«U ramkach adpracoŭki rajony lezuć nie tudy!» BYPOL apublikavaŭ źlivy pieramoŭ ekanamičnaj milicyi
Inicyjatyva byłych siłavikoŭ «Bajpoł» vypuściła videa pra toje, jak niazhodnych z uładaj pradprymalnikaŭ apracoŭvaje Hałoŭnaje ŭpraŭleńnie pa baraćbie z ekanamičnymi złačynstvami. Cikava, što pad začystku časam traplajuć navat svaje.
Supracoŭniki vyjavili typahrafiju, jakaja nibyta drukavała bieła-čyrvona-biełuju simvoliku. Pastavili kiraŭnika typahrafii na prasłušku, a paśla na zatrymańnie adpravili desant z 15 čałaviek — 10 z Hałoŭnaha ŭpraŭleńnia pa baraćbie z ekanamičnymi złačynstvami (HUBEZ) i 5 amapaŭcaŭ.
Ale akazałasia, što typahrafija vypuskała čyrvona-zialonuju simvoliku.
«Jany jak skazali? Jość simvolika? Tak. Tolki jany mieli na ŭvazie čyrvona-zialonuju»,
— aburaŭsia pa telefonie adzin z supracoŭnikaŭ HUBEZ, mierkavana, namieśnik načalnika Andrej Makaruk, što ničoha «bečebešnaha» pry ahladzie nie znajšli.
Jak vynikaje sa źlitych razmovaŭ, časam zanadta impetnyja supracoŭniki pačynajuć cikavicca tymi arhanizacyjami, jakija «pad patranažam» dziaržavy.
Adzin z supracoŭnikaŭ, mierkavana, namieśnik načalnika HUBEZ Valeryj Bałabujeŭ, pierakazvaŭ słovy kiraŭnictva (ministra ŭnutranych spraŭ Ivana Kubrakova) svajmu kalehu:
«Jon skazaŭ tak. Pieršaje, što vyklikaje, skažam tak, zaniepakojenaść. Što ŭ ramkach adpracoŭki hetych voś momantaŭ rajony lezuć nie tudy! I iduć da tych, chto naohuł nie maje nijakaha dyčynieńnia da hetaha. Ty ž razumieješ, što majecca na ŭvazie — pad šumok iduć, pačynajuć vytrasać usich zapar».
«Jon uvažliva prahartaŭ usie śpisy, vielmi ździviŭsia najaŭnaści ŭ ich «TabakInviesta», «Lenty» i inšaje. Nu pakažycie mnie, što «Lenta» šyje takija ściahi, — praciahvaje siłavik. — I skazaŭ, što takim ahulnym «čocham» adpracoŭka ŭsiaho — heta jość nieracyjanalnaje vykarystańnie sił i srodkaŭ, tamu nam treba zasiarodzić namahańni na typahrafijach.
Nu i druhoje pytańnie, na što horadu treba akcentavać uvahu, heta finansavańnie apazicyi. Toje samaje dalej: apłata štrafaŭ, pasłuh advakata, niejkaja dapamoha».
Praz peŭny čas padpałkoŭnika milicyi Makaruka, niahledziačy na jaho addanaść, nie prasunuli pa słužbie. Centralnaja atestacyjnaja kamisija adchiliła jaho kandydaturu na padstavie dakłada Hałoŭnaha ŭpraŭleńnia ŭłasnaj biaśpieki MUS.
«Rubanuli. Skazali, nie dastojny», — žaliŭsia mierkavany Makaruk inšamu kalezie.
HUBEZ maje dačynieńnie i da vobšukaŭ u biełaruskamoŭnaj kniharni Andreja Januškieviča, paviedamlaje «Bajpoł».
Filipienka raskazaŭ, ad kolkich svaich knih admoviŭsia b i čamu pradaŭ «Tesłu»2
Kamientary