Stryžak: Akramia ajcišnikaŭ, siłaviki prajaŭlajuć cikaŭnaść taksama da pradstaŭnikoŭ bankaŭskaj śfiery

Pa słovach Andreja Stryžaka, ahułam za hety pieryjad rabili danaty bolš za 100 tysiač čałaviek. 

«Składana skazać, kolki ajcišnikaŭ trapiła ŭ śpisy KDB za danaty. Z taho, što my viedajem, idzie havorka pra 5 tysiač asobaŭ. Nakolki hety śpis praŭdzivy, — nichto dakładna nie viedaje, tamu što nie bačyli na svaje vočy.

Zvyčajna heta vyhladaje tak: prychodzić pradstaŭnik KDB u IT-kantoru i kaža, što ŭ vas takija ludzi rabili danaty ŭ niejki peŭny pieryjad. Važna razumieć, što KDB nie bačyć, kudy kankretna čałaviek danaciŭ. Kali praz fejsbuk, — heta sacyjalnaja sietka vydaje kvitancyju, što čałaviek zrabiŭ niejki danat u bok Facebook fundraiser London. I bolš dakładnaj rasšyfroŭki nie daje. 

Tamu ja dumaju, što ludziej vyklikajuć na hetyja razmovy, kab atrymać dostup da fejsbuka i techniki, pahladzieć, ci nasamreč danat byŭ zrobleny na BYSOL, ByHelp ci inšyja struktury, jakija ŭ 2020-m byli absalutna lehalnymi, a ciapier pryznanyja łukašystami ekstremisckimi», — raskazvaje jon. 

Andrej Stryžak kaža, što cikaŭnaść siłaviki prajaŭlajuć taksama da pradstaŭnikoŭ bankaŭskaj śfiery. 

«Heta vyhladaje jak «kaladavańnie-ščadravańnie», bo jany chodziać faktyčna pa ludziach, jakija mohuć mieć hrošy i z kaho ich možna pasprabavać ich pavymahać, — kaža Stryžak. — Dumaju, što ŭsie bolš-mienš hrašovyja śfiery projduć praz takuju ataku. 

My apieratyŭna adreahavali na hetu situacyju. U sacsietkach ja rabiŭ pasty, što rabić. Adzin z samych hałoŭnych mietadaŭ — vyjezd z krainy, jak by heta radykalna ni hučała. Maja pazicyja takaja, što zvyčajna čałaviek, jaki danaciŭ, maje ŭ siabie ŭ bekhraŭndzie niejkija inšyja rečy pa pratestavaj aktyŭnaści. Kali składajecca niekalki takich faktaraŭ, heta stvaraje ryzyku, možna sieści ŭ turmu. 

Inšaje pytańnie, što znajšlisia mahčymaści i inšyja mietady, kab paźbiehnuć pieraśledu z-za danata mienavita praz fejsbuk. Možna vydalić akaunt, papiarednie pierad hetym pieravieści jaho na tuju elektronnuju poštu, jakoj vy nie karystajeciesia. Heta pazbaŭlaje takoj niepryjemnaści, jak dostup siłavych struktur da vašaha akaŭnta». 

Pry hetym kiraŭnik fonda BYSOL zaŭvažaje, što kolkaść ludziej, jakija b chacieli vyjechać ź ich dapamohaj, značna nie pavialičyłasia. 

«Ja źviazvaju heta z tym, što ajcišniki zvyčajna majuć vizy i mahčymaści rełakacyi. Dumaju, što kali ŭ pieršuju takuju chvalu da nas nie pajšło bolš zvarotaŭ, to liču, što ich nie dadasca i dalej.

Sa svajho boku mahu skazać, što pa-roznamu ludzi siabie pavodziać u vypadku, kali siłaviki prapanujuć «kampiensavać» sumu danata: chtości płacić «kampiensacyju», a chtości nie. Chaču papiaredzić, što tyja, chto heta robić, — pa sutnaści, pryznajuć, što ździejśnili toje ci inšaje «złačynstva» pa mierkach siońniašniaj ŭłady. I heta značyć, što

ŭsie hetyja abiacańni, navat spynieńnie kryminalnaj spravy, jany zusim nie vartyja davieru. Ułada moža adkatać usio nazad. Čałaviek usio roŭna siadzie, prosta pierad hetym u jaho vyklančać hrošy i atrymajuć pryznańnie. Tamu heta zusim niapravilnaja stratehija, jana nie pryviadzie da biaśpieki», — padsumoŭvaje Andrej Stryžak.

Čytajcie taksama: 

Krynicy: Jančeŭski prydumaŭ, kab prahramistaŭ za danaty 2020-ha nie sadzili, ale ździrali kampiensacyju ŭ dziesiacirazovym pamiery

Padrabiaznaści rekietu ajcišnikaŭ: stała viadomaja minimalnaja suma «kampiensacyi» za danat u BySol i BY_help

Stała viadoma, jak KDB vyličvaje tych, chto danaciŭ u «Bajsoł»

Andrej Stryžak: Meta pieraśledu za danaty — źniščeńnie biełaruskaj salidarnaści

• 18
• 1
• 5
• 8
• 14