«605 rubloŭ za adzin dakumient ci čakajcie da sakavika». Jak biełarusy robiać apastyli ŭ krainie i ŭ pasolstvach za miažoj

Časova ŭviedzieny papiaredni zapis na pryjom

Apastyl — heta štamp, jaki zhodna z Haahskaj kanviencyjaj 1961 hoda nadaje jurydyčnuju siłu dakumientam, vydadzienym na terytoryi Respubliki Biełaruś, za miažoj. U zaležnaści ad typu dakumienta i krainy, dzie vam treba vykarystoŭvać biełaruskija dakumienty, apastyl stavicca na aryhinał dakumienta abo na nataryjalna zavieranyja kopii.

Składaniej za ŭsio apastylavać dakumienty, na jakija prastaŭlajuć apastyl u Ministerstvie zamiežnych spraŭ. Da takich dakumientaŭ u pryvatnaści adnosiacca paśviedčańni ab naradžeńni i zaklučeńni šlubu.

U suviazi ź vielizarnym popytam na pasłuhi časova ŭviedzieny papiaredni zapis na pryjom. Zapisvacca možna z 9 da 11 hadzin u pracoŭnyja dni, pa adrasie Minsk, vuł. Karła Marksa, 37a.

Prychodźcie ŭ sakaviku

U dzień hałoŭnaje ŭpraŭleńnie justycyi hatova prymać nie bolš za 50 čałaviek, abo 120 dakumientaŭ. Zabraniravać miesca ŭ čarzie pa telefonie ci elektronnaj pošcie niemahčyma. Tamu fizičnaja prysutnaść — abaviazkovaja. Adzinaja palohka ŭ tym, što zapis moža być praviedzieny luboj asobaj (nie ŭłaśnikam dakumienta), padavać dakumienty taksama maje prava lubaja asoba ź liku tych, chto ŭniesieny ŭ žurnał zapisu. Davieranaść taksama nie patrebnaja. Na pieršy pohlad, usio vyhladaje prosta, ale hałoŭnaja prablema ŭ tym, što ŭ siaredzinie lipienia 2022 hoda zapisvajuć na kaniec sakavika 2023-ha. Takim čynam atrymlivajecca, što zapisaŭšysia siońnia ŭ čarhu pa apastyl, vy zmožacie atrymać dakumient sa štampam tolki praz 8 miesiacaŭ!

Nahadajem, košt apastylu pavysiŭsia z 0,5 bazavaj vieličyni da 5 bazavych (160 rubloŭ).

Što prapanujuć pasiaredniki?

Achvotnyja choć trochi chutčej atrymać apastyl na dakumienty mohuć źviartacca da firmaŭ-pasiarednic. Adna z takich staličnych arhanizacyj prapanuje vyrašyć prablemu z apastylem užo ŭ kancy kastryčnika. Košt takoj pasłuhi składaje 605 rubloŭ za kožny dakumient. Pošlina (160 rubloŭ) uvachodzić u hetuju sumu.

Značna praściejšaje i krychu tańniejšaje apastylavańnie dakumientaŭ abydziecca tym, kamu dastatkova pastavić apastyl na nataryjalna zaśviedčanuju kopiju dakumienta. Za taki kamplekt dakumientaŭ pasiaredniki biaruć 460 rubloŭ, hatovyja dakumienty abiacajuć viarnuć praz 3-5 dzion.

Cikava, što jašče ŭ traŭni pasiaredniki brali za svaje pasłuhi značna mienš. Mienšymi byli i terminy atrymańnia dakumientaŭ.

Čytač, jaki zajmaŭsia prastaŭleńniem apastylu na dakumienty ŭ traŭni biahučaha hoda, śćviardžaje, što pasiarednikam płaciŭ «usiaho» pa 260 rubloŭ za dakumient.

«Ažyjataž byŭ mienšy. Rabiŭ 5 dakumientaŭ, pa 260 rubloŭ za kožny, zrabili za tydzień. U krainu, u jakuju ja pryjechaŭ, patrebnyja mienavita apastylavanyja aryhinały. Taksama na toj momant možna było damovicca z tym, chto stajaŭ u čarzie, uziać dadatkova dakumient, bo na čałavieka možna było padavać maksimum 5 dakumientaŭ, a niekatoryja stajali z 1-3».

Što rabić, kali ŭžo žyvieš za miažoj?

Pastavić apastyl na dakumienty možna i za miažoj. Dla hetaha treba źviartacca ŭ pasolstva. Tam vas taksama zapisvajuć u davoli vialikuju čarhu. Tak, naprykład, u Vilni možna zapisacca na kaniec listapada — pačatak śniežnia. Ale ŭ samich ambasadach apastyl na dakumienty nie prastaŭlajuć, a vysyłajuć dypłamatyčnaj poštaj u Biełaruś. Praz heta da daty vizitu ŭ ambasadu treba dadać jašče 2-3 miesiacy.

U biełaruskaj ambasadzie ŭ Biełastoku kažuć, što ad momantu zapisu na pryjom da atrymańnia dakumientaŭ z apastylem projdzie nie mienš, čym paŭhoda. Ale treba razumieć, što ŭ kožnaj krainie čas čakańnia čarhi na pryjom u ambasadu moža adroźnivacca.

Tak, naprykład, čytačka, jakaja žyvie ŭ Francyi, śćviardžaje, što ŭ lipieni 2022 hoda jaje zapisali na vierasień. Ale ŭ kožnym razie praces atrymańnia apastyla praz pasolstva zojmie kala 2-3 miesiacaŭ.

Rabić apastyl z-za miažy krychu tańniej. Cana za adzin dakumient składaje 35 jeŭra.

• 6
• 6
• 22
• 8
• 7
• 38