Dajarku-ŭkrainku departujuć ź Biełarusi paśla paskvila ŭ rajonnaj haziecie
Hramadzianku Ukrainy, jakaja ŭžo 8 hadoŭ žyvie i pracuje ŭ Homielskim rajonie, chočuć departavać ź Biełarusi z zabaronaj ujezdu ŭ krainu na 10 hadoŭ. Pra heta stała viadoma vydańniu «Fłahštok» paśla prapahandysckaj publikacyi, jakaja źjaviłasia ŭ haziecie rajvykankama.
Hałoŭnaja redaktarka rehijanalnaha praŭładnaha ŚMI Iryna Kanavałava vystupiła na staronkach haziety z abvinavačvańniami na adras Śniažany Dziačok — rabotnicu małočna-tavarnaj fiermy, jakaja ŭvachodzić u skład ptuškafabryki.
Kanavałava siarod inšaha viadomaja tym, što napisała danos na čytača, miascovaha piensijaniera Mikałaja Vicikava, jaki źviarnuŭsia ŭ hazietu sa svaimi prapanovami ab kanstytucyjnaj reformie. U vyniku jon apynuŭsia ŭ SIZA i byŭ asudžany na vosiem miesiacaŭ aryštu.
«Nazvaŭ Usiebiełaruski schod «šabašam». Jak 68-hadovaha byłoha deputata i dyrektara škoły asudzili za «dyskredytacyju Respubliki Biełaruś»
Hetym razam prapahandystka zajaviła, što dajarka Dziačok «prajaviła rasizm i samy sapraŭdny nacyzm». U svajoj publikacyi Kanavałava spačatku hanić Ukrainu ŭ cełym, śćviardžajučy, što «tyja, chto zachapiŭ uładu, pieraviali krainu na šlach banderaŭščyny», a zatym «vyśpiavajučaja chvarobatvornaja sistema va Ukrainie pryviała i da vajennaha supraćstajańnia z Rasijaj».
A zatym jana pierachodzić da pryvatnaha vypadku: nibyta žycharka vioski Klimaŭka, jakaja pierajechała z Ukrainy ŭ 2014 hodzie, «prajaviła rasizm i samy sapraŭdny nacyzm».
Kanavałava piša, što Śniažanie i jaje mužu vydali dazvoł na pracu, žančyna ŭładkavałasia na fiermu, siamji vydzielili žyllo. A «reakcyja na haścinnaść rušyła ŭśled značna paźniej i supała z pačatkam rasijskaj vajskovaj śpiecapieracyi», śćviardžaje redaktar rajonki:
«Paddaŭšysia masiravanaj emacyjnaj nakačcy, žančyna biez kropli saramlivaści stała pavodzić siabie pa-chamsku, zaklikajučy «stralać ruskich, a razam ź imi i biełarusaŭ». Usio heta čarhavałasia zvykłymi vykrykami «sała Ukrainie». Na źmienu padobnym «vysokamaralnym» replikam pryjšli i śpievy z takoj ža rytorykaj. Ich źmiest pra «drennaha prezidenta Pucina», viadoma, u pierakładzie na niecenzurnuju leksiku ŭžo mahła čuć usia akruha».
Nibyta na žančynu, jakaja «praciahnuła demanstravać svojeasablivuju «luboŭ» da Ukrainy, dałučajučy da hetaha i dziaciej», stali skardzicca kalehi i susiedzi, tamu «z boku ŭpraŭleńnia pa hramadzianstvie i mihracyi rušyli ŭśled dalejšyja dziejańni — anulavańnie śpiecdazvołu».
Miascovyja žychary, zapytanyja «Fłahštokam», abvinavačvańniaŭ nie paćvierdzili, kateharyčna śćviardžajučy:
«My prosta ŭ šoku ad hetaha artykuła — u im niama ni słova praŭdy».
Miascovyja žychary ŭspaminajuć tolki adnu situacyju, ź jakoj moh naraści kamiak iłžyvaj prapahandy:
«Zakranuli jaje dziaciej. Kamuści zdałosia, što nibyta jany dzieści kryknuli «Słava Ukrainie!»… Jana abaraniała svaich dziaciej, i paśla hetaha pačalisia prablemy».
Jak akazałasia, muž Śniažany atrymaŭ dazvoł na žycharstva ŭ Biełarusi, a sama žančyna kožny raz padaŭžała hadavuju rehistracyju. Jakraz pryjšoŭ čas rabić čarhovaje padaŭžeńnie, i ŭ hetym Śniažanie admovili.
«Kali jana padała dakumienty, u siamju pačała pryjazdžać milicyja — praviarali telefon, nibyta jana ahituje za vajnu i niešta padobnaje. Pryjazdžali niekalki razoŭ, ničoha nie znajšli. I potym dasłali dakumient ź milicyi — što nijakich parušeńniaŭ niama. Ale zamiest padaŭžeńnia rehistracyi skazali — vas departujuć».
Pa słovach znajomych Śniažany, farmalnaj padstavaj dla departacyi z zabaronaj ujezdu ŭ Biełaruś na 10 hadoŭ stali dva pratakoły pa linii DAI. Štrafy byli apłačanyja, ale pa biełaruskich zakonach dva administracyjnyja spahnańni — dastatkovaja padstava dla departacyi zamiežnika.
«Joj tołkam nichto ničoha nie patłumačyŭ, jana prajšła raznastajnyja instancyi — usiudy admova. Padała ŭ sud na abskardžańnie departacyi i zaraz čakaje rašeńnia. Ź fiermy jaje nie zvalniali i prava na pracu nie zabirali.
Śniažana — z Čarnihaŭskaj vobłaści, jaje dom tam razburyli padčas ciapierašnich abstrełaŭ, joj niama kudy jechać, tamu jana spadziajecca zastacca ŭ Biełarusi i budzie abskardžvać rašeńnie da apošniaha».
Miascovyja žychary taksama padkreślili, što ŭ susiedziaŭ pretenzij da Śniažany niama — jany navat davali na jaje stanoŭčuju charaktarystyku dla suda.
Darečy, litaralna ŭ sakaviku pra Śniažanu ŭ pazityŭnym klučy pisała taja ž hazieta Homielskaha rajvykankama — jak pra dobruju pracaŭnicu fiermy. A na staronkach ukrainki ŭ sacsietkach niama nijakich palityčnych pastoŭ — tolki siamiejnyja fota.
Tur anansuje, što Łukašenku napišuć na vybarach bolš za 90%5
Kamientary