Biełaruskaja prapahanda paŭtaraje za rasijskaj: trupy ŭ Bučy «śviežyja», rasijanie ni pry čym
Rasijskaja prapahanda admaŭlaje toje, što vajennyja złačynstvy va Ukrainie, jakija šakavali śviet, — sprava ruk rasijskich vajskoŭcaŭ. Arhumienty prostyja, ale supraćlehłyja. Z adnaho boku, kadry z rasstralanymi ludźmi ŭ Bučy, pavodle prapahandy, — pastanoŭka, miortvyja cieły «šavielacca». Z druhoha boku, trupy jość, ale jany «śviežyja», to-bok ukraincy zajšli i pastralali mirnych hramadzian, kab było što pakazać śvietu. Hetuju tezu, marajučysia ŭ kryvi i vajennych złačynstvach, stała raspaŭsiudžvać za rasijskaj i biełaruskaja prapahanda.
Jakija arhumienty? Hałoŭnaje — videa z meram Bučy, jaki 1 krasavika zajaviŭ, što ŭžo 31 sakavika ŭkraincy ŭvajšli ŭ Buču. Fota ciełaŭ žycharoŭ Bučy 1 krasavika nie źjavilisia. Značyć, trupaŭ i nie było.
Što nie tak z prapahandaj?
Nu, pa-pieršaje, joj značna lepš vykarystoŭvać inšaje videa z meram Bučy — jano jašče ad 28 lutaha. Tady jon taksama zajaviŭ pra pieramohu VSU nad rasijskimi vajskoŭcami. Stojačy na całkam razburanaj vulicy, mer raspaviadaje, što ŭsio dobra, «usie žyvyja, usie zdarovyja».
Pa-druhoje, Rasija śćviardžaje, što jaje vojski pakinuli Buču jašče 30 sakavika, tak zajaviŭ kiraŭnik rasijskaha MZS Siarhiej Łaŭroŭ. Ale heta nie tak.
1 krasavika «Interfaks» sa spasyłkaj na telekanał «Źviezda» paviedamiŭ, što «rasijskija marpiechi ažyćciaŭlajuć začystku nasielenych punktaŭ» u kirunku Hostomiel-Buča-Aziory» «z dalejšaj zadačaj zamacavacca ŭ ich».
1 krasavika sa spasyłkaj na Minabarony RF «Rasijskaja hazieta» taksama paviedamlaje, što «padraździaleńni PDV i marpiechi na praciahu 5 sutak paśpiachova strymlivali siły praciŭnika na napramku Hostomiel-Buča-Aziory». «U vyniku marskija piechacincy ŭziali pad poŭny kantrol terytoryju ad raki Irpień pa nakirunku da Kijeva. Heta pazicyi ahulnaj praciahłaściu 5 kiłamietraŭ», — raspaviali ŭ Minabarony RF. «Dalejšaja zadača marpiechaŭ — zamacavacca ŭ začyščanych haradach, vioskach i siołach».
Viečaram 1 krasavika źjaŭlajecca videa z meram Bučy Anatolem Chviedarukom, jaki aptymistyčna zajaŭlaje, što horad vyzvaleny 31 sakavika.
Karespandenty BBC zmahli trapić u horad 1 krasavika. U svaim materyjale jany śviedčać, što na vulicach byli cieły zahinułych ludziej, jany asabista bačyli i pakazali prykładna 20 ciełaŭ mirnych žycharoŭ u Bučy i pobač ź joj užo 1 krasavika.
«Adhuknuŭsia na 95% abjaŭ — i ŭsie admovili». Rasijaninu nie chočuć zdavać kvateru ŭ Hrodnie8
Kamientary