Śviatłana Cichanoŭskaja raspaviała, čym žyŭ Siarhiej da taho, jak pryjšoŭ u palityku
Siarhieja Cichanoŭskaha časta nazyvajuć čałaviekam, jaki abudziŭ Biełaruś. Videabłoh «Kraina dla žyćcia», dzie hučała rezkaja krytyka na adras Alaksandra Łukašenki i nabližanych da jaho čynoŭnikaŭ, Siarhiej pačaŭ vieści viasnoj 2019 hoda. A ŭžo praz hod, 29 maja 2020-ha, jaho zatrymali na pieradvybarčym mitynhu padčas zboru podpisaŭ za jaho žonku Śviatłanu Cichanoŭskuju.
Vyłučeńnie jaho samoha zabłakavaŭ CVK: Cichanoŭski nie moh asabista zarehistravać svaju inicyjatyŭnuju hrupu, pakolki adbyvaŭ administracyjny aryšt. Praz paŭtara hoda, 14 śniežnia 2021, Homielski abłasny sud asudziŭ Siarhieja Cichanoŭskaha da 18 hadoŭ hadoŭ kałonii ŭzmocnienaha režymu.
Śviatłana Cichanoŭskaja raspaviała pra čas da 2020-ha hoda, kali Siarhiej zachoplena zajmaŭsia raźvićciom kłubnaha žyćcia ŭ svaim rodnym horadzie, arhanizoŭvaŭ kancerty muzyčnych zorak, budavaŭ karjeru ŭ rekłamnym biznesie i maryŭ padaryć novaje žyćcio staradaŭniamu domu ŭ biełaruskaj vioscy.
«Siarhiej zachaplaŭsia muzykaj, u junactvie jon navat staŭ dydžejem: hraŭ na viniłavych płaścinkach. Akramia taho, Siarhiej ładziŭ viečaryny elektronnaj muzyki, fiestyvali, kancerty zamiežnych i biełaruskich hurtoŭ, taho ž N.R.M., zabaŭlalnyja šou. Da Siarhieja źviartalisia navat pradstaŭniki Homielskaha harvykankama: maŭlaŭ, dapamažy nam arhanizavać vystupy homielskich dydžejaŭ. Kancertnaj dziejnaści Siarhiej pryśviaciŭ kala dziesiaci hadoŭ», — raspaviadaje Śviatłana Cichanoŭskaja.
Jana kaža, što Siarhiej lubiŭ Homiel i chacieŭ napoŭnić jaho žyćciom.
«U 22 hady ŭ Siarhieja źjaviłasia ideja: Homielu patrebny sučasny kłub, dzie budzie ŭžyvuju hučać taja muzyka, jakuju raniej bolšaść čuła tolki ŭ navušnikach. Tak u horadzie źjaviŭsia lehiendarny kłub «Adrenalin». A ŭ 24 hady Siarhiej kiravaŭ užo niekalkimi ŭstanovami.
Viadomyja kłuby Homielščyny «Nema», «Brava», «Łajt», «Elza» taksama adkrylisia nie biez udziełu Siarhieja. Siarhieja viedali i lubili pradstaŭniki kłubnaj kultury roznych krain, usiudy sustrakali jak darahoha hościa. U Litvie, naprykład, jon pasiabravaŭ z Maryusam i Mindaŭhielisam — dydžejem i pradziusaram načnoha kłuba «Global» u Kłajpiedzie. Potym jany časta pryvozili svaje prahramy ŭ Biełaruś», — zhadvaje Śviatłana.
Pośpiech mnohich prajektaŭ Siarhieja Cichanoŭskaha jana źviazvaje najpierš ź jaho niestandartnym myśleńniem, śmiełaściu i razumieńniem, jak pracuje rekłama i markietynh.
«Niejki čas jon papracavaŭ u sietcy markietynhu MTS, a potym aformiŭ svaju sietku sałonaŭ suviazi. I praź niejki čas litaralna ŭvieś horad staŭ jeździć padklučacca ŭ adzin ź jaho sałonaŭ. Siarhiej prydumaŭ kožnaha klijenta pry padklučeńni častavać picaj z susiedniaj piceryi! Usie byli ŭ zachapleńni.
Potym jon zasnavaŭ svajo rekłamnaje ahienctva i studyju pradakšanu. Jon zachaplaŭsia rekłamaj, razumieŭ jaje miechanizmy, zaŭsiody moh prapanavać jarkaje i efiektyŭnaje rašeńnie. Jon nie tolki naminalna kiravaŭ pracesam: jon asabista pradziusavaŭ muzyčnyja klipy, filmy, rekłamnyja roliki, padbiraŭ akcioraŭ dla zdymak jak kastynh-dyrektar. Sotni papularnych rekłamnych rolikaŭ i karparatyŭnych filmaŭ źniatyja pa scenaryjach, jakija napisaŭ sam Siarhiej», — kaža lidarka demakratyčnych sił.
Na praciahu piatnaccaci hadoŭ, z 2005-ha, Siarhiej Cichanoŭski prafiesijna zajmaŭsia markietynham, adkryŭ svaje firmy ŭ Biełarusi i za miažoj. A paśla pačaŭ rabić «Krainu dla žyćcia».
«Siarhiej vyrašyŭ, što chłuśnia, kryvadušnaść i biezzakońnie, jakija stali normaj žyćcia ŭ Biełarusi, tryvać bolš nielha. Nielha rabić vyhlad, što ty nie zaŭvažaješ hetaha. Siarhiej vyrašyŭ dziejničać. Tak źjaviłasia «Kraina dla žyćcia», — tłumačyć Śviatłana.
Jana adznačaje, što Siarhiej viernik, dla jaho relihija maje vialikaje značeńnie.
«Jon uvieś čas spaviadaŭsia, pryčaščaŭsia. Vielmi horka, što z taho času, jak Siarhiej znachodzicca ŭ SIZA, da jaho ni razu nie puskali śviatara. Siarhiej pastajanna jeździŭ u pałomnickija vandroŭki: byvała, što jeździli ŭsioj siamjoj.
Razam jeździli da Mikałaja Cudatvorca, na vostraŭ da Śpirydona Trymifunckaha, da Śviatoha Łazara na Kipr. U Biełarusi Siarhiej braŭ udzieł va ŭzhadnieńni ŭźviadzieńnia pachavalni Śviatoha Iaana Karmianskaha, jakoha asabliva šanujuć biełaruskija pravasłaŭnyja. U Aharodni pad Dobrušam, dzie pachavany śviaty, Siarhiej kupiŭ darevalucyjny «kułacki» dom, jaki cudam zachavaŭsia i źjaŭlajecca pomnikam architektury. Siarhiej płanavaŭ jaho adnavić, adkryć kaviarniu, haścinicu dla pałomnikaŭ. Ale nie paśpieŭ ažyćciavić maru», — kaža Śviatłana.
Siarhiej taksama zajmaŭsia dabračynnaściu, dapamahaŭ pravasłaŭnym siemjam, jakija mieli ŭ hetym patrebu.
Kamientary