Vialikabrytanija pieradała Ukrainie sučasnyja rakietnyja kompleksy Starstreak. U čym ich admietnaść?
Pastaŭlenyja rakiety — adny z samych daskanałych u śviecie, ich śpiecyfika robić ich vialikaj prablemaj dla rasijskaj avijacyi.
Starstreak — kompleks supraćpavietranaj abarony vytvorčaści brytanskaj kampanii Thales Air Defense. Praca nad jaho stvareńniem pačałasia ŭ pačatku 1980-ch hadoŭ, u vieraśni 1997 hoda novaja zbroja trapiła ŭ vojska. Rakietny kompleks ciapier vyrablajecca ŭ niekalkich varyjantach — pieranosny, na asnovie lohkaj šmatzaradnaj ustanoŭki i dla ŭstalavańnia na šasi braniravanych mašyn ci na karabli.
Dla ŭsich kompleksaŭ vykarystoŭvajecca adzin typ rakiety, jakaja zdolna lacieć z chutkaściu, što ŭ čatyry razy pieravyšaje chutkaść huku. Dla paraŭnańnia, samyja znakamityja zienitnyja rakiety Stinger mohuć lacieć z chutkaściu, što ŭ 2,2 raza pieravašaje chutkaść huku, — heta vialikaja roźnica, asabliva važnaja ŭ kantekście chutkaści reakcyi sistem abarony sučasnych samalotaŭ i viertalotaŭ. Času na dziejańni pa abaronie ad rakiet u hetym vypadku zastajecca značna mienš.
Bolšaść sučasnych rakiet navodziacca na cel čujnikami, jakija reahujuć na ciapło ruchavikoŭ. U takoj situacyi dla abarony srodkaŭ avijacyi vykarystoŭvajucca ciepłavyja łavuški, jakimi vystrelvajuć ź viertalotaŭ ci samalotaŭ, kab padmanvać atakujučyja rakiety.
Dla naviadzieńnia na cel rakiety Starstreak vykarystoŭvajecca łazierny pramień nizkaj intensiŭnaści, nie vykryvalny dla sistem abarony latalnych aparataŭ. U teoryi heta robić nieefiektyŭnymi bartavyja kompleksy abarony Ł-370 «Viciebsk», jakija vykarystoŭvajucca rasijskaj armijaj.
Sam bojeprypas vyhladaje taksama nietypova. Zamiest zvykłaj dla ŭsich zienitna-rakietnych kompleksaŭ rakiety, u Starstreak dla paražeńnia celi vykarystoŭvajucca try drociki z valframu daŭžynioj kala mietra i vahoj trochi mienšaj za kiłahram. Bajavaja častka hetych sub-bojeprypasaŭ maje detanatar zapavolenaha dziejańnia, to-bok spačatku drocik prabivaje korpus celi, a paśla ŭnutry adbyvajecca vybuch. Valframavy korpus pieratvarajecca ŭ tysiačy askiepkaŭ.
Ukrainskaja armija ŭžo nieadnarazova zaśviedčyła, što ŭ stanie efiektyŭna źniščać avijacyju vorahaŭ. Vykarystańnie novych rakietnych sistem, ad jakich niemahčyma abaranicca tradycyjnymi srodkami, moža mieć taksama mocny psichałahičny efiekt — rasijskija piłoty buduć prosta bajacca zalatać va ŭkrainskaje nieba. Adnak Ukraina zastajecca biezabaronnaj ad udaraŭ kryłatych i balistyčnych rakiet.
Minabarony Rasii ŭžo nibyta źniščyła ŭsie «Bajraktary» Ukrainy, ale pa-raniejšamu praciahvaje ich źniščać
Bajraktar suprać rasijskaha SPA: čamu armija RF akazałasia praktyčna biaśsilnaj
Jak Ukraina robić staŭku na bieśpiłotniki ŭ abaronie ad Rasii
«Łukašenka pieršym adčuje katastrofu Pucina» — Śviatłana Aleksijevič u vialikaj hutarcy TOK10
Kamientary