Bloomberg: Šolc admoviŭsia ad poŭnaj nacyjanalizacyi Gazprom Germania, kab «nie razzłavać» Pucina
Kancler FRH Ołaf Šolc admoviŭsia ad idei poŭnaj nacyjanalizacyi byłoha niamieckaha padraździaleńnia «Hazprama» Gazprom Germania, bo zaniepakojeny tym, što takoje rašeńnie «moža razdražniać prezidenta RF Pucina» i pryvieści da spynieńnia pastavak rasijskaha hazu. Pra heta paviedamlaje Bloomberg sa spasyłkaj na svaje krynicy.
Byłoje padraździaleńnie «Hazprama» ŭ krasaviku było pieradadzienaje pad kantrol niamieckaha enierhietyčnaha rehulatara. Urad Hiermanii vyrašyŭ uziać kampaniju, jakaja apynułasia pad sankcyjami, pad doŭhaterminovaje źniešniaje kiravańnie.
Pa słovach krynic, urad Hiermanii choča zabiaśpiečyć Gazprom Germania šmatmiljardnuju pazyku pierad ryzykaj mahčymaha bankructva. Havorka idzie pra 10 młrd jeŭra ad Dziaržbanka KfW Group. Pazyka pryznačanaja dla stabilizacyi finansaŭ Gazprom Germania i zabieśpiačeńnia biaśpieki pastavak.
Adznačajecca, što termin znachodžańnia Gazprom Germania na apiecy niamieckaha rehulatara budzie praciahnuty paśla kanca vieraśnia, kali zakančvajecca biahučy termin, a nazva kampanii z Gazprom Germania GmbH budzie źmienienaja na Securing Energy for Europe GmbH.
Pa źviestkach ahienctva, ministr ekanomiki FRH Robiert Chabiek nastojvaŭ na poŭnaj nacyjanalizacyi Gazprom Germania, ale hetuju ideju adchiliŭ kancler Ołaf Šolc.
Šolc, pavodle źviestak krynic vydańnia, zaniepakojeny tym, što taki krok moža razzłavać prezidenta Rasii Uładzimira Pucina i pryvieści da abvastreńnia supraćstajańnia ŭ dačynieńni da impartu rasijskaha hazu.
Z 4 krasavika kampanijaj kiruje Fiederalnaje sietkavaje ahienctva Hiermanii (BNetzA). Hrupa Gazprom Germania vałodaje ŭ Hiermanii schoviščam hazu i maje hłabalnuju handlovuju kamandu ź filijałami ŭ Łondanie i Sinhapury.
1 krasavika «Hazpram» spyniŭ udzieł u Gazprom Germania i ŭsich jaje aktyvach. Rasija ŭviała sankcyi suprać zamiežnych «dočak» «Hazprama» 11 traŭnia. Tady ž vice-kancler FRH Chabiek zajaviŭ, što byłyja daččynyja pradpryjemstvy rasijskaj kampanii pierastali atrymlivać haz.
Jak paśla kanca śvietu. Ahrasiadzibu ŭ Salihorskim rajonie zaniesła ziamloj3
Kamientary