Hienštab USU: Kali rasijanie znoŭ atakujuć Ukrainu ź Biełarusi, to metaj budzie zachodniaja miaža
Pahroza nastupleńnia Rasii na Ukrainu z boku Biełarusi raście, adnak metaj hetym razam chutčej za ŭsio budzie nie Kijeŭ. Pra heta zajaviŭ padčas bryfinhu namieśnik načalnika hałoŭnaha apieratyŭnaha ŭpraŭleńnia Hienštaba Alaksiej Hromaŭ.
Pahroza adnaŭleńnia nastupleńnia ŭzbrojenymi siłami RF na paŭnočnym froncie raście. Hetym razam kirunak nastupleńnia moža być źmienieny na zachad biełaruska-ŭkrainskaj miažy dla pierarazańnia asnoŭnych łahistyčnych arteryj pastaŭki ŭzbrajeńnia i vajskovaj techniki Ukrainie ad krain-partnioraŭ», — zajaviŭ Alaksiej Hromaŭ.
Jon adznačyŭ, što na terytoryi Biełarusi praciahvajecca razhortvańnie Uzbrojenych siłaŭ Rasii, u pryvatnaści avijacyjnych padraździaleńniaŭ. Akramia taho, u Biełarusi, pa słovach Hromava, pravodziacca mierapryjemstvy pa padrychtoŭcy da schavanaj mabilizacyi: «Respublika Biełaruś praciahvaje davać svaju terytoryju dla zapusku balistyčnych rakiet i dronaŭ. Jana raźmiaściła na svaich aeradromach samaloty MiH-31, jakija mohuć być uzbrojenyja kryłatymi rakietami».
Hromaŭ zajaviŭ, što situacyja na pamiežžy Hienštabam pastajanna adsočvajecca, prymajucca ŭsie miery, kab zabiaśpiečyć nadziejnuju abaronu dziaržaŭnaj miažy.
«U vypadku pryniaćcia praciŭnikam rašeńnia ab adkryćci tak zvanaha druhoha frontu i praviadzieńnia nastupalnych dziejańniaŭ z terytoryi Respubliki Biełaruś my budziem hatovyja adkazać adekvatna», — zapeŭniŭ Hromaŭ.
Ciapier čytajuć
Što viadoma pra eks-aficera Słužby biaśpieki Łukašenki Andreja Spasava, jakoha pasadzili za palityku1
Kamientary