Instagram.

Paśla zatrymańnia Uładzisłava etapavali ŭ SIZA-1 Minska, dzie jon utrymlivajecca i pa hety dzień. Suprać jaho zaviali kryminalnyja spravy pa č. 4 art. 209 i č. 1 art. 342 KK.

Zhodna ź viersijaj abvinavačvańnia, Uładzisłaŭ Savin z 20 sakavika 2015 pa 5 krasavika 2016 hoda «šlacham padmanu (machlarstva) asobaŭ zavałodaŭ hrašovymi srodkami ŭ ahulnaj sumie, ekvivalentnaj 8430 bazavym vieličyniam (175 142 rubla 44 kapiejki)», a značyć, ździejśniŭ złačynstva, praduhledžanaje č. 4 art. 209 Kryminalnaha kodeksa.

Jak raniej paviedamlała žonka Uładzisłava, kryminalnaja sprava pa art. 209 KK ciahniecca z 2016 hoda, kali Uładzisłaŭ rabiŭ prajekt z telekanałam ANT. Jon pieršapačatkova prachodziŭ paciarpiełym, potym śviedkam. Spravu zakryvali, a ŭ žniŭni 2020-ha jaje rezka adnavili.

Taksama Savinu inkryminujecca art. 342 KK.

Pa viersii abvinavačvańnia, Uładzisłaŭ 23 žniŭnia 2020 hoa z 12:00 da 20:30, dziejničajučy sumiesna i ŭzhodniena ź inšymi nieŭstanoŭlenymi asobami, u składzie kałony pryniaŭ aktyŭny udzieł u dziejańniach, jakija hruba parušajuć hramadski paradak: publična vykrykvaŭ łozunhi, ździajśniaŭ hučnyja plaskańni ŭ dałoni, ździajśniaŭ błakiroŭku ruchu transpartu šlacham vychadu ź inšymi nieustanoŭlenymi asobami na połasy ruchu prajeznaj častki. Pa padlikach śledstva,u toj dzień pratestoŭcami, u tym liku i Savinym, była parušanaja rabota 19 aŭtobusaŭ i piaci tralejbusaŭ pa praśpiektuach Niezaležnaści, Mašerava i inšych vulicach.

Savinu staviacca ŭ vinu anałahičnyja dziejańni — udzieł u akcyjach pratestu — 14 žniŭnia z 14:00 da 19:40 i 16 žniŭnia z 10:00 pa 20:30.

Akramia hetaha, Savina abvinavačvajuć u arhanizacyi akcyj pratestu ŭ Minsku. Zhodna ź viersijaj abvinavačvańnia, jon, znachodziačysia na terytoryi Biełarusi i za jaje miežami z 13 žniŭnia 2020 hoda pa 8 krasavika 2021 hoda, «zamachvajučysia na hramadski paradak i śfieru jaho sacyjalnych patrabavańniaŭ» u sacyjalnaj sietcy Instagram stvaryŭ stranicu «Uład Savin (vlad.savinn)» «z metaj publičnaha vykazvańnia niezakonnymi sposabami svaich hramadska-palityčnych pohladaŭ i pratestu, viadzieńnia destruktyŭnaj dziejnaści, nakiravanaj u tym liku na abvastreńnie napružanaści ŭ hramadstvie, a taksama z metaj arhanizacyi zboru jak aktyŭnych, tak i pasiŭnych udzielnikaŭ parušeńnia hramadskaha paradku na terytoryi Biełarusi, schileńnia ich da kankretnych, u tym liku hrupavych, dziejańniaŭ, jakija hruba parušajuć hramadski paradak, raźmiaściŭ na svajoj staroncy aŭdyjo-videa-fota-tekstavuju infarmacyju i spasyłki na inšyja internet-resursy, jakija pracujuć u adzinaj sistemie dublavańnia, pieradačy i kamientavanaj padtrymki publičnaha raspaŭsiudu adpaviednaj infarmacyi, ustanaviŭ ź inšymi karystalnikami Instagram dla dalejšaha abmiena infarmacyjaj, sfarmavaŭšy takim čynam supolnaść adnadumcaŭ».

Błohieru pa arhanizacyi pratestaŭ inkryminujecca 13 videarolikaŭ u Instagram,

siarod jakich — «Mojo obraŝienije k Lidii Jarmošinoj (13.08.2020), «Obraŝienije k studientam Biełarusi (01.09.2020), «Čto vy diełali prošłym letom (08.09.2020),«O finansirovanii protiestov v Biełarusi» (17.09.2020), «My nie dadim sdiełať iz Biełarusi koncłahieŕ» (23.10.2020), «O solidarnosti…» (04.11.2020) i inšyja. Akramia hetaha, pasty, jakija źmiaščajuć infarmacyju pra «mirnyja maršy».

Jak śćviardžaje abvinavačvańnie, u vyniku dziejańni Savina i inšych asob pryviali da masavych publičnych pratestnych akcyj sacyjalna-psichałahičnaha procidziejańnia ŭ parušeńnie dziejučaha zakanadaŭstva Biełarusi, u vyniku čaho adbyłasia defarmacyja samoha razumieńnia paradku, a ŭjaŭnaja spantannaść dziejańniaŭ jaje ŭdzielnikaŭ adbyvałasia pa zahadzia raspracavanym scenaryi i pryŭnosiła chaos u toje, što adbyvajecca.

Uvieś sud raściahnuŭsia na amal 40 pasiadžeńniaŭ. Uładzisłaŭ nie pryznaŭ vinu pa č. 4 art. 209 Kryminalnaha kodeksa, a pa č. 1 art. 342 KK pryznaŭ całkam.

Uładzisłaŭ na sudzie paćvierdziŭ, što ŭdzielničaŭ u troch Maršach i vykrykvaŭ łozunh «Žyvie Biełaruś». Na dopycie ŭ sudzie jon raspavioŭ pra videaroliki, jakija zdymaŭ dla Instagram

«Usie videaroliki ja publikavaŭ z metaj vykazvańnia svajho palityčnaha mierkavańnia i hramadzianskaj pazicyi. Ja chacieŭ, kab ludzi čuli maju pazicyju nakont taho, što adbyvajecca ŭ krainie. Mnie heta było važna», — ćviorda zajaviŭ błohier na sudzie.

Sudździa spytała, čamu Savinu było važna, kab jaho čuli. Na heta błohier adkazaŭ, što ličyŭ, što biełarusaŭ padmanvajuć, a «hvałt, jaki jon bačyŭ, nie musić mieć miesca ŭ demakratyčnaj krainie pasiarod Jeŭropy».

— Dyk a ludziam navošta pra heta kazać? — pierapytała sudździa Kaściukieivč.

— U sensie? — nie zrazumieŭ pytańnia Savin.

— Vy na siabie jakuju funkcyju ŭziali? — dapytvałasia sudździa.

— Ja heta kazaŭ, tamu što ja maju prava zhodna z artykułam 19 Dekłaracyi pravoŭ čałavieka havaryć i vykazvać svajo mierkavańnie, — adkazaŭ Uładzisłaŭ.

— Kali łaska. Ale navošta heta rabić na publiku? — nie razumieła Kaściukievič.

— Ja ličyŭ, što ludziam heta cikava.

— «Ludziam heta cikava…», — paŭtaryła, niby pieradražnivajučy, jaho słovy sudździa.

Na pracesie Uładzisłaŭ raspavioŭ, što prydumaŭ akcyju da 1 listapada 2020 hoda, pra jakuju raspavioŭ u videaroliku «Počiemu my chotim ostanoviť dvižienije 1 nojabria?»: jon zaklikaŭ usich kiroŭcaŭ spynić transpart na 30 chvilin u znak salidarnaści z pratestoŭcami i vyrazić takim čynam pratest dziejučaj uładzie.

Pra astatnija videaroliki Savin zajaviŭ, što ličyć, što «ničoha złačynnaha ŭ ich jon nie havaryŭ i nie zaklikaŭ da hvałtu ŭ dačynieńni da supracoŭnikaŭ milicyi».

22 sakavika padčas sudovych sprečak prakurorka zaprasiła ŭ suda pakarańnie dla Uładzisłava Savina ŭ vyhladzie pazbaŭleńnia voli terminam na 8 hadoŭ. Sudździa Anžeła Kaściukievič ahučyć prysud 30 sakavika ŭ 11:30.

• 0
• 0
• 0
• 0
• 0
• 0
• 0
• 0