Ukraincy zapaŭniajuć radyjoefir chevi-mietałam, kab pieraškadžać rasijskim vajskoŭcam

Ukraincy prasłuchoŭvajuć radyjoefir praciŭnika, a taksama «hłušać» jaho pieramovy tranślacyjaj muzyki ŭ styli heavy metal prosta padčas boju, piša The Insider sa spasyłkaj na The Economist.

Mnohija padraździaleńni rasijskaha vojska vykarystoŭvajuć va Ukrainie dla suviazi niezašyfravanyja vysokačastotnyja kanały, jakija možna prasłuchoŭvać, vykarystoŭvajučy navat amatarskuju radyjostancyju. U vyniku ŭkrainskija radyjoamatary abmieńvalisia danymi ab radyjočastotach, što vykarystoŭvajucca rasijskimi vajennymi, prasłuchoŭvali ich, a potym razam analizavali zapisy pieramovaŭ. U pierachoplenych paviedamleńniach, u pryvatnaści, rasijskija kamandziry skardziacca na niedachop transpartu dla vyvazu zahinułych z pola boju, «družalubny ahoń», abmaražeńni ŭ pałovy asabistaha składu.

Prablema z suviaźziu moža źjaŭlacca adnoj z pryčyn vysokich strat siarod vyšejšaha kamandnaha źviana. Tamu drennaja kaardynacyja ŭ vojskach zmušaje staršych aficeraŭ asabista prysutničać na poli boju i stavić siabie pad udar.

Ukrainski bok paviedamiŭ ab hibieli ŭžo siami rasijskich hienierałaŭ. Adzin ź ich, zhodna z ukrainskimi danymi, trapiŭ pad udar, bo trymaŭ suviaź pa niezašyfravanym kanale.

U 2012 hodzie dla rasijskaj armii była raspracavanaja radyjostancyja «Azart-P1». Jaje vytvorcam stała zialenahradskaje pradpryjemstva «Anhstrem», jakoje nie mieła nijakaha vopytu ŭ stvareńni radyjostancyj. Saŭładalnikam NVA «Anhstrem» byŭ Leanid Rejman, z 2004 pa 2008 hod ministr suviazi, a z 2008 pa 2010 hod — daradca prezidenta Dźmitryja Miadźviedzieva.

Pa zajaŭlenych techničnych charaktarystykach racyja «Azart» była pieradavoj. Jana mahła pracavać i jak anałahavy, i jak ličbavy srodak suviazi, była sumiaščalnaja z usimi najaŭnymi vajskovymi radyjostancyjami, mieła dobruju kryptahrafičnuju abaronienaść, była zdolnaja pa śpiecyjalnym ałharytmie źmianiać častatu złučeńnia 20 tysiač razoŭ za siekundu, mieła ŭbudavany navihatar. Ale racyja atrymałasia składanaj u kiravańni i naładkach, a jaje košt nabližaŭsia da 300 tysiač rubloŭ (amal $10 tysiač pa kursie taho času).

Taksama paviedamlałasia, što dla vytvorčaści vykarystoŭvalisia kitajskija kamplektujučyja.

Praktyka vykarystańnia «Azartaŭ» pakazała, što jany nienadziejnyja. Mnohija racyi prosta pierastavali ŭklučacca abo ŭvachodzili paśla zapusku ŭ «viečny cykł» samapravierki. A efiektyŭnaja adlehłaść «na jakoj «Azart» byli zdolnyja ŭstalavać suviaź, akazałasia ŭ bajavych umovach adnosna nievialikaj.

Taksama ekśpierty sumniavajucca ŭ sumiaščalnaści «Azartaŭ» ź inšymi typami radyjostancyj, jakija vykarystoŭvaje rasijskaja armija. Kali elitnaje desantnaje padraździaleńnie ŭkamplektavanaje «Azartami», a artylerysty vykarystoŭvajuć sastarełyja sistemy suviazi, to abmieńvacca paviedamleńniami pryjdziecca pa nieabaronienych kanałach.

• 3
• 0
• 47
• 15
• 0
• 0
• 2
• 0