Vajskovy bilet, znojdzieny ŭ pałonnaha paŭnočnakarejca, vypisany na realnaha tuvinca
Padrobleny vajskovy bilet, jaki vyjavili ŭ vajskoŭca KNDR, uziataha ŭkraincami ŭ pałon u Kurskaj vobłaści, vypisany na imia realnaha žychara rasijskaj Respubliki Tyva, daviedałasia rasijskaje vydańnie «Ahientstvo».
U adnaho z dvuch uziatych ukraincami ŭ pałon vajskoŭcaŭ KNDR, pra jakich stała viadoma 11 studzienia, byŭ znojdzieny vajskovy bilet na imia žychara Tyvy Antanina Arančyna, jaki naradziŭsia ŭ kastryčniku 1998 hoda.
U dakumiencie paznačana miesca naradžeńnia hetaha čałavieka (horad Turan u Tyvie) i hramadzianskaja śpiecyjalnaść (kraviec). Fatahrafii, daty i podpisa ŭładalnika ŭ vajskovym bilecie niama.
Analiz «Ahientstva» pakazaŭ, što dla stvareńnia fejkavaj asoby byli vykarystanyja źviestki realnaha hramadzianina Rasii. Vydańnie znajšło žychara Tyvy z tymi ž samymi proźviščam, imieniem, imieniem pa baćku i dataj naradžeńnia. Z takimi danymi ŭ Rasii žyvie tolki adzin čałaviek.
Adzinaje adroźnieńnie ŭ asabistych danych — miesca naradžeńnia: u vajskovym bilecie paznačany horad Turan, a ŭ pašparcie Arančyna — vioska Erzin (taksama raźmieščanaja ŭ Tyvie). Nijakaj suviazi Arančyna z kravieckaj spravaj znajści taksama nie ŭdałosia.
U 2020 hodzie Arančyn pracavaŭ u Tech-Chiemskim laśnictvie (pasada nie paznačanaja). U 2023 hodzie ŭ zajaŭcy na mikrapazyku jon paznačyŭ, što pracuje achoŭnikam u hastranomie, a ŭ inšych zajaŭkach taho ž hoda — što jon piensijanier. U mikrapazykach jamu nieadnarazova admaŭlali paśla acenki płaciežazdolnaści. Apošniaja zajaŭka na mikrapazyku (7 tysiač rasijskich rubloŭ), jakuju pakinuŭ Arančyn i jakaja trapiła ŭ ahulny dostup, datujecca 24 lutaha 2024 hoda.
«Ahientstvo» nie zmahło dazvanicca da Arančyna pa telefonach, paznačanych u źlitych źviestkach. Taksama nie ŭdałosia dazvanicca da jahonaj siastry, jakaja žyvie ŭ Tyvie. Na staronki ŭ VK, jakija ŭdałosia znajści «Ahienctvu», ni sam Arančyn, ni jahonaja siastra nie zachodzili bolš za 10 hadoŭ.
Raniej vajskovyja bilety, vydadzienyja na imia žycharoŭ Tyvy, užo znachodzili ŭ zabitych u Kurskaj vobłaści vajskoŭcaŭ, jakich Ukraina identyfikavała jak paŭnočnakarejcaŭ.
U kancy śniežnia siły śpiecyjalnych apieracyj USU publikavali fatahrafii troch vajskovych biletaŭ. U dakumientach było napisana, što jany naležali žycharam Tyvy ź imionami Kim Kan Sałat Albiertavič, Danhak Džan Surapavič i Bielek Ahanak Kap-aałavič.
Pra toje, što Rasija vydaje vajskoŭcam, jakija prybyvajuć z KNDR, padroblenyja dakumienty, paŭdniovakarejskaja raźviedka ŭpieršyniu paviedamiła ŭ kastryčniku.
Ciapier čytajuć
«U takuju ž haleču, dy jašče i chałodnuju, pakistancy nie pajeduć». Biełarus piać tydniaŭ pravioŭ u Pakistanie — voś što jaho ŭraziła27
Kamientary