Dziaržduma Rasii źbirajecca ŭzakonić kradziež zbožža i inšaj pradukcyi z Ukrainy
Da hetaha ŭłady kožny raz admaŭlali fakty kradziažu.
Zakonaprajekt budzie razhledžany na ekstrannym pasiadžeńni 15 lipienia, paviedamiła krynica kanała «Možiem objaśniť» u nižniaj pałacie parłamienta. Kab spraścić vyvaz sielhaspradukcyi, deputaty vyrašyli ŭnieści źmieny ŭ zakon «Ab mytnym rehulavańni». Jak akazałasia, ciapier vyvazu tavaraŭ i praduktaŭ ź niepadkantrolnych Kijevu rehijonaŭ pieraškadžajuć mytniki. U tłumačalnaj zapiscy havorycca, što jany «afarmlajuć charčovyja hruzy z «DNR», «ŁNR» i «vyzvalenych» terytoryj Ukrainy na praciahu doŭhaha času».
«U vyniku takich mierapryjemstvaŭ i nieažyćciaŭleńnia svabodnaha propusku fiermieraŭ praź dziaržaŭnuju miažu, uvoz hruzaŭ, asabliva jakija chutka psujucca, stanovicca biessensoŭnym», — skazana ŭ dakumiencie.
Dla źmieny situacyi ŭ mytny zakon budzie dadadzieny asobny raździeł «Asablivaści pieramiaščeńnia praz mytnuju miažu tavaraŭ na ŭčastkach, jakija prymykajuć da rajonaŭ praviadzieńnia śpiecyjalnaj vajennaj apieracyi na terytoryjach «DNR», «ŁNR» i Ukrainy». U im źjavicca artykuł, jaki praduhledžvaje, što ŭvoz tavaraŭ u Rasiju z «DNR», «ŁNR» i Ukrainy «ažyćciaŭlajecca na asnovie prava Jeŭrazijskaha ekanamičnaha sajuza».
Takim čynam, rašeńnie ab vyvazie tavaraŭ z Ukrainy prymajecca faktyčna ŭ adnabakovym paradku — u sakaviku Kijeŭ spyniŭ z Maskvoj lubyja handlovyja adnosiny. Pry hetym, u 2021 hodzie abjom impartu z Ukrainy ŭ Rasiju składaŭ bolš za $4 młrd. U JeŭrAzES Ukraina, jak viadoma, nie ŭvachodzić. Anałahičnyja praviły buduć dziejničać i na ŭvoz pradukcyi va Ukrainu i niepryznanyja respubliki.
Zakonaprajekt uniesła hrupa deputataŭ na čale ź Siarhiejem Mironavym.
Ułady Ukrainy nieadnarazova zajaŭlali ab kradziažy zbožža i inšaj pradukcyi z akupavanych terytoryj krainy. U internecie publikavalisia videa, na jakich byli fury, mierkavana, sa zbožžam, jakija nakiroŭvajucca ŭ bok Rasii. Častku zbožža vyvoziać z krainy pa vadzie — zapoŭnienyja im sudny traplali na spadarožnikavyja zdymki. Pavodle acenak analitykaŭ, rasijanie ŭžo vyvieźli z akupavanych terytoryj kala 220 tys. ton zbožžavych kultur. Rasija ž admaŭlaje fakt kradziažu zbožža.
Kamientary