Biełaruskija turysty stali radziej vyjazdžać za miažu
Biełaruskija turysty stali radziej vyjazdžać za miažu, paviedamiŭ žurnalistam u Minsku 28 kastryčnika dyrektar departamienta pa turyźmie Ministerstva sportu i turyzmu Viktar Jankavienka.
Pavodle jaho słoŭ, za vosiem miesiacaŭ 2009 hoda prodaž u Biełarusi zamiežnych turaŭ źmienšyŭsia na 8% u paraŭnańni z anałahičnym letašnim pieryjadam. Najbolš istotna źniziłasia kolkaść tych, chto žadaŭ nabyć darahija tury. Usiaho ŭ studzieni—žniŭni hetaha hoda impart turpasłuh skłaŭ 22,5 młn. dalaraŭ.
Jak miarkuje Jankavienka, źmianšeńnie kolkaści tych, chto žadaje vyjechać za miažu, — pakazčyk kryzisnych źjaŭ: u biełarusaŭ nie chapaje hrošaj na adpačynak za miežami krainy. Peŭnuju rolu, na jaho dumku, u hetym adyhrała devalvacyja rubla ŭ pačatku hoda.
Razam z tym, zaznačyŭ Jankavienka, za studzień—žnivień kolkaść inšaziemcaŭ, jakija adpačyvali ŭ Biełarusi, krychu pavialičyłasia. Tak, abjom ekspartu turystyčnych pasłuh uzros na 4% u paraŭnańni z anałahičnym letašnim pieryjadam i skłaŭ 72,9 młn. dalaraŭ.
Za košt pieravyšeńnia ekspartu turystyčnych pasłuh nad impartam dasiahnuta stanoŭčaje salda ŭ pamiery 50,4 młn. dalaraŭ. Aprača taho, na 25,3 młrd. rubloŭ uzros abjom turystyčnych i ekskursijnych pasłuh, akazanych nasielnictvu Biełarusi. «Heta krychu nižaj za zapłanavanyja pakazčyki, ale heta realny hrašovy dachod», — zaznačyŭ Jankavienka. Usiaho za studzień—žnivień nasielnictvu Biełarusi było akazana turystyčnych i ekskursijnych pasłuh na 249,8 młrd. rubloŭ.
Jak zajaviŭ Jankavienka, zychodziačy z hetych pakazčykaŭ možna zrabić vysnovu, što ŭ cełym turystyčnaja halina «asabliva nie adčuła kryzis». Pavodle jaho słoŭ, va ŭsim śviecie vielmi mała krain, dzie pakazčyki pracy turyzmu palepšylisia. U asnoŭnym krainy niasuć straty: skaračajecca kolkaść turystaŭ, jakija pryjazdžajuć. U Biełarusi śviedčańniem hetaj tendencyi stała skaračeńnie na treć kolkaści tranzitnych turystaŭ.
Kamientary