Vybar srodkaŭ dla pralnych mašynaŭ vielmi vialiki. Ale časta chatnija sposaby ničym nie sastupajuć hatovym praduktam. Ich dziejańnie adnolkava efiektyŭnaje, i pry hetym jany, jak praviła, bolš ekałahičnyja i tańniejšyja. Raspaviadajem pra niezvyčajnyja sposaby dohladu adzieńnia.
Usie my chacieli b, kab paśla prańnia adzieńnie było miakkim, dobra pachła i vyhladała jak novaje. Ale heta nie zaŭždy tak. Mnohija ludzi nie viedajuć, što vyrašeńnie ŭ ich pad rukoj. I heta litaralna. Mnohija papularnyja pradukty majuć značna šyrejšaje prymianieńnie, čym my dumajem. Niekatoryja sposaby mohuć zdacca dziŭnymi, ale jany sapraŭdy pracujuć.
Bieły vocat (ale nie jabłyčny)
Adnym z samych efiektyŭnych i tannych sposabaŭ nadać vopratcy miakkaść źjaŭlajecca zvyčajny vocat. Heta taksama pieraduchilaje elektryzacyju tkanin. Prosta vykarystoŭvajcie jaho zamiest srodka dla pałaskańnia — dadajcie šklanku vocatu ŭ admysłovy adsiek mašyny. A kali vam chočacca, kab adzieńnie było duchmianym, dadajcie niekalki kropiel efirnaha aleju. Tak u vas atrymajecca chatniaja vadkaść dla pałaskańnia amal biaspłatna.
Jaho možna vykarystoŭvać i dla myćcia — tolki nie zamiest myjnaha srodku, a razam ź im, zaliŭšy šklanku ŭ baraban abo adsiek dla parašku. Vocat padychodzić jak dla biełych, tak i dla čornych tkanin, a taksama dla kalarovych. I tak, jon biaśpiečny i nie paškodzić adzieńnie, bo kancentracyja kisłaty tam dla hetaha niedastatkovaja.
Taksama jon karysny dla čystki mašyny. Spačatku zmačycie anuču ŭ vocacie i dobra vyčyścicie joj humovuju prakładu kala dźviercaŭ pralnaj mašyny. Paśla vyńcie i vyčyścicie ad astatkaŭ pralnych srodkaŭ siekcyju, kudy vy dadajacie srodki dla prańnia i pałaskańnia. Paśla ŭstaŭcie jaje nazad i dadajcie dźvie šklanki vocatu ŭ adsiek dla myjnych srodkaŭ. Zapuścicie mašynu na samym haračym režymie, nie zahružajučy tudy adzieńnie. Kab uzmacnić vynik, paŭtarycie, tolki zamiest vocatu dadajcie paŭšklanki zvyčajnaj sody.
Sol
Jašče adzin niezvyčajny sposab dohladu za adzieńniem — dadać čajnuju łyžku soli da pralnaha srodku. Heta dapamoža zachavać kolery na tkaninach.
Cukar
U pralnuju mašynu možna dadać cukar, jaki dziejničaje jak aśviažalnik koleru. Prosta pakładzicie adnu abo dźvie (u zaležnaści ad kolkaści bializny) łyžki ŭ adsiek dla pałaskańnia.
Jość i inšaje vykarystańnie hetaha sałodkaha paraška. Jaho rastvor vydatna ŭmacoŭvaje tkaniny. Z dapamohaj takoha rastvoru možna apałasnuć abrusy abo štory.
Jaječnyja škarłupiny
Jašče cikaviej, kali my šukajem chatnija sposaby, jakija admyjuć plamy. Tut na dapamohu prychodzić… jaječnaja škarłupina. Prosta kińcie jaje ŭ tkankavy miašok, dobra zaviažycie jaho i pakładzicie ŭ baraban pralnaj mašyny. Ale nie varta vysypać ich prosta ŭ baraban.
Jaječnaja škarłupina, u adroźnieńnie ad adbielvalnikaŭ, nie paškodžvaje tkaninu, ale moža vydalać plamy. Kolkaść jaječnaj škarłupiny zaležyć ad taho, nakolki brudnaje adzieńnie. U bolš składanych vypadkach vam moža spatrebicca niekalki miašočkaŭ škarłupiny.
Łaŭrovy list
A kali škarłupina vam nie pasuje, to pasprabujcie łaŭrovy list. U zaležnaści ad kolkaści adzieńnia, vaźmicie ad niekalkich štuk da tuzina łaŭrovych listoŭ, zalicie vadoj i zakipiacicie. Kali vadkaść trochi astynie, prykładna praz 20-30 chvilinaŭ, pakładzicie ŭ jaje vopratku i pakińcie na niekalki hadzinaŭ. Vy možacie čas ad času pamiešvać ich rukoj dla lepšaha efiektu. Paśla staranna adciśnicie vopratku i vymyjcie, jak zvyčajna, u pralnaj mašynie abo rukami.
Vilhotnyja survetki
Hety prosty truk asabliva spadabajecca amataram ciomnaha adzieńnia i haspadaram chatnich žyviołaŭ. Prosta dadajcie ad adnoj da troch survetak u baraban. Vilhotnaja survetki, dziakujučy svajoj struktury, vydatna łoviać rozny brud. I asabliva dobra spraŭlajucca z poŭściu.
Hety łajfchak taksama dziejničaje na inšyja drobnyja zabrudžvańni, ad jakich ciažka pazbavicca. Abaviazkova pasprabujcie myć z survetkami svaje śvitery. Roźnica budzie istotnaj.
Kamientary