U Kazachstanie byli rašuča nastrojenyja adstralać kala miljona sajhakaŭ, ale žyvioły schavalisia ŭ Rasii
Kazachstan padvioŭ vyniki sprobaŭ skaracić kolkaść sajhakaŭ, ale płan faktyčna pravaliŭsia. Zamiest zapłanavanaha istotnaha źmianšeńnia papulacyi značnaja častka žyvioł prosta mihravała ŭ Rasiju, uciakajučy ad masavych adstrełaŭ, paviedamlaje RTVI.
Pavodle płana, z 1 lipienia da 1 śniežnia Kazachstan pavinien byŭ źnizić pahałoŭje sajhakaŭ prykładna na 20% — adstralać kala 800 tysiač asobin. Adnak na praktycy było «vyniata» tolki kala 200 tysiač žyvioł, što składaje prykładna čverć ad zapłanavanaha.
Heta nie akazała istotnaha ŭpłyvu na ahulnuju kolkaść: u 2025 hodzie papulacyja dasiahnuła rekordnych 4 miljonaŭ, a ŭ 2026-m, pavodle prahnozaŭ, vyraście jašče na miljon — da 5 miljonaŭ asobin.
Ministr ekałohii i pryrodnych resursaŭ Kazachstana Jarłan Nysanbajeŭ paviedamiŭ, što adstreł vioŭsia zhodna z navukovymi rekamiendacyjami, a tušy pieradavalisia na miasapierapracoŭčyja pradpryjemstvy.
Pry hetym jon pryznaŭ, što značnaja častka sajhakaŭ z pačatkam kampanii adyšła ŭ inšyja rehijony, u tym liku na terytoryju Rasii, asabliva ŭ pryhraničnyja rajony.
Prablema sajhakaŭ vostra staić jak u Kazachstanie, tak i ŭ Rasii: vializnyja statki viasnoj i letam mihrujuć praź miežy, dratujuć pali i źniščajuć pasievy, nanosiačy vialikija straty fiermieram. Asabliva ciarpiać ad hetaha Zachodnie-Kazachstanskaja vobłaść i rasijskija rehijony, u tym liku Sarataŭskaja vobłaść.
Adna z klučavych pryčyn niaŭdačy prahramy — adsutnaść vyraznaha razumieńnia, što rabić z adstralanymi žyviołami. Prablemy ź pierapracoŭkaj, utylizacyjaj, a taksama strohija mižnarodnyja abmiežavańni na handal rahami sajhaka značna źnizili zacikaŭlenaść biznesu. Tolki ŭ śniežni 2025 hoda na kanfierencyi CITES va ŭźbiekskim Samarkandzie Kazachstan atrymaŭ dazvoł na abmiežavany i stroha kantralavany handal rahami, ale heta nie aznačaje imhniennaha adkryćcia ekspartu.
Ekśpierty adznačajuć, što aptymalnaja kolkaść sajhakaŭ dla terytoryi Kazachstana — kala 800—900 tysiač asobin. Siońniašniaja papulacyja pieravyšaje hety ŭzrovień bolš čym utraja, što pahražaje dehradacyjaj ekasistem, rostam sacyjalnaj napružanaści ŭ sielskich rajonach i mahčymymi ŭspyškami epidemij jak siarod žyvioł, tak i siarod ludziej.
Na hety momant ułady Kazachstana faktyčna zachavali status-kvo: prablemu pryznali, ale efiektyŭnaha miechanizma jaje vyrašeńnia pakul nie raspracavali. U 2026 hodzie ŭradu daručana padrychtavać novuju stratehiju «ŭstojlivaha kiravańnia» papulacyjaj sajhakaŭ.
Ciapier čytajuć
Biełaruska nabiła na ciele partrety Łukašenki i jaho synoŭ, Umki, Pucina dy Si Czińpina17
Kamientary
Eto vam nie na donietčinie nastupať,tut opyt nužien.
- "... dzie ž ciabie mnie pachavaci?"
- "... nie łažycie ŭskraj darahi -
dratavaci buduć nohi..."
Pisaŭ chtości ź biełaruskich savieckich paetaŭ. Ale chto, jak i bolš dasłoŭna, zaraz nie mahu ŭspomnić.