Analityk Siarhiej Čały parazvažaŭ pra stan ekanomiki. Jon dumaje, što ŭ nastupnym miesiacy my ŭbačym źnižeńnie cen na asobnyja tavary — i voś čamu.
Vytrymki ź jaho efiru na DW pryvodzić «Salidarnaść».
U Biełarusi asnoŭny ŭdar pa ekanomicy pryjšoŭsia pa eksparcie, kaža analityk.
«I my znachodzimsia ŭ samym horšym z dvuch śvietaŭ. Tamu što my adnačasova pakutujem ad nastupstvaŭ prytoku naftadalaraŭ u Rasiju i pakutujem ad taho, što ŭ nas niama ŭłasnaha prytoku valutnych pastupleńniaŭ.
Za pieršy kvartał my jašče nie bačyli vynikaŭ. Ja ŭpeŭnieny, što za krasavik-maj budzie minus 40% ekspartu, i heta katastrafičnaje padzieńnie. Krasavickija ličby pa VUP — heta ŭžo minus 6%, kali ličyć miesiac da miesiaca».
Što da reakcyi biznesu na sankcyi, to Čały ličyć, što ŭcioki kapitału spynieny tolki administracyjnymi mierami.
«My ž pieraniali ad Rasii pastanovu ab tym, što, kali chtości pasprabuje syści ź Biełarusi abo sprabuje zamarožvać inviestycyi abo navat prypyniać inviestycyjnyja prajekty, to im ledź nie pahražali adabrańniem ułasnaści, nacyjanalizacyjaj i hetak dalej.
Heta značyć, taja situacyja, jakuju my ciapier majem, jana absurdnaja z punktu hledžańnia makraekanomiki, tamu što rubiel zanadta mocny ŭ paraŭnańni sa stanam biahučaha rachunku, płaciežnaha bałansu. Ź inšaha boku, my majem vielizarnuju kolkaść administracyjnych abmiežavańniaŭ. Mała chto moh sabie ŭjavić, što spačatku budzie pasłableńnie, a potym rezkaje ŭmacavańnie rubla.
Byŭ momant, kali imparciory zakładvali ryzyki dalejšaha pasłableńnia valuty. Było ledź ci nie paŭtarakratnaje pasłableńnie biełaruskaha i rasijskaha rubla, paśla čaho adbyŭsia adkat na dakryzisny ŭzrovień, a ceny zastalisia na starym uzroŭni.
Pra heta, darečy, i Łukašenka aburaŭsia, a Kamitet dziaržkantrolu, tak zvanaja palicyja cen, prymianiaje ŭsie mahčymyja srodki, ad pierakanańnia da ekanamičnaha hvałtu, dla taho, kab prymusić hetyja ceny ŭpaści. Ja dumaju, što ŭ nastupnym miesiacy my ŭbačym źnižeńnie cen na toje, što vyrasła bolš za ŭsio — na aŭtamabili i na bytavuju techniku», — prahnazuje Čały.
Kamientary