Były milicyjant vynosiŭ braniabojnyja patrony, a banda małaletak ich skrała — pad sud pajšli ŭsie. Trahikamiedyja ŭ Mahilovie
U mahiloŭskim haražnym kaapieratyvie «Spadarožnik-2008» razharnuŭsia sapraŭdny detektyŭ. Banda paletkaŭ, samomu małodšamu ź jakich 15 hod, rabavała čužyja haražy, prałomvajučy dach. A ŭsio nakradzienaje składała ŭ svaim haražy. U susieda jany ŭmudrylisia ściahnuć navat braniabojnyja patrony, a potym pradać. Ale akazałasia, što jon sam ich dastaŭ niezakonna.
Toj haraž, dzie padletki znajšli patrony, naležaŭ byłomu supracoŭniku Departamienta achovy. Banda vyniesła adtul 170 patronaŭ kalibru 7,62ch39 i 36 patronaŭ 7,62ch39 z braniabojna-zapalnymi kulami, jakimi možna stralać z AKM, AKS, ručnych kulamiotaŭ RPK i hetak dalej. A taksama 519 patronaŭ 5,45 mm dla stralby ź pistaleta.
Bolš za toje, jany navat znajšli, kamu pradać braniabojnyja patrony — inšamu žycharu horada. Za 40 rubloŭ. Uhoda adbyłasia ŭ tym ža haražnym masivie.
U vyniku, kali na bandu vyjšli i znajšli astatniaje, to niepryjemnaści ŭźnikli i ŭ taho čałavieka, u jakoha patrony skrali — jon prachodzić z padletkami pa adnoj spravie.
Adkul były siłavik, a ciapier užo šarahovy supracoŭnik miascovaha abłasnoha centra tvorčaści mieŭ u svaim haražy braniabojna-zapalnyja patrony, tak i nie zrazumieła.
Mahčyma, heta niejak źviazana ź miescam jaho raniejšaj pracy.
Sudzić hrupu padletkaŭ, jakija, aproč patronaŭ, pavynosili z haražoŭ akumulatary i instrumienty, buduć u sudzie Leninskaha rajona Mahilova. Na ich zaviali spravu pa nastupnych artykułach: kradziež (č. 2 art. 205), niezakonnyja dziejańni z bojeprypasami (č. 3 art. 295), kradziež bojeprypasaŭ (č. 3 art. 294).
Kamientary