Андрэю Бяляўскаму 45 гадоў. Ён жыве паміж Мінскам і Бабруйскам. Асноўны яго занятак — вялікая веласіпедная крама «Веласпортмайстар» у Бабруйску. Андрэй жанаты, мае дваіх дзяцей, дачку і сына.
Два гады таму Бяляўскі трапіў спачатку ў мясцовыя, а пасля і ў рэспубліканскія навіны.
У краму Андрэя прыйшоў маленькі хлопчык з трыма рублямі (якія бацькі далі яму на цукар і печыва) і расказаў, што вельмі хоча новы веласіпед — маўляў, стары ўжо зусім зламаны. Скончылася сюрпрызам — Бяляўскі падарыў хлопцу веласіпед.
Відэа сабрала на Ютубе аж 14 мільёнаў праглядаў.
Пасля пра Андрэя і яго маленькага кліента нават знялі сюжэт для АНТ.
Але цяпер Бяляўскі можа з'явіцца на дзяржтэлебачанні зусім у іншых відэароліках. 25 красавіка яго затрымалі ў Бабруйску.
«Ён прыехаў з сынам, толькі зайшоў у краму, як заляцеў АМАП і міліцыя ў цывільным, — расказвае сведка. — Сын не паспеў выйсці з машыны.
У краме Андрэя павалілі на зямлю, адзін з сілавікоў здымаў затрыманне на відэа. У Андрэя спыталі: «Ведаеш, за што?» Ён адказаў: не. На што яму паведамілі: тады даведаешся ў судзе.
Пасля Андрэю закруцілі рукі і павялі ў мікрааўтобус».
Разам з Бяляўскім забралі і яго непаўналетняга сына.
«Калі сілавікі даведаліся, што сыну Андрэя няма 18, то гаварылі з падлеткам спакойна. Сказалі хлопцу, што нібыта Бяляўскі падрэзаў кагосьці на трасе і здарылася «страшная аварыя», пачалі распытваць пра бацьку», — кажа знаёмы Бяляўскага.
Пасля сына адпусцілі — аддалі бабулі з дзядулем.
«Андрэй разумеў, што могуць прыйсці, пытаўся ў сваіх: што яны будуць рабіць, калі яго затрымаюць? З аднаго боку, так жартаваў», — згадвае суразмоўца.
Папярэдне з’явілася інфармацыя, што Бяляўскага затрымалі за ролікі ў Тыктоку. Ён падазраваны па крымінальным артыкуле (па якім дакладна, пакуль невядома), у яго кватэры прайшоў ператрус.
Свой акаунт у Тыктоку пад назвай «У меня вопрос» Бяляўскі прысвяціў навінам і іх каментаванню. Рабіў гэта з гумарам, у яго роліках фігуравалі і Азаронак, і Лукашэнка. Выказваўся супраць вайны.
106 тысяч падпісчыкаў, 4,6 мільёна лайкаў — неблагія паказчыкі для беларускага блогера. А некаторыя ролікі «заляталі» на сотні тысяч праглядаў, у самых папулярных відэа па 500-700 тысяч!
Праўда, які канкрэтна ролік стаў прычынай затрымання, пакуль незразумела.
