Tanki, piknik i parad rusałak. Jak śviatkujuć Dzień horada ŭ Minsku, a jak — u Varšavie dy Vilni?
10 vieraśnia ŭ Minsku adznačajuć Dzień horada. Śviata heta nie ŭnikalnaje: anałahičnyja imprezy arhanizujuć i ŭ inšych krainach, u tym liku ŭ susiednich. Paraŭnali sioletnija prahramy.
Minsk: kibier-turniry, biełaruskaja kuchnia i Dzień tankista
Na hetych vychadnych minčukam abiacajuć śviatočny kirmaš la Pałaca sportu. Buduć i kancerty: naprykład, impreza la taho ž Pałaca sportu ŭviečary 10 vieraśnia, dzie vystupiać hurty «Drazdy», «Aŭra» (hety kalektyŭ viadomy svajoj praŭładnaj pazicyjaj), rasijski kalektyŭ «Korni» i Nacyjanalny akademičny arkiestr simfaničnaj i estradnaj muzyki. U svaju čarhu, na płoščy Svabody i ŭ Vierchnim horadzie vystupić hurt «Siabry».
Abiacajuć niekalki fiestyvalaŭ: pa histaryčnaj rekanstrukcyi, biełaruskaj kuchni i navucy. U Trajeckim pradmieści projdzie viernisaž, la Pałaca sportu — «Mižnarodny alimpijski dzień» ź placoŭkami pa roznych vidach sportu. Jašče čakajecca fiestyval «Minsk moładzievy» z kibier-turniram, vystupam majstroŭ ušu, fudkortam, čałaviekapadobnym robatam i fajer-šou.
Nie abydziecca na hetych vychadnych i biez Dnia tankista — projdzie jon na terytoryi muziejna-parkavaha kompleksa «Pieramoha», jašče budzie Minski paŭmarafon i fiejervierk. Narešcie, abiacajuć i rajonnyja mierapryjemstvy ŭ dadatak dla ahulnaharadskich.
Kali vy nie bačyli na svaje vočy minski dzień horada, prapanujem vam niekalki zdymkaŭ za minułyja hady, tym bolš što naŭrad ci ŭ hetym hodzie śviata budzie kardynalna inšym:
Vilnia: zorka «Jeŭrabačańnia», honačny balid i łaziernaje šou
U Vilni śviata horada prajšło tydzień tamu. Ciahnułasia jano try dni — z 2 pa 4 vieraśnia.
Uvieś hety čas na centralnaj vulicy horada, praśpiekcie Hiedymina, pracavaŭ śviatočny kirmaš ź ježaj, prysmakami i suvienirami.
Na hałoŭnaj płoščy Vilni, Kafiedralnaj, zładzili dva vialikija kancerty: na adnym ź ich vystupiŭ viadomy litoŭski śpiavak i televiadučy Maryjonas Mikutavičus, u nastupny ž dzień na toj ža scenie praśpiavała šviedka Karnelija Džejkabs, što zaniała na «Jeŭrabačańni» hetaha hoda 4 miesca.
Dla vilenčukoŭ zładzili spartovy fiestyval z parkam zabaŭ, a taksama fiestyval fudtrakaŭ «Bierah dobraj ježy». La Nacyjanalnaha dramatyčnaha teatra ŭ Vilni raźmiaścili scenu, dzie vystupili viadomyja litoŭskija piśmieńniki. Adnu z hałoŭnych vilenskich vulic, praśpiekt Kanstytucyi, pradastavili dla prajezdu honačnaha balidu «Formuły-1».
Fiejervierka, jak u Minsku, tut nie było, zatoje pakazali niešta bolš sučasnaje — łaziernaje šou pad muzyku vijałančeli, pierad jakim jašče prajšło šou dronaŭ. Byli i bolš łakalnyja mierapryjemstvy nakštałt rajonnaha piknika.
Ryha: tosty, joha i pryznańni ŭ kachańni
U łatvijskaj stalicy Dzień horada zvyčajna śviatkujuć 20 žniŭnia, ale ŭ hetym hodzie ryžanie adznačali jaho bolšuju častku leta. Usiaho arhanizatary padrychtavali 150 mierapryjemstvaŭ — siarod ich chapała kancertaŭ, chacia i bieź vialikich imionaŭ, jak u Vilni. Sceny dla kancertaŭ raźmiaścili ŭ ryžskich parkach i prosta na vulicach.
U roznych rajonach Ryhi pravodzili zaniatki pa jozie, skandynaŭskaj chadźbie i himnastycy. Łatvijskuju stalicu ŭpryhožyli śviatočnymi ściažkami, śvietłavymi hirlandami, hamakami i mastackimi abjektami.
U sam dzień naradžeńnia Ryhi, 20 žniŭnia, u horadzie ładzili kancerty na bałkonach pad muzyku Rajmanda Paŭłsa, vystupy muzykaŭ i kanatachodcaŭ. Pasiaredzinie Ratušnaj płoščy pabudavali tak zvanuju «viežu tostaŭ», na jakuju moh padniacca luby achvotny, kab pramović pažadańnie dla Ryhi ŭ jaje dzień narodzinaŭ. Što jašče? Konkurs na samy smačny ryžski tort, publičnyja pryznańni ŭ kachańni Ryzie i kamu zaŭhodna i vialiki piknik u Starym horadzie.
Varšava: rusałki, jachty i kancerty
Śviata Varšavy (Święto Warszawy) prajšło ŭ hetym hodzie 4 červienia, to-bok na hadavinu vybaraŭ 1989 hoda, jakija prynieśli zakančeńnie epochie kamunizmu ŭ Polščy. Padychod tut, jak i ŭ Ryzie, niestandartny: naprykład, u Krakaŭskim pradmieści prajšoŭ parad rusałak, što pradstavili Varšavu i niekatoryja ź jaje rajonaŭ (rusałka — adzin ź simvałaŭ Varšavy). Razam z rusałkami ŭ paradzie paŭdzielničaŭ duchavy arkiestr.
Na race Viśle adbyłasia jachciennaja rehata, biaspłatnyja bajdaračnyja spłavy. Haradžanam dali mahčymaść papłavać na łodkach i patreniravać navyki sierfinhista na SUP-doškach. Paśla rehaty — kancert na plažy.
«Naša Niva» — bastyjon biełaruščyny
PADTRYMAĆJakija maršruty pa Biełarusi byli sioleta samyja papularnyja?
Na Dzień horada prezientujuć pieršy biełaruski elektryčny sportkar
U centry Lidy źjaviŭsia murał pra kachańnie, staražytnyja plamiony i haradskuju kulturu
Što zapisana aficyjnaj pryčynaj śmierci adzinaha syna Jarmošynaj?9
Kamientary
i pad hetyja strašennyja chendmejdy, jak u Insta Imanda?