Arastovič pra pieršy dzień vajny: U tym, što nam u Ofisie kaniec, ja nie sumniavaŭsia ni siekundy
Pra toje, kali zrazumieŭ, što vajna z Rasijaj niepaźbiežnaja, jakuju infarmacyju pra pačatak rasijskaj ahresii davali raźviedki, jakim byŭ jaho pieršy dzień vajny, u intervju Dźmitryju Hardonu raspavioŭ daradca kiraŭnika Ofisa prezidenta Ukrainy Alaksiej Arastovič.
Vajna z Rasijaj była niepaźbiežnaja
Arastovič kaža, što, jak vajskoviec, razumieŭ, što vajna z Rasijaj była niepaźbiežnaja. Jak tolki rasijanie pačali ŭ 2016 hodzie stacyjanarnaje bazavańnie na paŭnočnych miežach, pačali stvarać udarnyja armii, «usio było zrazumieła». Arastovič raspaviadaje, što punkty pastajannaj dysłakacyi rasijanie pastavili za 40—60 km ad ukrainskaj miažy. A palihony — za 12—15 km.
«Jany chacieli, kab my pryvykali da strelbaŭ i pierakidki vojskaŭ u naš bok miažy, źnižali stupień hatoŭnaści. Jany rychtavali nas da taho, kab stała normaj da 80 tysiač rasijskich vojskaŭ la našych miežaŭ».
Taksama, pavodle infarmacyi Arastoviča, rasijanie ŭ Biełarusi stali zastavacca na pastajannaj asnovie pad vyhladam ratacyj. «Taksama pryvučeńnie było».
Rasijanie pravodzili maštabnyja vučeńni ź pierakidvańniem vojskaŭ z Dalokaha Uschodu. «Sajuz nie časta pravodziŭ vučeńni takoha maštabu».
Taksama Arastovič pryvodzić jak prykmietu militaryzacyi Rasii adradžeńnie inžynierna-pantonnych čaściej.
«Pieršaje, što zrabiŭ Harbačoŭ, kali pačałasia razradka, jon skaraciŭ pantonnyja bryhady — heta było hałoŭnaj prykmietaj miralubnaści Savieckaha Sajuza. Tamu što vajna na jeŭrapiejskim teatry dziejańniaŭ — heta kožnyja 20 km farsiravańnie vodnaj pieraškody».
Adradžeńnie hetych čaściej paśla Miunchienskaj pramovy Pucina było prykmietaj nastupalnaj daktryny Rasii. «I pieršaje, kudy jon ich kinuŭ, — ukrainski i biełaruski kirunki». Pa sumie hetych prykmiet była vidavočnaj padrychtoŭka Rasii da vajny.
Pavodle Arastoviča, daktrynu ab pahłynańni Ukrainy Rasija pryniała ŭ lipieni 2005 hoda. «Ich napałochaŭ Majdan».
Rasija prystupiła da ŭzmacnieńnia svajho ŭpłyvu va Ukrainie, pavieličeńnia zaležnaści jaje ad Rasii, ukaranieńnia ahientury. Byli zadziejničanyja ŭsie śfiery ekanomiki, miedyja, dypłamatyja, siłaviki. «Jany vielmi hruntoŭna padrychtavalisia».
Padčas druhoha Majdanu pačynajecca vajennaja ahresija ŭ dačynieńni da Ukrainy. Va Ukrainie ž tady, kaža Arastovič, ministr abarony — hramadzianin Rasii, kiraŭnik SBU — hramadzianin Rasii, kiraŭnik MUS — hramadzianin Rasii.
«Heta ŭnikalnaja apieracyja. U historyi suśvietnaj ja nie mahu zhadać, dzie b takaja kompleksnaja apieracyja była praviedzienaja».
Novaje ŭvarvańnie
Arastovič kaža, što kančatkova zrazumieŭ, što ŭvarvańnie Rasii va Ukrainu budzie, u kancy kastryčnika 2021 hoda.
Pry hetym, pa słovach Arastoviča, dakładnaja data pastajanna zrušvałasia.
«Užo byŭ viadomy pieršy termin hatoŭnaści — 26 śniežnia, na katalickaje Rastvo. Ale jany nie paśpieli z-za rasijskaha razhildziajstva. Nastupnaja data hatoŭnaści ŭ ich była 12 studzienia, na Stary Novy hod. Nie paśpieli. Nastupnaja data była 16 lutaha, jany ceły miesiac dali na padrychtoŭku. Ale kitajcy zabaranili — 12 lutaha Alimpijada pačałasia, skazali nie, nie psujcie Alimpijadu. Potym — zakryćcio Alimpijady. 22-ha pavinny byli napadać. Ale 23 lutaha ž, jany jaho adśviatkavali, i 24 z ranicy jany napadajuć», — raspavioŭ Arastovič.
Prezidenta Ukrainy časta abvinavačvajuć u tym, što jon nie nadavaŭ značeńnia infarmacyi raźviedak pra toje, što vajna budzie, kraina nie viała nieabchodnuju padrychtoŭku da vajny.
Arastovič kaža, što heta nie tak. Pavodle jaho infarmacyi, roznyja raźviedki adnaznačna aceńvali, što budzie abvastreńnie. Ale scenaryi hetaha byli roznymi. Adny kazali, što jano budzie na Danbasie i na Krymskim pierašyjku. A chtości kazaŭ pra scenaryj poŭnamaštabnaha ŭvarvańnia.
«Najbolš poŭny scenaryj uvarvańnia daŭ Budanaŭ, vajennaja vyviedka Ukrainy. Jon daŭ poŭny raskład z usimi scenaryjami, i daŭ bolš, čym zachodnija vyviedki», — skazaŭ Alaksiej Arastovič.
Arastovič nazyvaje abvinavačvańni ŭ tym, što Ukraina nie rychtavałasia da vajny, niespraviadlivymi. Kali b nie rychtavalisia, nie mahli b 6 miesiacaŭ supraćstajać bolšamu pa siłach sapierniku.
«My viedali, my rychtavalisia. Kali b my nie praviali hetuju padrychtoŭku, my b šosty miesiac nie vajavali paśpiachova.
Niehatovaja dziaržava nie moža zmahacca šeść miesiacaŭ suprać padrychtavanaha praciŭnika. Akramia taho, u siaredzinie śniežnia pačalisia vučeńni, jakija na samaj spravie byli schavanym razhortvańniem ukrainskich uzbrojenych sił», — zajaviŭ Arastovič.
Pavodle jaho słoŭ, usia ŭkrainskaja avijacyja vyjšła z-pad udaru 24 lutaha, usia ŭkrainskaja SPA, akramia Chiersonskaj vobłaści; u pieršym ža pavietranym bai za Kijeŭ źbili 7 samalotaŭ praciŭnika za 11 chvilin.
«Usie chočuć, kab my byli jak Izrail, a ja kažu, a ŭ nas ekanomika jak u Izraili?» — dadaŭ jon.
Što adčuŭ u dzień pačatku vajny
Arastovič kaža, što za siabie nie chvalavaŭsia «pa adnoj prostaj pryčynie: ja nie vieryŭ, što ja vyžyvu. Ja kali bačyŭ paviedamleńni: 1200 adzinak techniki, 800 adzinak techniki, adnačasovy pralot 40 viertalotaŭ, adnačasovy pralot 50 viertalotaŭ, ja bačyŭ, što dziejecca ŭ Hastomieli, ja razumieŭ — nam kaniec na praciahu 12 hadzin. Ja kali padymaŭsia na trybunu, ja byŭ upeŭnieny, što mianie rasstralajuć na praciahu 12 hadzin».
Pa słovach Arastoviča, jon ličyŭ, što Zachodnija vobłaści vystajać, tracinu Ukrainy ŭdasca zachavać. Kijevu jon davaŭ dva tydni vuličnych bajoŭ, a potym padzieńnie. «U tym, što nam u Ofisie kaniec, ja nie sumniavaŭsia ni siekundy», — kaža jon.
Što było ŭ Ofisie ŭ pieršy dzień
Paniki nie było, kaža Arastovič. «Prezident byŭ na kazackim drajvie. Usie ŭśmichalisia. Usie na ździŭleńnie mierna i spakojna pracavali». Išła evakuacyja sakretnaj dakumientacyi i sakretnaha abstalavańnia. Zialenski adpuskaŭ supracoŭnikaŭ vyvieźci baćkoŭ z Kijeva. Usie viarnulisia. «Vyjechać z akružanaha horada, a potym tudy viarnucca, patrebnaja mužnaść».
Supracoŭniki Ofisa atrymali zbroju, broniekamizelki. Padrychtavalisia da boju, «dyviersanty ŭžo pajšli pa horadzie».
Śpiecyjalisty, kaža Arastovič, aceńvali pa aktyŭnaści najaŭnaść u Kijevie ad 300 da 1600 dyviersantaŭ. Da ich dałučalisia «śpiačyja» miascovyja jačejki.
Kala Ofisa taksama była stralba. «Uviečary błok-pasty vakoł Ofisa ŭstupili ŭ boj ź nieviadomymi. My pastajali z aŭtamatami kala voknaŭ razam z achovaj. Nam ničoha nie pryjšłosia rabić, tamu što tam adbilisia. I ŭ hety čas Zialenski kaža, ja vyjdu na vulicu, bo ŭkinuli čarhovy raz, što jon ci źbieh, ci zabity, što ofis abstralali. Zrabili hetaje fota znakamitaje. Tam jašče parachavy dym stajaŭ kala ofisa. Achova pabialeła, pasivieła».
Arastovič kaža, što razam z kamandaj uhavorvaŭ Zialenskaha evakujavacca. Bo kamuści treba było kamandavać abaronaj Ukrainy. «A tut nam zastałosia kamandavać niekalki hadzin, nam kaniec. My naŭprost skazali: nam kaniec», — raspaviadaje Arastovič.
Zialenski adkazaŭ: što b ni adbyłosia, my zastajomsia.
A na druhija sutki ŭžo partniory prapanoŭvali evakujavać jaho. «I jon skazaŭ znakamituju frazu: mnie treba nie taksi, a zbroja».
«Heta tonki momant. Jon zrazumieŭ, što nielha hetaha rabić, tamu što źbiahaje hałoŭnaja asoba — poŭnaja demaralizacyja. Jon adčuŭ hetuju adkaznaść i zabaraniŭ navat razmaŭlać na hetyja temy», — kaža Arastovič.
Kali skončycca vajna
Pavodle mierkavańnia Arastoviča, vajna praciahniecca «jak minimum da novaha hoda». Ale «heta moža być doŭhaja historyja, naprykład, da nastupnaha leta, kali havorka idzie pra poŭnaje vyzvaleńnie ŭkrainskaj terytoryi», — kaža Arastovič.
Ci hatovaja Rasija da pieramovaŭ? Rasijskija ŭłady vielmi chočuć pieramovaŭ, ličyć Arastovič. Na jakich umovach? Rasija choča niejtralny status Ukrainy (nieŭstupleńnie ŭ NATO), Krym, Danbas i źniaćcie sankcyj. «Źnimicie sankcyi, kab my dobra padrychtavalisia i znoŭ napali». Pavodle Arastoviča, Zialenski «nikoli na heta pojdzie».
Braty-bliźniaty pryjšli pracavać u milicyju. Adzin ź ich pierapłyŭ raku i ŭciok ź Biełarusi, kab nie zajmacca palityčnymi spravami. Pahutaryli ź im1212
Kamientary