18-hadovy hrodzieniec admoviŭsia prymać vajskovuju prysiahu

Paśla pryzyvu Artur daviedaŭsia, što pastupiŭ u VNU na biudžetnuju formu navučańnia i spadziajecca, što jaho viernuć na vučobu. Da navabranca prystavili achovu, kab nie źbieh na lekcyi.

18-hadovy navabraniec z Hrodna admoviŭsia prymać vajskovuju prysiahu. Paśla pryzyvu jon daviedaŭsia, što pastupiŭ u ahrarny univiersitet na biudžetnuju formu navučańnia i spadziajecca, što jaho viernuć u alma-mater. U redakcyi jahonaja maci, Maryja Antonaŭna, raspaviała, što za admovu syna pieraviali na ciažkija pracy ŭ trysta siomuju asobnuju čyhunačnuju bryhadu ŭ Słuck.

Zamiest aŭtamata chłopcu vydali rydloŭku, jakoj jon aruduje zranku da viečara, chacia z zadavalnieńniem pamianiaŭ by jaje na knihi i kanśpiekty.

«Niadaŭna da jaho prystavili achovu, kab nie dezierciravaŭ: bajacca, što ŭciače na lekcyi, bo va univiersitecie jaho pavinny adličyć 1 kastryčnika za toje, što na praciahu miesiaca nie źjaŭlaŭsia na zaniatki», – raspaviadaje Maryja Antonaŭna. Žančyna ličyć, što syna zabrali ŭ vojska niezakonna. «Pastupleńnie ŭ VNU było dla Artura sensam žyćcia», – tłumačyć jana. U pošukach praŭdy źviartałasia ŭ vajennuju i hienieralnuju prakuratury, Ministerstva abarony, ale razumieńnia nidzie nie znajšła.

Hruzčyk ź viedańniem bijałohii

U vajenkamat Artura vyklikali 21 lipienia. Paviedamili, što jamu treba zvolnicca z pracy i na nastupny dzień źjavicca z rečami na pryzyŭny punkt. Chłopiec umalaŭ vajskoŭcaŭ uvajści ŭ jahonaje stanovišča i pačakać dzieviać dzion, pakul stanuć viadomyja vyniki zaličeńnia studentaŭ u Hrodzienski ahrarny univiersitet. Pakazvaŭ dakumient, jaki paćviardžaŭ jahony ŭdzieł va ŭstupnaj kampanii. Tłumačyŭ, što čakaje stanoŭčaha vyniku. I nie vypadkova: kab dobra zdać teksty, za knihami jon prasiedzieŭ nie adnu noč.

Pa ironii losu, u minułym hodzie Artur sprabavaŭ pastupić na vajenna-miedycynski fakultet u Biełaruski dziaržaŭny miedycynski univiersitet, ale nie dabraŭ bałaŭ. Kab dapuścili da pastupleńnia, niekalki razoŭ prachodziŭ miedycynskuju kamisiju.

– Uładkavaŭsia hruzčykam, kab mnie dapamahčy. Ja ž adna haduju dvuch dzietak. Paśla źmieny da dźviuch nočy vučyŭ. Jon mianie prosić: «Mama, najmi mnie repietytara». A dzie ja hrošaj vaźmu? Supakojvała jaho, maŭlaŭ, i tak, synok, pastupiš.

Vyšejšaja adukacyja dla jaho – heta vielmi važna, jon razumieŭ što tolki tak zmoža vybicca ŭ ludzi, – sa ślazami na vačoch raspaviadaje Maryja Antonaŭna.

Toje, što Artur zaŭsiody byŭ naceleny na pastupleńnie va univiersitet, paćviardžaje jahony były kłasny kiraŭnik, namieśnik dyrektara škoły pa vučebnaj rabocie siaredniaj škoły №33 Anžeła Panasievič:

– Artur vučyŭsia ŭ kłasie z chimika-bijałahičnym napramkam. Ja b nie skazała, što ŭ jaho byli cudoŭnyja pośpiechi, ale jon dobrasumlenny i staranny. Viedaŭ, što spadziavacca moža tolki na siabie. Mama adna haduje jaho i brata, žyvuć u internacie. Na jaho nikoli nie było narakańniaŭ, ścipły chłopiec.

Tajna miedkamisii

Jak patłumačyŭ vajenny kamisar Hrodzienskaha haradskoha vajennaha kamisaryjatu Siarhiej Aročka, Artura pryzvali ŭ vojska pa zakonie: pa ŭzroście i jak atrymaŭšaha prafiesiju vajenny kamisaryjat. Uvosień minułaha hoda chłopiec prajšoŭ biaspłatnaje navučańnie ŭ hrodzienskaj aŭtaškole DASAAF i atrymaŭ pravy kiroŭcy katehoryi V i S.

Biaspłatnaje navučańnie prapanujecca maładym ludziam pryzyŭnoha ŭzrostu pa prahramie padrychtoŭki kiroŭcaŭ dla voinskich farmavańniaŭ. Kožny, chto choča vučycca, piša zajavu pra toje, što nie źbirajecca da prachodžańnie słužby kudyści pastupać.

– Ministerstva abarony apłaciła jamu navučańnie, a košt kursaŭ pieravyšaje dva miljony rubloŭ, i jon pavinien u adpaviednaści z zakanadaŭstvam vykanać svoj abajazak i prajści słužbu pa nabytaj śpiecyjalnaści, – patłumačyŭ Siarhiej Aročka.

Atrymlivajecca, chłopiec zabyŭsia pra abaviazalnictva? Jon ža raśpisaŭsia pad admovaj u pastupleńni. «Usio było spantanna: Artura terminova vyklikali ŭ kamisaryjat, kali jon znachodziŭsia ŭ vioscy ŭ babuli, skazali, kab jon išoŭ vučycca na kiroŭcu, byccam by hrupa ŭžo tydzień zajmajecca. Napeŭna, u ich nie zapała ludziej, a pra nastupstvy hetaha kroku jaho nie papiaredzili», – raspaviadaje Maryja Antonaŭna.

Jak patłumačyŭ vykładčyk UP PUP «Hrodzienskaja aŭtamabilnaja škoła» DASAAF Uładzimir Vasilonak, štohod pa prahramie padrychtoŭki kiroŭcaŭ dla vojska navučajecca kala sta kursantaŭ pryzyŭnoha ŭzrostu. Prapanujuć zajmacca tym, chto mocny fizična i intelektualna raźvity.

Z płakatam «SOS»

Pałkoŭnik Siarhiej Aročka kaža, što i biez navučańnia Artur, jaki dasiahnuŭ paŭnalećcia ŭ śniežni, padlahaŭ ciapierašniamu pryzyvu i prava na adterminoŭku nie mieŭ. Akazałasia, kali b Artur nie pajšoŭ vučycca na kiroŭcu, a zapisaŭsia b na padrychtoŭčaje adździaleńnie pry VNU, to moh by raźličvać na adterminoŭku na hety hod.

Takoje prava daje pryzyŭnikam art. 32 Zakona RB «Pra voinski abaviazak i voinskuju słužbu». Ale padkazać Arturu, što jamu rabić, vidać, nie było kamu.

U ahrarnym univiersitecie mamu Artura zapeŭnili, što syna, jak adličanaha ŭ suviazi z pryzyvam u vojska, adnoviać na pieršy kurs taho ž fakultetu adrazu paśla słužby. Heta praduhledžana «Pałažeńniem ab paradku i ŭmovach adnaŭleńnia studentaŭ, adličanych z vyšejšych navučalnych ustanoŭ», zaćvierdžanym pastanovaj Saŭminu №17. Ale žančyna ŭžo nikomu nie vieryć. Da taho ž jaje biantežyć punkt, u jakim prapisana, što pracedura adnaŭleńnia mahčymaja pry najaŭnaści volnych miescaŭ. Ci znojdziecca jano dla Artura praz dva hady?

Maryja Antonaŭna vyrašyła nie čakać i źbirajecca zmahacca dalej. Žančyna starajecca pryciahnuć uvahu hramadskaści: padała prašeńnie ŭ Hrodzienski abłvykankam dazvolić joj 1 kastryčnika pastajać u centry horada z płakatam «SOS».

Dumka ekśpierta

Juryst jurydyčnaj kansultacyi «JurEkśpiert» Vadzim Čarapica:

– Artura pavinny adnavić u adpaviednaści z «Pałažeńniem ab paradku i ŭmovach adnaŭleńnia studentaŭ, adličanych z vyšejšych navučalnych ustanoŭ». Adnak dakumient nie daje harantyj taho, što jaho zaličać na biaspłatnuju formu navučańnia. U im prapisana, što heta mahčyma tolki pry najaŭnaści svabodnych miescaŭ.

U temu

Dazvanilisia da namieśnika kamandzira pa ideałahičnaj pracy voinskaj častki 32213 (u joj słužyć Artur) Ihara Kunceviča, kab daviedacca, jak iduć spravy ŭ hrodzienca. Jon raspavioŭ, što zaŭvah na navabranca niama, Artur vykonvaje ŭsie abaviazki i słužyć narmalna.

«Viečiernij Hrodno»

***

Apošni hučny vypadak admovy ad pryniacca vajskovaj prysiahi ŭ Biełarusi adbyŭsia 9 lutaha 2008 hodu ŭ vajskovaj častcy transpartnych vojskaŭ u Žłobinie. Homielski aktyvist Źmicier Žaleźničenka admoviŭsia prymać vajskovuju prysiahu, matyvujučy svoj učynak tym, što paličyŭ pryzyŭ u vojska niezakonnym. Pierad pryzyvam chłopca adličyli z univiersitetu.

• 0
• 0
• 0
• 0
• 0
• 0
• 0
• 0