Łukašenka ŭpieršyniu prakamientavaŭ dyviersiju ŭ Mačuliščach i panarakaŭ, što dyviersanty abrali mały dron
Padčas cyrymonii ŭručeńnia dziaržuznaharod Alaksandr Łukašenka vykazaŭsia nakont dyviersii ŭ Mačuliščach.
Jaho słovy pryvodzić pres-słužba i BiełTA.
Pavodle jaho, nibyta zatrymali «terarysta ŭkrainskich śpiecsłužbaŭ i jaho pamahatych, jakija majuć dačynieńnie da sproby dyviersii» ŭ dačynieńni da kaštoŭnaha rasijskaha samalota A-50.
Łukašenka abvinavaciŭ u dyviersii ŭ Mačuliščach Słužbu biaśpieki Ukrainy i kiraŭnictva amierykanskaha CRU.
«Słužba biaśpieki Ukrainy, kiraŭnictva CRU nie toje zboku, nie toje za śpinaj raspracoŭvajuć apieracyju suprać Respubliki Biełaruś. Byŭ padrychtavany teraryst. Jon rasijanin, z rasijskim pašpartam, maje ŭkrainski pašpart. Naradziŭsia ŭ Kryvym Rohu, žyŭ u Krymie. Svajaki ŭ Aŭstryi niekatoryja, niekatoryja zastalisia ŭ Kijevie. Jon byŭ zavierbavany śpiecsłužbaj Ukrainy ŭ 2014-m, nakštałt, hodzie. Ajcišnik abo dobra raźbirajecca ŭ IT-technałohijach. Rychtavaŭsia dla ździajśnieńnia terarystyčnych aktaŭ», — raspavioŭ jon.
Prykmiety, nazvanyja Łukašenkam, nahadvajuć tyja, što byli ŭ milicejskich aryjenciroŭkach. «Naša Niva» tady źviazałasia ź siastroj chłopca, jakoha šukali — jana skazała, što ŭ dni dyviersii jon byŭ doma, va Ukrainie.
Pa słovach Łukašenki, pry padrychtoŭcy «terakta» vykarystoŭvalisia «samyja vysokija technałohii». «Heta sapraŭdy było štości nievierahodnaje», — skazaŭ jon.
I panarakaŭ, što abrali mały bieśpiłotnik.
Ale na videa, jakija publikavaŭ «Bajpoł», da A-50 padlataŭ samy zvyčajny dron.
«Tamu što, kali b jany vykarystoŭvali vialiki, to sistemy našaha sačeńnia, viadoma, jaho b adsačyli. Va Ukrainie byli zadziejničanyja hetyja dva bieśpiłotniki, navučany hety čałaviek i inšyja, jakija jamu dapamahali. Pra heta my raskažam vam potym».
Alaksandr Łukašenka niaredka abiacaje raskazać «paśla», «budzie vielmi cikava», ale najčaściej za hetymi słovami niama nijakaha praciahu.
Sama dyviersija zdaryłasia 26 lutaha. «Bajpoł» uziaŭ adkaznaść za jaje na siabie, zajaviŭšy, što biełarusy z dapamohaj dvuch dronaŭ paškodzili samalot. Śćviardžałasia, što vykanaŭcy paśpiachova zdoleli pakinuć terytoryju Biełarusi. «Bajpoł» apublikavaŭ taksama dva videa, na jakich bačna, jak dron prylataŭ na raźviedku i siadaŭ na A-50, ale videa samoj ataki nie było.
Raniej biełaruskija dziaržaŭnyja ŚMI nazyvali incydent na aeradromie z rasijskim samalotam A-50 fejkam, admaŭlali, što ź im niešta zdaryłasia.
Jak śćviardžajuć vajskovyja ekśpierty, samalot A-50 vykarystoŭvaŭsia dla naviadzieńnia na celi va Ukrainie rasijskich rakiet i dronaŭ.
Na minułym tydni samalot A-50 vylecieŭ na ramont na Tahanrohski zavod i nie viarnuŭsia, choć dziaržaŭnyja ŚMI ŭ toj dzień zajaŭlali, što samalot ažyćciaŭlaje ablot terytoryi Biełarusi i vykonvaje bajavyja zadačy.
Krynicy «Našaj Nivy» i pravaabaroncy paviedamlali pra masavyja randomnyja zatrymańni i pieratrusy ŭ rajonie Mačuliščaŭ, a taksama siarod strajkbalistaŭ, rekanstruktaraŭ i strałkoŭ.
Čytajcie taksama:
Siastra «dyviersanta» ź milicejskaj aryjenciroŭki: Jon byŭ doma ŭ hetyja dni
Krasamoŭna. Što łukašenkaŭskija kanały napisali pra vybuchi ŭ Mačuliščach
Kamientary