Bałharyja pačała rasśledavańnie prarasijskich vajenizavanych farmiravańniaŭ
Prakuratura Safii zahadała kontrraźviedcy krainy pačać rasśledavańnie dziejnaści prarasijskich vajenizavanych farmiravańniaŭ paśla atrymańnia infarmacyi pra toje, što jany ździejśnili złačynstvy suprać krainy, piša «Ukrainskaja praŭda».
BNO Shipka i BND Shipka, dźvie zarehistravanyja NDA ŭ Bałharyi, znachodziacca ŭ centry ŭvahi viedamstva z-za ich suviaziaŭ z tak zvanym vajennym sajuzam «Leŭski» i aktyvizacyi dziejnaści ŭ Bałharyi paśla rasijskaj anieksii Kryma ŭ 2014 hodzie.
Pavodle daśledavańnia Bellingcat, hetyja dźvie hrupy prapanujuć dobraachvotnikam śpiecyjalizavanuju padrychtoŭku, jakuju pravodziać byłyja rasijskija instruktary śpiecnaza, viaduć antyjeŭrapiejskuju i antynataŭskuju prapahandu, a taksama prapahandujuć antyŭradavaje paŭstańnie, zabaronu palityčnych partyj i raspaŭsiudžvajuć rasisckija i antysiemickija teoryi zmovy.
Akramia taho, što jany adkryta zajaŭlali pra svoj namier źmianić kanstytucyjny ład krainy, jany taksama arhanizavali palavańnie na siryjskich imihrantaŭ na hary Strandža padčas pieršaha kryzisu biežancaŭ i aktyŭna raspaŭsiudžvali fejkavyja naviny padčas pandemii.
«My abaraniajem intaresy našych jeŭrapiejskich i jeŭraatłantyčnych partnioraŭ. My nie možam dapuścić złamysnaha rasijskaha ŭpłyvu ŭ Bałharyi», — prakamientavaŭ hałoŭny prakuror Ivan Hiešaŭ. Pry hetym jaho viedamstva paabiacała, što bolš infarmacyi źjavicca paśla zaviaršeńnia rasśledavańnia.
Mužčyna pad psieŭdanimam lejtenant Valter Kałašnikaŭ śćviardžaje, što jon lidar hetych arhanizacyj. Jaho sapraŭdnaje imia — Donča Rusieŭ, i, zhodna z publičnaj infarmacyjaj, jon naradziŭsia ŭ 1959 hodzie ŭ vioscy Bułharava, skončyŭ siaržanckuju škołu ŭ Šumienie i da 1981 hoda słužyŭ siaržantam u tankavaj dyvizii ŭ Ajtosie.
U 1996 hodzie Rusieŭ fihuravaŭ jak uładalnik achoŭnaj kampanii Walter Catani, jakaja vychvalałasia tym, što «sklikała» ŭ Bałharyi sustreču lidaraŭ hłabalnaj biaśpieki z udziełam byłych aficeraŭ «Masada», KDB i CRU.
Rusieŭ taksama mieŭ šmat inšych biznes-pradpryjemstvaŭ, takich jak hazieta, seks-šop, inviestycyjnyja kansultacyi i kryptavaluty, bolšaść ź jakich paciarpieli niaŭdaču.
Jon taksama źviazany sa staronkaj u Facebook pad nazvaj «Bałharyja i Rasija — adna historyja, adna mova, adna viera, adzin narod», jakaja vykarystoŭvajecca prarasijskaj papulisckaj partyjaj «Adradžeńnie» dla raspaŭsiudžvańnia pieradvybarnych paviedamleńniaŭ i rekłamy.
Kamientary