Śpiecdakładčyk AAN: Biełaruskija arhanizacyi dasyłajuć jeŭrapiejskim palitykam śpisy palitviaźniaŭ na abmien
Niłs Mujžnijeks, śpiecdakładčyk AAN pa pravach čałavieka ŭ Biełarusi, raskazaŭ, što dumaje pra mahčymaść abmienu palitviaźniaŭ i kali bačyć dla Biełarusi akno mahčymaściaŭ.
Mujžnijeks padčas pres-kanfierencyi ŭ Vilni adznačyŭ, što na dumku Anais Maren, jaho papiarednicy na hetaj pasadzie, vybary ŭ Biełarusi — katalizatar parušeńnia pravoŭ čałavieka ŭ krainie. Tak adbyvałasia zaŭždy, i pierad ciapierašnimi vybarami ŭsio paŭtarajecca.
Śpiecdakładčyk kaža, što biełaruskija NDA aktyŭna dasyłajuć jeŭrapiejskim palitykam śpisy palitviaźniaŭ, jakija mohuć być vykarystanyja pry padrychtoŭki abmienu źniavolenymi — takoha, jaki adbyŭsia pamiž Rasijaj i Zachadam 1 žniŭnia 2024 hoda. Pavodle słoŭ Mujžnijeksa, jość nadzieja, što moža mieć miesca novy abmien takoha kštałtu.
Ź inšaha boku, Mujžnijeks maje źmiešanyja pačućci nakont idei abmienu źniavolenymi:
«Kožnaje žyćcio vartaje taho, kab pasprabavać jaho vyratavać. Kali adziny sposab dla hetaha — abmien, to takuju mahčymaść musiać razhledzieć tyja, chto maje dla hetaha mahčymaść. Ja nie maju takoj mahčymaści, ja nie trymaju ŭ padvale zatrymanych ahientaŭ KDB. Ź inšaha boku, heta moža spryjać tamu, što rasijski i biełaruski režymy pačnuć brać zakładnikaŭ.
Pytańnie abmienu nie datyčyć majho mandatu. I tut maja najvialikšaja zaniepakojenaść — toje, što paśla takoha abmienu zatrymańni ludziej praciahnucca. Kali abmieny i adbuducca, ja b chacieŭ, kab paśla ich skončylisia zatrymańni».
Śpiecdakładčyk AAN hladzić na Biełaruś z aptymizmam — na jaho dumku, u bližejšyja niekalki hadoŭ krainu čakajuć pieramieny:
«Vajna va Ukrainie skončycca tym ci inšym čynam u bližejšyja niekalki hadoŭ. My nie viedajem, jak heta adbudziecca, ale kali jana skončycca, heta adabjecca na Biełarusi, tamu što Biełaruś nastolki ŭciahnutaja ŭ jaje. I ja ŭpeŭnieny, što niekali ŭ nastupnyja hady krainu čakaje źmiena ŭłady».
Mujžnijeks razvažaje, što ŭ takich represiŭnych dziaržavach, jak ciapierašniaja Biełaruś, pieryjad źmieny ŭłady moža być składanym, i dla krainy heta adkryvaje akno mahčymaściaŭ. Jašče adzin šans dla pieramienaŭ — toje, što i ŭ Biełarusi, i ŭ Rasii ciapier vialikija składanaści ŭ ekanomicy. Tamu, padsumoŭvaje śpiecdakładčyk, možna spadziavacca na pieramieny ŭ krainie ŭ bližejšyja 3-6 hadoŭ.
Taksama Mujžnijeks vykazaŭsia nakont praktyki spravazdač pa Biełarusi, jakija ŭžo šmat hadoŭ źjaŭlajucca adnymi z vynikaŭ pracy śpiecdakładčykaŭ AAN pa našaj krainie. Na jaho dumku, hetaja praca ŭzdymaje palityčny košt praciahu represij. Akramia hetaha, jość nieabchodnaść infarmavać Zachad pra parušeńni pravoŭ čałavieka ŭ Biełarusi, i ŭ hetym płanie praca śpiecdakładčyka moža być karysnaj.
«Naša Niva» — bastyjon biełaruščyny
PADTRYMAĆ
Kamientary