«Siadziać navat tyja, chto pastaviŭ kropku pad videa ŭ TikTok». Što ciapier ź biełarusami, zatrymanymi za kamientary pa «spravie Zielcera»
Kala 200 biełarusaŭ byli zatrymanyja ŭ apošnija dni vieraśnia i ŭ pačatku kastryčnika 2021 hoda za kamientary ŭ internecie pa «spravie Zielcera». Užo siem miesiacaŭ ludzi ŭ turmie. Viadoma pra dva prysudy pa takich spravach. Ale mnohija ludzi prosta siadziać biez suda, piša Radyjo Svaboda.
2 hady kałonii atrymaŭ 45-hadovy žychar Mahilova za «abrazu pradstaŭnika ŭłady» — havorka idzie pra zahinułaha supracoŭnika KDB Dźmitryja Fiedasiuka.
2 z pałovaj hady kałonii atrymaŭ žychar Bieraścia — taksama za kamientar u bok supracoŭnika KDB.
Zatrymanyja znachodziacca ŭ SIZA. U ich liku i 68-hadovaja byłaja nastaŭnica Ema Ściepulonak, i viadomy vałancior Illa Mironaŭ, jaki napisaŭ bolš za 2,5 tysiačy listoŭ palitźniavolenym. Siadziać u turmie šmatdzietnyja maci i baćki.
Svaboda daviedałasia pra los niekatorych abvinavačanych.
«Dahetul niama vynikaŭ ekśpiertyzy»
Siem miesiacaŭ siadzić u turmie žychar Horadni Alaksandr Kurhanski. Jon 15 hadoŭ pracavaŭ ratavalnikam. Jamu pahražaje da 12 hadoŭ turmy za łajk, jaki jon pastaviŭ pad kamientarom u adnoj z sacyjalnych sietak. Kamientar pakinuŭ inšy čałaviek u abmierkavańni pierastrełki ŭ Minsku, dzie zahinuli prahramist Andrej Zielcer i supracoŭnik KDB.
Svajaki raskazali Svabodzie, što suda dahetul nie było, bo nie hatovaja ekśpiertyza. Raniej havorka išła pra linhvistyčnuju ekśpiertyzu. Vierahodna, pravodzicca ekśpiertyza łajka.
«U niekatorych inšych z Horadni, jakija taksama siadziać za kamientary, ekśpiertyzy ŭžo hatovyja, tolki sudoŭ pakul nie było», — skazała adna sa svajačak byłoha ratavalnika.
Alaksandru Kurhanskamu vystavili abvinavačańnie pavodle artykuła 369 (abraza słužbovaj asoby) i častki 3 artykuła 130 (raspalvańnie varožaści).
«Jamu napisali: «Kali tabie supracoŭnika KDB nie škada, to i nam nie budzie škada ciabie i tvaju siamju»
Niekalki dziasiatkaŭ ludziej siadziać za kamientary pa «spravie Zielcera» ŭ homielskim SIZA. Ad svajakoŭ zatrymanych Svaboda daviedałasia, što 27 žycharoŭ Homiela śledstva abjadnała ŭ hrupu. Heta ludzi, jakija pisali roznyja kamientary ŭ roznych sacyjalnych sietkach.
«Ale nijakich śledčych dziejańniaŭ ciapier nie prachodzić. Ludzi prosta siadziać. Śledčy kaža, što čakajuć vynikaŭ ekśpiertyz. Da niekatorych śledčy nie prychodziŭ užo šeść miesiacaŭ. Śledčy patłumačyŭ, što hrupa — tamu što adzin bačyŭ, što pišuć inšyja, i taksama niešta pisaŭ. Voś hrupa!» — kaža svajačka zatrymanaha hamielčuka.
Jana raskazała, što jaje svajak napisaŭ kamientar u TikTok pad videa dziaržaŭnaha kanała ONT pra hibiel prahramista Andreja Zielcara i supracoŭnika KDB Dźmitryja Fiedasiuka.
«U siužecie žurnalist nazvaŭ zabitaha prahramista terarystam. Naš svajak napisaŭ kamientar, što jon nie ličyć zabitaha terarystam, a supracoŭnika KDB jamu nie škada. Tut ža da jaho pryjšoŭ niechta ŭ kamientary i napisaŭ: «Kali tabie nie škada supracoŭnika KDB, to nam nie budzie škada ni ciabie, ni tvaju siamju».
Potym jaho zabrali prosta z pracy. I da ciapierašniaha času jon u homielskim SIZA. Tam siadziać nie tolki tyja, chto niešta napisaŭ, kamientavaŭ, ale navat tyja, chto pastaviŭ kropku pad videa ŭ TikTok», — patłumačyła žycharka Homiela.
Trapiŭ u homielskaje SIZA za kamientary pa «spravie Zielcera» žychar abłasnoha centra, invalid druhoj hrupy Maksim Ražkoŭ. Pa jahonaj spravie śledstva jašče nie skončanaje. Svajaki atrymlivajuć ad jaho listy. Maksim piša, što choča dachaty. Jaho taksama zatrymali prosta na pracy — za kamientar «UKantakcie».
Taksama ŭ homielskaj turmie siadzić ad pačatku kastryčnika vałancior Illa Mironaŭ. Jon napisaŭ na svajoj staroncy Facebook: «Spačuvaju siamji zahinułaha Andreja Zielcera». Heta stała padstavaj dla zatrymańnia i kryminalnaj spravy.
Pierastrełka pamiž supracoŭnikam KDB Dźmitryjem Fiedasiukom i supracoŭnikam IT-śfiery Andrejem Zielceram adbyłasia 28 vieraśnia 2021 hoda ŭ Minsku na vulicy Jakuboŭskaha. 32-hadovy Andrej Zielcer zastreliŭ supracoŭnika śpiecsłužby, jaki z hrupaj siłavikoŭ hvałtoŭna ŭvarvaŭsia ŭ jahonuju kvateru, vyłamaŭšy dźviery. Paśla siłaviki strelili ŭ Andreja Zielcera i zabili jaho. Hramadzianskuju žonku Andreja Zielcera zatrymali. Imavierna, jana dahetul u SIZA.
Kamientary