Minzdaroŭja prypyniła licenziju samaha viadomaha pryvatnaha miedcentra. Jak vyśvietliła «Naša Niva», za hetym — palityka, a suma štrafu moža vyraści.
U abhruntavańni pryčyn pazbaŭleńnia licenzii ministr achovy zdaroŭja Źmicier Pinievič pierakonvaje, što prypynieńnie dziejańnia licenzii na dziejnaść «Łade» «nie jość ekstraardynarnym faktam», rapartuje BIEŁTA.
Čytajcie taksama: Minzdaroŭja prypyniła dziejańnie licenzij na dziejnaść miedcentraŭ «Łade» i «Klinika A1»
Pinievič pieraličvaje pretenzii, jakija tyčylisia, u pryvatnaści, «nievykanańnia pratakołaŭ padčas akazańnia nieadkładnaj mieddapamohi — heta rabota na abstalavańni, jakoje nie zarehistravanaje abo jakoje nie prajšło nieabchodnyja rehłamienty. Vyjaŭlenyja parušeńni sanepidrežymu, jakija mohuć paciahnuć surjoznyja ŭskładnieńni abo pahrozu žyćciu», — skazaŭ Pinievič.
Rabotniki miedycynskaj śfiery sa słovaŭ ministra śmiajucca.
«Kali ŭ «Łade» vyjaŭleny «parušeńni sanepidrežymu», to, kab być paśladoŭnym, Pinieviču treba zakryć i ŭsie biez vyklučeńnia dziaržaŭnyja palikliniki.
Nu bo paraŭnoŭvać dziaržpalikliniku pa čyścini z «Łade» ž prosta śmiešna, praŭda? Jość žart, čym adroźnivajecca płatnaja paliklinika ad biaspłatnaj: u płatnaj bachiły na ŭvachodzie biaspłatna vydajuć, a ŭ biaspłatnaj jany za rubiel pradajucca, i tamu tam viečna brud, bo klijenty hrošaj škadujuć», — iranizuje surazmoŭca sa śfiery.
«Absalutna jasna, što ministr «lepić harbataha». Chto choć minimalna sutykaŭsia z pravierkami i normami, toj viedaje, što idealnaha miedycynskaha centra (pa mierkavańni sanstancyi, pažarnikaŭ i milicyi) prosta niemahčyma stvaryć, tamu što pažarnikam treba budzie, kab vokny adkryvalisia, a milicyi — kab na ich byli kraty. Heta ŭsio razmovy ni pra što, Pinieviča śmiešna słuchać, chaj raźbirajecca ź niedachopam miedykaŭ u dziaržaŭnych paliklinikach.
«Łade» — realna fłahman rynku. Tam najlepšaje abstalavańnie i sabranyja lepšyja kadry za ŭsie hetyja hody, heta ahulnaviadoma», — reziumuje dziejač sa śfiery.
U miedycynskaj supolnaści ŭžo skłałasia mierkavańnie adnosna taho, što realna adbyvajecca z «Łade».
«Nakolki my tut usie razumiejem, tut tak: za toje, što centr akazvaŭ biaspłatnuju dapamohu paciarpiełym ad źvierstvaŭ siłavikoŭ u 2020-m, była zatojena złoba, jakaja z časam transfarmavałasia ŭ pazapłanavuju pravierku dziaržkantrolu. Taja «znajšła» ŭsio na śviecie: «parušeńni» kliničnych pratakołaŭ, «parušeńni» paradku akazańnia dapamohi, «parušeńni» sterylnaści i hetak dalej.
Niešta padobnaje adbyvałasia, naprykład, z «Hrynam». Tolki tam aryštoŭvali bieniefiecyjara.
U vypadku z «Łade» bieniefiecyjaru taksama vystaŭleny rachunak, ale biez zatrymańnia. Heta vuzkaja śfiera, tut tak prosta detali nie daviedaješsia, ale ličycca, što pakul što idzie zbor hrošaj na pahašeńnie sumy «vykupu». Suma nieviadomaja šyrokim kołam. Matyvacyja — spynieńnie dziejnaści centra», — ličyć surazmoŭca ź miedycynskaj śfiery.
Supracoŭniki «Łade» raskazali «Našaj Nivie», što aficyjny pamier štrafu, vystaŭlenaha miedcentru, — 1 miljon biełaruskich rubloŭ. Ale jość sumnievy adnosna kančatkovaści hetaj sumy.
Zvyčajna, u padobnych vypadkach «vychavaŭčaha rekietu» ź biznesaŭ ździrajuć bolš. Naprykład, u vypadku banka BiełVEB krynicy kazali «Našaj Nivie», što ahulnaja suma, zapłačanaja za vychad jaho mieniedžaraŭ na svabodu, blizkaja da 25 miljonaŭ dalaraŭ. Praŭda, u vypadku «Łade» niama kryminalnaj spravy.
Kamientary