«A kudy padzielisia śmietnicy ŭ Minsku?» Kamunalniki prakamientavali skarhi

«A kudy padzielisia śmietnicy ŭ Minsku? Raniej byli na kožnym rahu, litaralna pierad kožnaj ustanovaj, pierad lubym pierachodam pa dźvie. A ciapier kala prypynkaŭ, a ŭ astatnim — vielmi redka. Biełarusy, viadoma, prystojnyja i daniasuć, ale dyskamfort jość…» — padzialiŭsia karystalnik pad nikam falometov. 

Aŭtar pasta adznačyŭ, što admysłova vyvučaŭ situacyju ŭzdoŭž praśpiekta Niezaležnaści pa abodvuch bakach i praktyčna ničoha nie znajšoŭ. Śmietnicy zastalisia pieravažna kala prypynkaŭ hramadskaha transpartu.

Inšy kamientatar padzialiŭsia historyjaj, jak doŭha nios u rukach pusty kubačak z-pad kavy paśla vychadu ź mietro ŭ rajonie vakzała. Znajšlisia śmietnicy dla kurcoŭ, ale ŭ ich nie było adtulin dla zvyčajnaha śmiećcia. Adzinuju paŭnavartasnuju śmietnicu ŭdałosia znajści tolki zboku ad TRC «Galileo».

Inšyja karystalniki zaŭvažyli, što prablema źjaviłasia nie ŭčora, a prykładna 5 hadoŭ tamu. Maładyja baćki zhadvajuć, što padčas špacyraŭ z kalaskami vykinuć łupinu ad banana ci vykarystanuju survetku było niemahčyma — davodziłasia iści pałovu kvartała da bližejšaj kramy ci handlovaha centra, bo kala śviatłaforaŭ i pierachodaŭ urny prybrali ŭžo tady.

Ahulnaja vysnova, što situacyja mocna pahoršyłasia, i choć biełarusy pa pryrodzie akuratnyja i niasuć śmiećcie z saboj, heta stvaraje surjozny dyskamfort u horadzie.

Ale ŭ «Harramaŭtadory» nie pahadzilisia z krytykaj i zajavili «Minsk-Navinam», što ludziam tolki padajecca, što śmietnic mała — maŭlaŭ, kolkaść urnaŭ, jakija raźmieščany na vulicach Minska, za apošnija piać hadoŭ nie źmianšałasia. 

— Urny dla śmiećcia ŭstanaŭlivajucca ŭ miescach i kolkaści, vyznačanych prajektna-kaštarysnaj dakumientacyjaj. Pry prajektavańni miescaŭ ustanoŭki vyznačajucca z ulikam piešachodnaj dastupnaści, — kažuć śpiecyjalisty. — U vypadkach pastupleńnia prapanoŭ nakont nieabchodnaści ŭstanoŭki dadatkovych urnaŭ u kankretnych punktach abo vyjaŭleńnia prablemnych učastkaŭ ekspłuatujučymi arhanizacyjami, razhladajecca pytańnie ab metazhodnaści ich raźmiaščeńnia ŭ kožnym asobnym vypadku.

Miž tym Praviłami dobraŭparadkavańnia i ŭtrymańnia horada praduhledžana ŭstanoŭka urnaŭ dla zboru śmiećcia «na ŭvachodach u administracyjnyja i hramadskija budynki, abjekty handlu, hramadskaha charčavańnia, bytavoha absłuhoŭvańnia nasielnictva, kala inšych sacyjalna značnych abjektaŭ, na haściavych parkoŭkach uzdoŭž vulična-darožnaj sietki, u parkach i skvierach». Taksama urny raźmieščany na ŭsich prypynačnych punktach horada.

• 0
• 2
• 6
• 0
• 0
• 0
• 0
• 0