Dziarždep ZŠA razhledzić mahčymaść uklučyć Rasiju ŭ śpis sponsaraŭ teraryzmu
Dziarždepartamient ZŠA razhladaje mahčymaść uklučeńnia Rasii ŭ śpis dziaržaŭ — sponsaraŭ teraryzmu, zajaviŭ pradstaŭnik viedamstva Ned Prajs. Pra heta paviedamlaje CNN.
«My ŭvažliva vyvučajem fakty. My ŭvažliva vyvučajem zakon. Kali hetyja miery buduć dastupnyja nam pa zakonie, to my ich vykarystajem, jak heta budzie efiektyŭna i metazhodna», — udakładniŭ Prajs.
Dziarždep ZŠA razhladaje ŭsie mahčymyja varyjanty i instrumienty dla pryciahnieńnia Rasii da adkaznaści za vajnu va Ukrainie, uklučajučy pryznańnie jaje krainaj-sponsaram teraryzmu, rastłumačyŭ CNN inšy vysokapastaŭleny čynoŭnik. Pavodle jaho, hety praces moža zaniać niekalki tydniaŭ.
Pa danych CNN, ab uniasieńni Rasii ŭ śpis krain — sponsaraŭ teraryzmu prezidenta ZŠA Džo Bajdena paprasiŭ ukrainski lidar Uładzimir Zialenski padčas niadaŭnich telefonnych pieramovaŭ.
Razmovy pra toje, kab uklučyć Rasiju ŭ hety śpis, vialisia ŭ ZŠA i raniej. U pryvatnaści, u 2018 hodzie na fonie «spravy Skrypaloŭ».
Dziaržavy-sponsary teraryzmu
U śpis krain-sponsaraŭ teraryzmu traplajuć krainy, jakija, na dumku Dziarždepa ZŠA, «nieadnarazova akazvali padtrymku aktam mižnarodnaha teraryzmu». Ciapier u hety pieralik uklučanyja tolki čatyry dziaržavy ‒ KNDR, Iran, Siryja i Kuba.
Znachodžańnie krainy ŭ śpisie daje prezidentu ZŠA mahčymaści ŭvieści dadatkovyja sankcyi suprać jaje abo abmiežavać prodaž zbroi. Akramia taho, status krainy — sponsara teraryzmu dazvalaje ZŠA admović takoj dziaržavie ŭ ekanamičnaj dapamozie abo źniać ź jaje pradstaŭnikoŭ dypłamatyčny imunitet.
Kamientary