«Jon prymusiŭ mianie havaryć ź ludźmi». Brytanka raspaviała, jak biazdomny sabaka ź Minska staŭ jaje siabram i vyratavaŭ ad depresii
29-hadovaja Eleanora Boŭnes (Eleanor Bowness) ź miastečka Kinhstan-on-Soar i jaje dvarniak Beła Roŭz dajšli da paŭfinału najbujniejšaha suśvietnaha sabačaha šou Crufts. Brytanskaje vydańnie Ealing Times raskazała historyju byłoj nastaŭnicy, jakaja lečycca ad depresii dziakujučy vyratavanamu sabaku ź Biełarusi, zaŭvažyŭ reform.by.
«Ja była na miažy samahubstva, kali my znajšli jaho, i jon, biez sumnievu, vyratavaŭ mnie žyćcio. Mianie b tut nie było bieź jaho», — raspaviadaje Eleanora.
Dvuchhadovy biazdomny sabaka znajšoŭsia praz vyratavalny centr PawHelpUK, i heta była «luboŭ ź pieršaha pohladu». Arhanizacyja zajmajecca vyratavańniem sabak ź Biełarusi i Ukrainy.
«Jon pryjechaŭ z vulic Minska ŭ Biełarusi, i pa jaho pavodzinach my možam skazać, što ŭ jaho byŭ vielmi ciažki pačatak žyćcia», — raspaviadaje byłaja nastaŭnica. Pavodle jaje słoŭ, raniejšyja haspadary žorstka abychodzilisia z žyviołaj.
«Ja ŭsio jašče zmahajusia, pracuju pakrysie. Raniej ja była nastaŭnicaj pryrodaznaŭčych navuk u siaredniaj škole, ale z taho času, jak u mianie zjaviłasia Beła, ja całkam pahruziłasia ŭ sabačy śviet. Ja pakinuła hetuju pasadu i ciapier pracuju niapoŭny pracoŭny dzień dresiroŭščykam sabak i spadziajusia stać majstram u halinie pavodzin žyvioł», — kaža brytanka.
Pośpiech dueta na najbujniejšaj u śviecie vystavie sabak demanstruje pieraŭtvaralny ŭpłyŭ na svojskich žyvioł, robić vysnovu vydańnie.
«Ja nikoli nie była čałaviekam, jaki razmaŭlaŭ ź nieznajomcami, ale tak šmat ludziej cikaviłasia im, što jon prymusiŭ mianie havaryć ź ludźmi», — dzielicca ŭražańniami ad udziełu ŭ konkursie Scruffts dla biesparodnych sabak Eleanora.
Vystava Crufts-2023 prachodziła z 9 pa 12 sakavika ŭ Nacyjanalnym vystavačnym centry Birminhiema.
-
«Heta nie majo, heta siabra». Biełarus zdymaje reakcyju achoŭnikaŭ mietro na fałaimitatary ŭ zaplečniku — videa źbirajuć miljony prahladaŭ
-
Siem typaŭ «pjanaj asoby»: kim vy stanoviciesia pad uździejańniem ałkaholu i što heta aznačaje?
-
U San-Francyska žyvie kot, jakoha zavuć Biełaruś. Prytym haspadynia jaho — zvyčajnaja amierykanka
Kamientary