Raniej da jaho pryjazdžali žurnalisty ANT, a ciapier — AMAP. Što viadoma pra zatrymańnie 45-hadovaha tyktokiera
«Pavalili na padłohu i spytali: viedaješ, za što?». Błohiera skrucili ŭ jaho babrujskaj kramie.
Andreju Bialaŭskamu 45 hadoŭ. Jon žyvie pamiž Minskam i Babrujskam. Asnoŭny jaho zaniatak — vialikaja viełasipiednaja krama «Viełasportmajstar» u Babrujsku. Andrej žanaty, maje dvaich dziaciej, dačku i syna.
Dva hady tamu Bialaŭski trapiŭ spačatku ŭ miascovyja, a paśla i ŭ respublikanskija naviny.
U kramu Andreja pryjšoŭ maleńki chłopčyk z tryma rublami (jakija baćki dali jamu na cukar i piečyva) i raskazaŭ, što vielmi choča novy viełasipied — maŭlaŭ, stary ŭžo zusim złamany. Skončyłasia siurpryzam — Bialaŭski padaryŭ chłopcu viełasipied.
Videa sabrała na Jutubie až 14 miljonaŭ prahladaŭ.
Paśla pra Andreja i jaho maleńkaha klijenta navat źniali siužet dla ANT.
Ale ciapier Bialaŭski moža źjavicca na dziaržtelebačańni zusim u inšych videarolikach. 25 krasavika jaho zatrymali ŭ Babrujsku.
«Jon pryjechaŭ z synam, tolki zajšoŭ u kramu, jak zalacieŭ AMAP i milicyja ŭ cyvilnym, — raskazvaje śviedka. — Syn nie paśpieŭ vyjści z mašyny.
U kramie Andreja pavalili na ziamlu, adzin ź siłavikoŭ zdymaŭ zatrymańnie na videa. U Andreja spytali: «Viedaješ, za što?» Jon adkazaŭ: nie. Na što jamu paviedamili: tady daviedaješsia ŭ sudzie.
Paśla Andreju zakrucili ruki i paviali ŭ mikraaŭtobus».
Razam ź Bialaŭskim zabrali i jaho niepaŭnaletniaha syna.
«Kali siłaviki daviedalisia, što synu Andreja niama 18, to havaryli z padletkam spakojna. Skazali chłopcu, što nibyta Bialaŭski padrezaŭ kahości na trasie i zdaryłasia «strašnaja avaryja», pačali raspytvać pra baćku», — kaža znajomy Bialaŭskaha.
Paśla syna adpuścili — addali babuli ź dziadulem.
«Andrej razumieŭ, što mohuć pryjści, pytaŭsia ŭ svaich: što jany buduć rabić, kali jaho zatrymajuć? Z adnaho boku, tak žartavaŭ», — zhadvaje surazmoŭca.
Papiarednie źjaviłasia infarmacyja, što Bialaŭskaha zatrymali za roliki ŭ Tyktoku. Jon padazravany pa kryminalnym artykule (pa jakim dakładna, pakul nieviadoma), u jaho kvatery prajšoŭ pieratrus.
Svoj akaunt u Tyktoku pad nazvaj «U mienia vopros» Bialaŭski pryśviaciŭ navinam i ich kamientavańniu. Rabiŭ heta z humaram, u jaho rolikach fihuravali i Azaronak, i Łukašenka. Vykazvaŭsia suprać vajny.
106 tysiač padpisčykaŭ, 4,6 miljona łajkaŭ — niebłahija pakazčyki dla biełaruskaha błohiera. A niekatoryja roliki «zalatali» na sotni tysiač prahladaŭ, u samych papularnych videa pa 500-700 tysiač!
Praŭda, jaki kankretna rolik staŭ pryčynaj zatrymańnia, pakul niezrazumieła.
Stała viadoma, čamu pieramožca biełaruskaha adboru «Mis Suśviet» nie jedzie na konkurs. Jana znajšłasia ŭ SIZA3
Kamientary