Šok u bankach: Siarhieju Kaściučenku, stvaralniku Pryjorbanka, dali try z pałovaj hady kałonii. Datyčny Baskaŭ?
Atłanta biełaruskaj bankaŭskaj śfiery sudzili pa 243 artykule KK — uchileńnie ad spłaty padatkaŭ. Razam z Kaściučenkam asudzili jašče dvuch biznesmienaŭ. Sudździa — Śviatłana Bandarenka. Hetaje rašeńnie ŭ bankaŭskich kołach aceńvajecca jak niečakanaje i palityčnaje.
Šmathadovaha kiraŭnika Pryjorbanka zatrymali napačatku sakavika, paśla jahonaha viartańnia z Aŭstryi, dzie Kaściučenka pastajanna pražyvaje.
«Zaprasili ŭ KDB i nie vypuścili», — kazali nam jaho kalehi.
Čytajcie taksama: «Zaprasili ŭ KDB i nie vypuścili»: zatrymany bankir Siarhiej Kaściučenka, kiraŭnik «Pryjorbanka»
Spačatku ŭ bankaŭskaj śfiery ličyli, što sprava Kaściučenki źviazana z adnoj ź IT-kampanij, dzie jon suzasnavalnik.
Paźniej stała viadoma, što asnoŭnyja pretenzii lažać u halinie «sychodu ad padatkaŭ».
Farmalna pytańni ŭ siłavikoŭ vyklikała lehalnaja schiema aščadžeńnia na padatkach z dapamohaj sistemy nazapašvalnaha strachavańnia «Pryjorłajf», jakoj karystalisia bankiry dla vyvadu dyvidendaŭ biez vypłaty padachodnaha.
«Heta raspaŭsiudžanaje ŭ śviecie nazapašvalnaje strachavańnie. Sens jaho ŭ tym, što ty prynosiš hrošy kampanii, jakaja vielmi kansiervatyŭna rasparadžajecca srodkami, — kłasičny piensijny fond. Jana abiacaje tabie dachodnaść pa prachodžańni peŭnaha času, ad niekalkich hadoŭ. Kali havorym pra piensiju, to pa dasiahnieńni hetak zvanaha «ŭzrostu dažyvańnia».
Pry ŭvodzie hrošaj u hetuju sistemu strachavańnia tabie nie treba płacić z hetaha padatki — tak rabili mnohija bankiry, pieraličvajučy tudy dyvidendy ad raboty ŭ banku.
Hetym karystajucca nie tolki bankiry. Vielmi padobnaja schiema pry apłacie adukacyi ci niečaha takoha — isnuje padatkovaje śpisańnie», — ličać našy surazmoŭcy z bankaŭskaj śfiery.
«Mnohija banki rabili prahramy pa zaachvočvańni supracoŭnikaŭ i mieniedžaraŭ. Maŭlaŭ, ty kłasna pracuješ, i kali budzieš praciahvać hetak ža, to my kožny hod budziem kłaści tabie na aščadžalnaje strachavańnie niejkuju sumu, zaklučym damovu na 10 hod, i kali ty adpracuješ 10 hod, to tabie ŭ adzin dzień budzie vypłačana, umoŭna, 20 tysiač dalaraŭ. Heta raspaŭsiudžanaja i, padkreślu, lehalnaja schiema. Takim karystalisia dziasiatki, sotni tysiač ludziej, usich sudzić?» — kažuć nam bankiry.
Nasamreč, sychodziacca ludzi z bankaŭ, ź jakimi havaryła «Naša Niva», u spravie Kaściučenki zamiašanaja palityka.
Chodziać čutki, što niezadoŭha pierad aryštam jon admoviŭ favarytu Łukašenki, chakiejnamu trenieru Dźmitryju Baskavu, u prośbie finansavać chakiejnaje «Dynama».
Śledčyja «Bajpoła» pryvodzili dokazy taho, što Dźmitryj Baskaŭ razam z Natallaj Ejsmant znachodzilisia na «Płoščy Pieramien» padčas zabojstva 31-hadovaha Ramana Bandarenki. U internecie apublikavanyja zapisy telefonnych razmoŭ čałavieka z hołasam, padobnym da hołasu Baskava, na hetuju temu. Adnak Śledčy kamitet i prakuratura nie dali chodu rasśledavańniu i, bolš za toje, Alaksandr Łukašenka pryznačyŭ Baskava členam Savieta Respubliki.
Akramia taho, my čuli ad supracoŭnikaŭ Pryjorbanka viersiju, što, da taho ž, u vinu Kaściučenku pastavili kantakty z Paŭłam Łatuškam.
«Nibyta, na telefonie Kaściučenki znajšlisia zvanki ci to Łatušku, ci to ad Łatuški. Ale kali jany i havaryli, to my ž nie viedajem pra što», — skazaŭ «Našaj Nivie» surazmoŭca.
My zapytali ŭ Paŭła Łatuški, što jon moža skazać pra heta.
«Jak ministr kultury, ja viedaŭ mnohich kiraŭnikoŭ bankaŭ i kantaktavaŭ ź imi: z Babarykam, Kałaŭram, Kaściučenkam, Maciušeŭskim i mnohimi inšymi. Što ja mahu być u ich śpisach kantaktaŭ — adnaznačna. Ale paśla 2020 hoda ja z Kaściučenkam nie kamunikavaŭ», — skazaŭ Łatuška, dapuściŭšy, što heta ŭkidy śpiecsłužbaŭ.
«U lubym vypadku, tut dadałosia niešta asabistaje, bo Łukašenka Kaściučenku viedaje vielmi daŭno, heta vielmi pavažanaja fihura ŭ Biełarusi. Kali ŭ razhar bankaŭskaha kryzisu sadžajuć kiraŭnika adnaho z samych ustojlivych bankaŭ, to tut adčuvajecca, što sprava nie va ŭchileńni ad padatkaŭ», — ličyć naš surazmoŭca sa śfiery.
U roznyja hody rejtynh «Ježiednievnika» staviŭ Kaściučenku ŭ lik dvaccaci samych upłyvovych biznesoŭcaŭ krainy.
Svoj Pryjorbank 56-hadovy ŭradženiec Višnieva Vałožynskaha rajona Siarhiej Kaściučenka stvaryŭ u 1989 hodzie. Bank staŭ adnym ź lidaraŭ bankaŭskaj śfiery Biełarusi, dolu ŭ im vykupiŭ aŭstryjski Rajfajzen.
Kaściučenka ličycca chrosnym baćkam mnohich dziaržaŭnych i pryvatnych biznesaŭ, jakim davaŭ hrošy na raźvićcio, majučy talent vyjaŭlać tyja prajekty, jakija adnaznačna strelać.
Sudzili Kaściučenku ŭ Minskim haradskim sudzie pa 243 artykule KK u č.2 staroj redakcyi i č. 1 novaj redakcyi.
Sudździa — Śviatłana Bandarenka.
Viadoma, što pa spravie taksama prachodziŭ biznesmien Alaksandr Mukavozčyk i fihuravali kampanii «Vebpej» i «Bajtechsiervis».
Źviazacca z aŭtaram i dapoŭnić temu možna naŭprost praz telehram @artsiom_harbatsevich ci mejł [email protected]
«Naša Niva» — bastyjon biełaruščyny
PADTRYMAĆPamior dzied Koli Łukašenki — były viazień HUŁAHa, asudžany za dapamohu «banderaŭcam»2
Kamientary