Kolki kaštujuć i jak vyhladajuć samyja darahija kvatery abłasnych centraŭ? Interjer niekatorych vas urazić
Na minułym tydni «Naša Niva» rabiła ahlad samych darahich kvater stalicy. Ahułam u Minsku pradajecca bolš za 20 kvater koštam vyšej za miljon dalaraŭ. Hetym razam my vyvučyli samyja darahija prapanovy ŭ abłasnych centrach.
Brest. Elitny rajon u parkavaj zonie
Samaja darahaja kvatera ŭ Breście vystaŭlena na prodaž za 360 tysiač dalaraŭ. Hetak haspadary aceńvajuć 5-pakajovuju kvateru ŭ centry horada ŭ domie 1954 hoda pabudovy. Abjekt čymści nahadvaje sučasnyja taŭnchaŭsy. Bo aproč samoj kvatery vy atrymoŭvajecie kavałak aharodžanaha ŭčastka z zonaj adpačynku i haražom. Z 228,2 m² ahulnaj płoščy žyłoj tolki 70,7 m².
Kvatera trochuzroŭnievaja. Na cokalnym paviersie mieścicca saŭna, sanvuzieł, pakoj dla adpačynku, pralny i haspadarčyja pakoi. Na pieršym paviersie try pakoi z častkovym ramontam, na mansardzie — kuchnia-haścioŭnia i dźvie spalni.
«Elitny rajon u parkavaj zonie. Mahčymy vyvad u niežyły fond ź pieraprafilavańniem pad kamiercyjnuju nieruchomaść», — napisana ŭ abjavie.
Niahledziačy na vysoki košt, interjery kvatery naŭrad ci zmohuć kahości ŭrazić. Niekatoryja pamiaškańni vyhladajuć tak, što ŭ ich biez prablem možna zdymać filmy pra žyćcio namienkłatury SSSR.
Vysokaja cana abumoŭlena nie najaŭnaściu dyzajnierskaha ramontu i darahoha abstalavańnia, a raźmiaščeńniem kvatery i pluškami ŭ vyhladzie raskošnaha sada i haraža.
Druhaja i treciaja pa darahoŭli kvatery Bresta pradajucca ŭ novabudoŭli pa vulicy Levanieŭskaha, što pobač z centralnym parkam, u kvartale, zabudavanym u 1920—1930-ja pad patreby elity ŭ časie, kali horad byŭ vajavodskim centram mižvajennaj Polščy.
Cana 4-pakajoŭki z ahulnaj płoščaj 220,4 m² składaje 335 000 $, kvatera płoščaj 212,9 m² kaštuje 324 000 $. Za hetyja hrošy vy atrymlivajecie pamiaškańni z hołymi ścienami.
Ahułam u Breście pradajecca 10 kvater, ceny na jakija pieravyšajuć adznaku 200 tysiač dalaraŭ.
Viciebsk. «Hipiermarkiet u piešaj dasiažnaści»
U Viciebsku najdaražejšaja kvatera pradajecca za 197 000 $.
«Prastornaja kvatera z pryjemnym ramontam u skandynaŭskim styli ŭ samym centry horada na bierazie Zachodniaj Dźviny. Dom manalitny, ciopły, 2011 hoda pabudovy. Vydatny panaramny vid na raku i Try štychi z usich voknaŭ. Niezvyčajnaje (ale zakonnaje) pierapłanavańnie», — apisvajuć svaju «trošku» haspadary.
Płošča — 71 m². Ułaśniki abiacajuć častkova pakinuć meblu i techniku novym haspadaram.
Siarod inšych pieravah, na jakija ŭkazvaje pradaviec, — hipiermarkiet i kaviarnia ŭ piešaj dasiažnaści.
Na druhim miescy pa darahoŭli ŭ Viciebsku znachodziacca adrazu try kvatery. Usie jany acenieny ŭ 130 tysiač dalaraŭ. Adna ź ich — samaja prastornaja — maje ahulnuju płošču 139,2 m² i žyłuju — 112,4 m². Kvatera dvuchpaviarchovaja, mieścicca na vulicy Savieckaj.
«Niestandartnaja dvuchuzroŭnievaja kvatera ŭ Viciebsku z kaminam. Šeść žyłych pakojaŭ, kuchnia-haścioŭnia 32 «kvadraty», dva sanvuzły», — havorycca ŭ apisańni.
Homiel. «Pasažyrski lift, u paradnym zaŭsiody čysta»
Samaja darahaja kvatera ŭ druhim pa nasielnictvie horadzie Biełarusi pradajecca za 250 tysiač dalaraŭ. Stolki prosiać za dvuchuzroŭnievuju kvateru ŭ domie 1996 hoda pabudovy z kanśjeržam. Ahulnaja płošča čatyrochpakajoŭki — 141,7 m².
«Šykoŭnaja kvatera ź vidam na lesaparkavuju zonu ŭ cichim i kamfartabielnym rajonie. Majecca kanśjerž, pasažyrski lift, u paradnym zaŭsiody čysta. Dźvie łodžyi, ababityja vahonkaj, na kožnaj jość kładoŭka. U kvatery majucca dva tualety, duš, prastorny vanny pakoj, dzie vy zmožacie rassłabicca paśla pracoŭnaha dnia», — vabić abjava.
Interjer samaj darahoj kvatery Homiela dapamoža vam apynucca ŭ atmaśfiery zamožnych kvater 1990-ch hadoŭ.
Druhaja pa darahoŭli kvatera ŭ Homieli pradajecca za 170 tysiač dalaraŭ. Stolki prosiać za trochpakajoŭku ŭ centry.
«Kvatera dla VIP. Dom raźmieščany ŭ histaryčnym centry horada. Cichaje i spakojnaje miesca dla kamfortnaha pražyvańnia. Pobač znachodzicca fizkulturna-azdaraŭlenčy kompleks, kramy, restarany, prypynki hramadskaha transpartu, dziciačy sad, škoły», — apisvajuć žyllo.
Kvatera vystaŭlena ź italjanskaj meblaj premium-kłasa.
Ahułam u Homieli pradajecca 15 kvater z canoj ad 100 tysiač dalaraŭ i vyšej.
Hrodna. Kvatera ź vidam na Stary horad
Samaja darahaja kvatera ŭ Hrodnie aceniena ŭ 216 500 dalaraŭ. Stolki prosiać za 5-pakajovuju kvateru ŭ novabudoŭli. Dom mieścicca na pravym bierazie Niomana ŭ niepasrednaj blizkaści ad «Makdonaldsa» i abłasnoj fiłarmonii.
«Unikalnaja dvuchuzroŭnievaja 5-pakajovaja kvatera ź vidam na stary horad u pryhožym «razumnym» domie», — havorycca ŭ apisańni. Ahulnaja płošča 156,93 m², žyłaja — 100 m². Dom pabudavany sioleta, za hetyja hrošy ŭłaśnik atrymlivaje kvateru biez unutranaj adździełki.
Druhaja pa canie kvatera ŭ Hrodnie pradajecca za 199 tysiač dalaraŭ. U takuju sumu acanili trochpakajoku, jakaja mieścicca ŭ elitnym domie nasuprać aŭtavakzała.
Ahulnaja płošča 144,1 m², žyłaja — 108 m².
«Ekskluziŭnaja kvatera z dobrym dyzajnierskim ramontam, u centry horada», — havorycca ŭ apisańni.
Usiaho ŭ Hrodnie pradajecca zvyš 20 kvater koštam ad 100 tysiač dalaraŭ.
Mahiloŭ. Najlepšy pientchaŭs horada
Samaja darahaja kvatera ŭ Mahilevie kaštuje 299 tysiač dalaraŭ. U takija hrošy aceńvajuć pientchaŭs u centry horada.
Piacipakajovaja kvatera mieścicca na 22-paviersie. Z terasy adkryvajecca pryhožy vid na horad i raku Dubravienka. Ahulnaja płošča 279 m², žyłaja — 151 m².
«Pradajecca adzin z najlepšych pientchaŭsaŭ horada Mahileva. Ramont vykanany vysakajakasnymi materyjałami, što dazvalaje zajechać i žyć biez dadatkovych układańniaŭ. Siarod šumu štodzionnaści i pastajannaj aktyŭnaści žyćcia vy budziecie mieć prastoru bieź lišnich detalaŭ, poŭnuju pryhažości i śviatła», — nachvalvajuć u apisańni.
Apartamienty pradajucca razam z meblaj i bytavoj technikaj.
Druhaja pa darahoŭli kvatera ŭ Mahilevie pradajecca za 190 tysiač dalaraŭ. Ahulnaja płošča kvatery 172 m².
«Elitnaja dvuchpaviarchovaja (5, 6 pavierch) kvatera ŭ centry horada z dyzajnierskim ramontam, darahoj meblaj i italjanskaj plitkaj. Dom z kanśjeržam, spakojny cichi dvor», — havorycca ŭ apisańni.
Ahułam u Mahilevie pradajecca bolš za 20 kvater koštam ad 100 tysiač dalaraŭ.
Čytajcie taksama:
Kolki kaštujuć i jak vyhladajuć samyja darahija kvatery Minska
Što zapisana aficyjnaj pryčynaj śmierci adzinaha syna Jarmošynaj?9
Kamientary