Mikałaj Aŭtuchovič na adzinaccaty dzień suchoj haładoŭki ź ciažkaściu moža siadzieć
Jak paviedamlaje Radyjo Svaboda, Mikałaj Aŭtuchovič siońnia prysutničaŭ na sudovym pasiadžeńni ŭ budynku hrodzienskaj turmy. Jamu pa-raniejšamu vydzialajuć u zale asobnuju ciesnuju kletku, i vyhladaje jon vielmi kiepska.
Na pytańnie, ci moža jon siadzieć, padsudny adkazaŭ, što zdoleje, kali palažyć 15 chvilin, a inakš nie moža. Na pytańnie, ci patrebien jamu lekar, viazień adkazaŭ, što toj usio adno ničym nie zdoleje dapamahčy. Lekar zajaviŭ, što Aŭtuchovič vyhladaje adpaviedna čałavieku, jaki haładaje biez vady 11-y dzień.
U sudzie abviaścili pierapynak da paniadziełka, heta budzie 15-y dzień haładoŭki, kali Mikałaj nie pačnie pić i jeści.
Učora stan Aŭtuchoviča rezka pahoršyŭsia: uzmacnilisia boli ŭ žyvacie, pačałasia reź, staŭ nadta časty puls. Lekar ahledzieŭ jaho i paviedamiŭ, što patrebien dadatkovy ahlad. U sudzie praz heta zrabili pierapynak. Ale ŭrešcie viaźniu nie dapamahli. Ukoł, jaki jamu rabili ŭčora pierad pasiadžeńniem, nie palepšyŭ jahonaje adčuvańnie.
Ciapier jon u karcary, dzie niama łožka, a nary mohuć apuścić tolki na noč (hetaje praviły nie zaŭždy vykonvajuć dla «palityčnych»). Zaŭtra jon maje pierajści ŭ zvyčajnuju kamieru.
Raniej stała viadoma, što Aŭtuchovič mocna abiazvodžany, u jaho pierasochli vusny i jazyk, ad jaho idzie mocny pach acetonu.
Mikoła Aŭtuchovič patrabuje svaim haładavańniem tolki adnaho — kab jamu pačali pieradavać listy ad svajakoŭ i inšych ludziej. Niadaŭna abarvałasia listavańnie navat sa staroj maci.
Aŭtuchovič — biełaruski rekardsmien u turemnym haładavańni. U 2009 hodzie jon haładavaŭ 90 dzion, u 2005—2006 — 74 dni. Pry hetym jon piŭ vadu. U 2013 hodzie jon na znak pratestu parezaŭ sabie žyvot u turmie.
Mikołu Aŭtuchoviču 59 hadoŭ, jon vieteran vajny ŭ Afhanistanie, vaŭkavyski pradprymalnik i hramadski aktyvist. Za kratami jon bolš jak paŭtara hoda, heta treciaje pa liku jahonaje źniavoleńnie. Usiaho pa «spravie Aŭtuchoviča» sudziać 12 čałaviek.
Chalezin: Nieŭźlin finansuje Chartyju'97 jašče z prezidenckich vybaraŭ 2010 hoda38
Kamientary