Papa Francišak nazvaŭ čačencaŭ i burataŭ «samaj žorstkaj častkaj rasijskich vojskaŭ va Ukrainie»
Papa Rymski Francišak, kažučy pra vajnu va Ukrainie, nazvaŭ čačencaŭ i burataŭ «samaj žorstkaj častkaj rasijskich vojskaŭ va Ukrainie», adznačyŭšy, što «kali jość ludzi-pakutniki, to pavinny być i tyja, chto ich mučyć». Pra heta jon zajaviŭ u intervju vydańniu America, piša «Nastojaŝieje vriemia».
«Kali ja kažu pra Ukrainu, ja kažu pra narod, jaki pryniaŭ pakutnickuju śmierć. Kali ŭ vas jość ludzi, jakija stali pakutnikami, u vas jość chto-niebudź, chto ich mučyć. Kali ja kažu pra Ukrainu, ja kažu pra žorstkaść, bo ŭ mianie jość šmat infarmacyi ab žorstkaści vojskaŭ. Jak praviła, samymi žorstkimi, mabyć, źjaŭlajucca tyja, chto z Rasii, ale nie prytrymlivajucca rasijskaj tradycyi, takija jak čačency, buraty i hetak dalej», — skazaŭ papa Francišak.
U adkaz na słovy pantyfika aficyjnaja pradstaŭnica MZS RF Maryja Zacharava ŭ kamientary ahienctvu TASS zajaviła, što vykazvańnie papy ab čačencach i buratach — «zamiežavaje pierakručvańnie iściny».
«Heta ŭžo nie rusafobija, heta vyčvarenstva, navat nie viedaju jakoha ŭzroŭniu. Uspomnicie, u dzievianostyja hady — pačatku dvuchtysiačnych nam ža kazali roŭna supraćlehłaje, što heta ruskija, słavianie, jakija mučać narody Kaŭkaza, a ciapier nam kažuć, što heta narody Kaŭkaza mučać ruskich. Heta ž treba być vyčvarencami iściny», — padkreśliła jana.
U svaju čarhu, kiraŭnik Buracii Alaksiej Cydzienaŭ zajaviŭ, što «voiny z Buracii z honaram vykonvajuć svoj abaviazak i źjaŭlajucca prykładam najlepšych tradycyj rasijskaj armii».
«Čuć acenku ad kiraŭnika katalickaj carkvy ab žorstkaści kankretnych nacyjanalnaściaŭ — a mienavita burataŭ i čačencaŭ, jakija abaraniajuć mirnaje nasielnictva, — jak minimum dziŭna. Historyja viedaje šmat prykładaŭ źniščeńnia haradoŭ, krain i navat narodaŭ tymi, chto ličyć siabie pradstaŭnikami cyvilizavanych nacyj», — adznačyŭ jon.
U mai hetaha hoda Papa Francišak paviedamiŭ, što razmaŭlaŭ z Patryjarcham Maskoŭskim i ŭsioj Rusi Kiryłam pra vajnu va Ukrainie.
Pa słovach papy Franciška, razmova doŭžyłasia kala 40 chvilin u Zoom. Pieršyja 20 chvilin patryjarch z papieraj u rukach začytvaŭ jamu «ŭsie pryčyny, jakija apraŭdvajuć uvarvańnie» Rasii va Ukrainu. Pantyfik, u svaju čarhu, kazaŭ, što jany z Kiryłam «pavinny šukać šlach da miru». «Patryjarch nie moža pieratvarycca ŭ pucinskaha ałtarnika», — pierakazaŭ jon źmiest razmovy.
U suviazi z hetym adździeł źniešnich carkoŭnych suviaziaŭ Maskoŭskaha patryjarchatu 4 maja raspaŭsiudziŭ kamientar, u jakim havorycca, što Francišak «vybraŭ niekarektnuju tanalnaść dla pieradačy źmiestu hetaj razmovy».
«Admyvaŭ haŭno z unitazaŭ, my tam jak samyja končanyja». Błohier Vadzim Vadimati Jermašuk — pra toje, jak žyŭ u kałonii ŭ «nizkim statusie»1
Kamientary