«Za košt amartyzacyi pry lizinhu mašyna vychodzić na 40% tańniej». U Biełarusi aktyvizavalisia aŭtamachlary. Pa jakoj schiemie jany pracujuć?
Na fonie niebyvałaha popytu na patrymanyja aŭto ź Jeŭropy i ZŠA aktyvizavalisia machlary, jakija prapanujuć nabyć aŭtamabili na zamovu pa składanaj, ale ŭ toj ža čas vielmi «vyhadnaj» schiemie.
Prapanujuć aŭto na 40% tańniej, čym kankurenty
Kupla aŭto na zamovu ź Jeŭropy i ZŠA — davoli zvykłaja źjava. Takija pasłuhi akazvajuć jak bujnyja kampanii, tak i drobnyja pradprymalniki. Pasiaredniki za adnosna nievialikuju ŭznaharodu (zvyčajna 800-1500 rubloŭ) dapamahajuć znajści mašynu za miažoj, biaruć na siabie ŭsio kłopaty, źviazanyja z padboram, apłataj i arhanizacyjaj dastaŭki ŭ Biełaruś. U niezaležnaści ad taho, praź jakoha pasiarednika vy budziecie nabyvać, finalnaja suma za adzin i toj ža aŭtamabil budzie pryblizna adnolkavaja. Ale časam vyłučajucca prapanovy kupić aŭtamabil na 40% tańniej, čym u kankurentaŭ.
Machlary prapanujuć nabyvać patrymanyja aŭtamabili ź Jeŭropy ŭ lizinh. Jany śćviarždajuć, što mienavita praz toje, što kupla adbyvajecca z vykarystańniem lizinhu, i atrymlivajecca sekanomić 40% ad realnaha koštu mašyny. Takoje źnižeńnie, pa zajaŭleńni pradaŭcoŭ, adbyvajecca za košt amartyzacyi majomaści pry lizinhu.
U rekłamnych pastach jany tak i paznačajuć, što isnuje dźvie cany na aŭtamabil: «spraviadlivaja» i «śpiecyjalnaja». Apošniaja dasiažnaja tolki pry ŭmovie kupli ŭ lizinh praź ich kampaniju. Tak, naprykład, «spraviadlivaja» cana Renault Grand Scenic 2017 hoda vypusku składaje 21 700 jeŭra, ale kali nabyvać hety aŭtamabil u lizinh, to jon abydzieca vam usiaho ŭ 13 020 jeŭra.
Ludziam, jakija viaducca na chalavu, machlary prapanujuć padpisać aficyjnuju damovu i ŭnieści pieradapłatu ŭ pamiery 30% ad koštu. Dla taho, kab padpisać damovu i ŭziać pieradapłatu, «biznesoŭcy» hatovyja pryjechać da vas u luby horad.
Jašče adna zamanucha nakiravanaja na toje, kab pryciahnuć jak maha bolej klijentaŭ — termin dastaŭki. Takija pasiaredniki śćviardžajuć, što dastaŭka aŭto z Hiermanii da Biełarusi zajmaje ŭsiaho kala 7 dzion, kali inšyja pradaŭcy zvyčajna ahučvajuć terminy ad dvuch tydniaŭ da miesiaca.
Niahledziačy na toje, što ŭsia apisanaja schiema vyhladaje dziŭna, pad pastami ab prodažy aŭto pa fantastyčnych cenach chapaje kamientaroŭ ad karystalnikaŭ, jakija, pa ŭsioj bačnaści, zacikavilisia prapanovaj.
Da niekatorych z kamientataraŭ paśla praciahłaj pierapiski dachodzić, što heta niejki razvod. Adzin z takich karystalnikaŭ adznačyŭ, što ŭžo dva miesiacy namahajecca nabyć anałahičny aŭtamabil na aŭkcyjonie, ale navat blizka nie bačyć tych cen, za jakija machlary hatovyja pryhnać padobnuju madel pad kluč.
Kali niechta z patencyjnych klijentaŭ pytajecca, čamu jany prapanujuć aŭtamabili pa cenach, značna nižejšych za rynkavyja, machlary praciahvajuć raspaviadać pra toje, što takija ceny dasiahajucca vyklučna za košt lizinhavaj amartyzacyi.
Praanalizavaŭšy pasty, jakija machlary raźmiaščali ŭ Instagram, možna pryjści da vysnovy, što jany i blizka nie raźbirajucca ŭ niuansach aŭtamabilnaha biznesu. Siarod prapanoŭ jość šerah davoli starych mašyn, adna tolki razmytnioŭka jakich abydziecca daražej, čym cana, za jakuju prapanujuć pryvieźci taki aŭtamabil pad kluč.
Na momant padrychtoŭki materyjału kamientavańnie dopisaŭ taho akaŭnta ŭžo było abmiežavana, a apošni post byŭ apublikavany 16 žniŭnia (pieršyja dopis źjaviŭsia jašče 30 traŭnia). Na paviedamleńni ŭ Dyrekt pradaŭcy taksama bolš nie adkazvajuć.
Adzin z čytačoŭ «Naša Nivy», jaki ledź nie nabyŭ aŭto ŭ machlaroŭ, apošni raz kamunikavaŭ ź imi ŭ pieršaj pałovie žniŭnia.
Tady jany prapanavali jamu ŭnieści pieradapłatu ŭ pamiery 30% ad koštu abranaha varyjanta.
Jašče 69% ad sumy treba było zapłacić paśla atrymańnia aŭto, a 1%, jaki zastaŭsia, prapanoŭvałasia vypłočvać u toj samy lizinh ciaham 48 miesiacaŭ.
U pryvatnaj pierapiscy machlary dasyłali kantaktny numar telefona, jaki ciapier niedastupny. Nijakich miesiendžaraŭ na im taksama nie zarehistravana.
Nie novaja źjava
Historyi pra anałahičnyja vypadki źjaŭlalisia ŭ ŚMI i raniej. U schiemie, jakuju letaś raskryli žurnalisty, taksama fihuravaŭ lizinh, za košt jakoha nibyta źjaŭlałasia mahčymaść nabyvać aŭto z ekanomijaj u 30-40 adsotkaŭ. U raniej apisanych vypadkach niekatoryja machlary navat brali 100% pieradapłatu za aŭto. Naturalna, ludzi, jakija źviazalisia z machlarami, nijakich mašyn u vyniku nie atrymlivali.
Čytajcie taksama: «Kažuć pra 10-15 tysiač dalaraŭ, a padstaŭlajuć na 50-100». Šeryja imparciory aŭto, ilhotniki i amal nijakaj harantyi
«Jana nie ŭ turmie, a na śpiecdačy KDB!» Kanśpirołahi nakinulisia na Kaleśnikavu3
Kamientary