Vysokija stoli, bałkon z kałonami i bambaschovišča ŭ padvale. Jakija kvatery pradajuć u centry Minska
«Stalinki» słaviacca vysokimi stolami, taŭščeznymi ścienami i davoli vialikaj płoščaj. Pahladzieli, za kolki takija kvatery pradajucca i što ŭnutry.
«Za dźvie chviliny — nabiarežnaja Śvisłačy»
Za 187 000 dalaraŭ vystaŭlena na prodaž trochpakajoŭka pa adrasie Kisialova, 11. Ahulnaja płošča kvatery 70 «kvadrataŭ». Dom pabudavany ŭ 1956 hodzie.
Samy vialiki pakoj maje płošču amal 22 m², jon prachadny i viadzie ŭ maleńkuju (5,5 m²) kuchniu. Płošča dvuch astatnich žyłych pakojaŭ składaje 12—13 mietraŭ. Adzin ź ich maje vychad na adkryty bałkon z kałonami.
Žyllo pradajecca razam z meblaj i technikaj. U kvatery majecca kandycyjanier. Vyšynia stolaŭ — 2,9 mietra.
«U krokavaj dastupnaści mnostva kram i kafe, škoły, dziciačyja sady, miedcentry, banki. Za dźvie chviliny chady ad doma — park imia M. Horkaha, vieładarožka, nabiarežnaja raki Śvisłač z pryhožym fantanam na vadzie», — havorycca ŭ apisańni abjekta.
«Pačućcio śviata i vydatny dušeŭny nastroj»
Za 259 000$ pradajecca trochpakajoŭka nad univiersamam «Centralny». Ahulnaja płošča kvatery 92,6 m².
«Dyzajn nie pakinie nikoha abyjakavym. U kvatery spałučajucca sučasny styl i chatniaja ŭtulnaść. Karciny na ścienach, jakija začaroŭvajuć, i bahaty interjer stvarajuć pačućcio śviata i vydatny dušeŭny nastroj», — havorycca ŭ apisańni.
Aproč vialikaj haścioŭni, jakaja nie adździelena ścienami ad kuchni, u kvatery dva spalnyja pakoi, u adnym ź jakich jość dadatkovaja płošča dla mini-kabinieta.
Sam dom pabudavany ŭ 1955 hodzie, vyšynia stolaŭ kala troch mietraŭ.
Dva ŭzroŭni i bambaschovišča ŭ padvale
Na Kirava, 33 pradajecca dvuchuzroŭnievaja kvatera z ahulnaj płoščaj 122 m². Za trochpakajoŭku z dvuma sanvuzłami i prastornaj (18,8 m²) kuchniaj prosiać 330 tysiač dalaraŭ. Vyšynia stolaŭ u domie 1936 hoda pabudovy składaje 3,2 mietra.
U pamiaškańni vykanany dyzajnierski ramont u kłasičnym styli. Pakoi na druhim paviersie z mansardnym dacham.
Kvatera abstalavana ŭłasnaj sistemaj aciapleńnia i prytokava-vyciažnaj vientylacyjaj z padahrevam pavietra (filtravańnie 7-j stupieni ačystki). U kožnym pakoi kandycyjanier.
«Mebla vyrablałasia ŭ Italii pa indyvidualnaj zamovie. Padłohi z padahrevam, vyrablenyja z masivu čyrvonaha afrykanskaha dreva mierbau. Italjanskaja marmurovaja plitka», — havorycca ŭ apisańni.
Siarod inšych pieravah pradaŭcy nazyvajuć najaŭnaść bambaschovišča ŭ padvale doma.
Parkiet i blizkaść da kaviarniaŭ
U Vierchnim horadzie za 400 tysiač dalaraŭ pradajuć čytyrochpakajoŭku. Dakładny adras — Kamsamolskaja, 26. Ahulnaja płošča kvatery 95 m², žyłaja — 69. Kvatera mieścicca na trecim paviersie čatyrochpaviarchovaha doma 1937 hoda pabudovy.
Vyšynia stolaŭ 3,17 mietra. Z čatyroch pakojaŭ tolki adzin prachadny. Najmienšy pakoj maje płošču 13,5 m². Astatnija try — pa 18—19 «kvadrataŭ». U kvatery dva bałkony. Płošča kuchni — 13,2 m², vanny pakoj pamieram 6 kvadrataŭ i maje akno.
Siarod pieravah — šyrokija cahlanyja ścieny, jakija harantujuć vysoki ŭzrovień hukaizalacyi, i vialikaja kolkaść kaviarniaŭ u krokavaj dastupnaści. Taksama pradaviec adznačaje mahčymaść zrabić pierapłaniroŭku, tak jak mnohija ścieny ŭ kvatery nie źjaŭlajucca apornymi.
Prynamsi, u adnym z pakojaŭ zachavałasia staroje draŭlanaje akno.
Pa ŭsioj kvatery, aproč kalidora, vannaha pakoja i kuchni, — parkiet.
«Dla pražyvańnia paśpiachovych sučasnych ludziej»
Amal u paŭmiljona dalaraŭ aceniena čatyrochpakajoŭka na Bahdanoviča, 37. Ahulnaja płošča 126,8 m². Haspadary apisvajuć žyllo tak: unikalnaja kvatera premium-kłasa ŭ samym centry stalicy dla pražyvańnia paśpiachovych sučasnych ludziej.
U kvatery jość harderobnaja, topačnaje pamiaškańnie i dva sanvuzły. Samy prastorny pakoj — heta kuchnia-haścioŭnia płoščaj 33 m². Ramont u kvatery vykanany ŭ styli łoft.
«Dom pabudavany z cehły ručnoha vyrabu, jakaja adrestaŭravana i zachavana ŭ interjery. Vializnyja vokny, kvatera śvietłaja, prastornaja. Stoli bolšyja za 3 mietry, u kvatery pravodziłasia poŭnaja rekanstrukcyja pamiaškańniaŭ, pierakryćciaŭ z šumaizalacyjaj i zamienaj kamunikacyj na sučasnyja. Indyvidualnaje hazavaje aciapleńnie i padahreŭ vady», — apisvajuć abjekt haspadary.
«Unikalnaja prapanova dla sapraŭdnych znaŭcaŭ»
Na Karła Marksa, 21 pradajuć čatyrochpakajoŭku. Za kvateru ahulnaj płoščaj 120 m² prosiać 825 tysiač dalaraŭ.
Dom pabudavany ŭ 1948 hodzie.
Ramont u kvatery vykanany ŭ kłasičnym styli. Vyšynia stolaŭ 3 mietry. Vokny vychodziać na dva baki doma.
«Vykanany surjozny ramont z zamienaj usich kamunikacyj i vykarystańniem materyjałaŭ premium-kłasa. Kvatera pradajecca z meblaj i technikaj. Hatovaja da pražyvańnia», — havorycca ŭ apisańni.
Miarkujučy pa nalepkach na bytavoj technicy, paśla ramontu tut jašče nichto nie žyŭ. U kvatery dva sanvuzły, adzin ź ich z aknom. Samy mały pakoj maje płošču 17 m². Samy vialiki — amal 32.
Siarod pieravah kvatery adznačajuć łakacyju, čysty padjezd, zakrytuju terytoryju, zialony dvor i intelihientnych susiedziaŭ z vysokim sacyjalnym statusam.
Amal u 10 razoŭ tańniej i taksama ŭ samym centry
Dla taho, kab nabyć kvateru ŭ histaryčnym centry stalicy nie abaviazkova mieć biudžet u niekalki socien tysiač dalaraŭ. Tak, naprykład, za 86 800$ pradajuć dvuchpakajoŭku ŭ domie 1929 hoda pabudovy pa adrasie Kirava, 19.
Praŭda, ahulnaja płošča kvatery ŭsiaho 33 «kvadraty» i kuchnia abjadnanaja z prychožaj, zatoje miesca vydatnaje i dom paśla kapramontu ŭ 2020 hodzie.
Čytajcie taksama:
Mikiełandžeła byŭ by ŭ šoku. Pahladzicie, jakuju jarkuju kvateru pradajuć u Minsku
Krakadziłavyja kresły i pracy viadomaha skulptara. Cikavostki interjeraŭ bankira Maciušeŭskaha
«Jamu pa načach śnilisia ludzi, jakich jon pasadziŭ». Stali viadomyja novyja detali apošnich dzion žyćcia syna Jarmošynaj7
Kamientary