Zianon Paźniak raskazaŭ pra vyniki pajezdki va Ukrainu i detali sustrečy z kalinoŭcami
Zianon Paźniak u kancy studzienia — pačatku lutaha naviedaŭ Ukrainu. Pra vyniki pajezdki, a taksama stvareńnie novaj vajenna-palityčnaj struktury jon raspavioŭ padčas pres-kanfierencyi pa viartańni ŭ Varšavu.
Vizit Zianona Pazianka va Ukrainu rychtavaŭsia niekalki miesiacaŭ.
Palityk raskazaŭ, što jon sustrakaŭsia ŭ Viarchoŭnaj radzie z kamitetam źniešniaj palityki i mižparłamienckaha supracoŭnictva.
«Było pytańnie ab tym, ci mahčyma pryznać Biełaruś akupavanaj dziaržavaj. My napisali listy va ŭsie ŭkrainskija ŭstanovy. Kamisija padrychtavała prajekt, jaki pastaŭleny na čarhu. Sutnaść hetaha prajekta ŭ tym, što heta budzie zajava, jakaja asudžaje akupacyju Biełarusi rasijskimi vojskami».
Palityk taksama padzialiŭsia detalami sustrečy z kalinoŭcami. Takich sustreč było šeść.
«Try razy — z kiraŭnictvam pałka. Sutykalisia z bataljonami «Vołat», «Lićvin» i vučebkaj. Byli ŭ Bachmucie niepasredna. Na nulavuju liniju my nie jeździli, ale byli ŭ Bachmucie na adlehłaści pryblizna dvuch kiłamietraŭ.
Nam pašancavała: była imhła, tuman, drony nie lotali, pa nas nie stralali, choć stralba tam idzie ŭvieś čas», — raspavioŭ Zianon Paźniak.
Čytajcie taksama: «Da taho, čym zajmaŭsia ŭ mirnym žyćci, u mianie ciapier antypatyja». Bajec pałka Kalinoŭskaha raskazaŭ, što adbyvajecca ŭ Bachmucie i apisaŭ taktyku rasijskaha vojska
Jon naviedvaŭ taksama špital u Kijevie, dzie znachodziacca paranienyja vajary.
«My ličym, što połk — heta taja bajavaja adzinka, jakaja źjaŭlajecca adnačasna adzinka palityčnaj», — dadaŭ jon. Palityk abmiarkoŭvaŭ tam supracoŭnitva «Volnaj Biełarusi» i inšych nacyjanalna-demakratyčnych arhanizacyj z pałkom Kalinoŭskaha.
Zianon Paźniak ahučyŭ hałoŭny vynik pajezdki:
«Viaduccca kansultacyi pra stvareńnie vajenna-palityčnaj struktury Rady Biaśpieki z metaj abarony nacyjanalnych intaresaŭ Biełarusi va ŭmovach vajny va Ukrainie i akupacyi Biełarusi Rasiejskaj Fiederacyjaj».
Namieśnik kamandzira pałka Kalinoŭskaha Vadzim Kabančuk patłumačyŭ, navošta heta struktura.
«Bahata zakidaŭ idzie ŭ bok pałka, što pačynajem zanadta pierajmacca palitykaj, što my vajskovaje ZSU, leziem nie zusim u svaju spravu. Mienavita dziela taho, kab spynić zakidy ŭ naš bok, my stvarajem vajenna-palityčny subjekt. Ciapier jon budzie bolš pradstaŭničyja funkcyi nieści».
Novaja struktura, pa słovach Kabančuka, patrebna taksama, kab naładzić stałyja kantakty Ukrainy ź biełaruskaj palityčnaj apazicyjaj.
Jon raspavioŭ, što ŭ Radu najchutčej buduć uvachodzić kalinoŭcy, jakija ŭžo spynili svaje kantrakty z tych ci inšych pryčyn. Ale nie tolki — zmohuć dałučycca palityčnyja aktyvisty, jakija žyvuć u roznych krainach.
Pradstaŭničyja funkcyi Rady budzie ažyćciaŭlać Vadzim Kabančuk, Źmicier Ščyhielski i Pavieł Vusaŭ.
«Naša Niva» — bastyjon biełaruščyny
PADTRYMAĆ
Kamientary