Kitajskija daśledčyki pradstavili zaplečnik, jaki moža značna palehčyć žyćcio padarožnikam, spartsmienam, vajskoŭcam i ŭsim tym, chto pracuje ź ciažkimi hruzami. Samu kancepcyju nielha nazvać inavacyjnaj, adnak na fonie kankurentaŭ kitajski varyjant usio ž vyłučajecca adnoj asablivaściu.
U spakojnym stanie padčas našeńnia zvyčajnaha zaplečnika nahruzka na cieła zastajecca niaźmiennaj adnosna śpiny. Adnak padčas chadźby hruz ruchajecca i ŭvierch, i ŭniz, što pavialičvaje cisk na chrybietnik i nohi, vyklikajučy adčuvańnie, niby hruz ciažejšy, čym nasamreč. Sučasnyja technałohii, takija jak, naprykład, amartyzacyjnyja zaplečniki, časta ŭklučajuć śpiecyjalnyja ruchaviki, jakija robiać kanstrukcyju ciažejšaj i patrabujuć dadatkovaha siłkavańnia.
Kamanda kitajskich navukoŭcaŭ z Charbinskaha technałahičnaha instytuta raspracavała novaje rašeńnie, jakoje vykarystoŭvaje vyklučna enierhiju ruchu samoha čałavieka, pieradaje partał Interesting Engineering.
U asnovie kanstrukcyi novaha zaplečnika lažyć sistema simietryčnych miechanizmaŭ stałaj siły, uklučajučy spružyny i krutnyja stryžni. Dla paźbiahańnia kantaktu źmieściva zaplečnika z astatniaj kanstrukcyjaj pryłady praduhledžany dadatkovyja kampanienty, u tym liku elektramahnitny pryvad. Hetyja kampanienty praduchilajuć pieramiaščeńnie hruzu ŭvierch abo ŭniz, hienierujučy ad krokaŭ čałavieka dastatkova enierhii dla pracy elektramahnitnaha ruchavika, tłumačać navukoŭcy.
Dla pravierki efiektyŭnaści kanstrukcyi kamanda pryciahnuła dobraachvotnikaŭ, jakija nasili zvyčajny i novy zaplečniki na biehavoj darožcy. Padčas testaŭ vymiaraŭsia ŭzrovień mietabalizmu ŭdzielnikaŭ pry roznych chutkaściach ruchu.
Ekśpierymienty paćvierdzili, što novaja kanstrukcyja zaplečnika źnižaje enierhavysiłki čałavieka na 11% i pamianšaje viertykalnaje pieramiaščeńnie hruzu (a značyć i adčuvańnie vahi rečaŭ) na 85%, paviedamlajuć kitajskija daśledčyki.
Pa ich słovach, novy zaplečnik — nie prosta aksesuar, a krok da pazityŭnaj źmieny jakaści žyćcia dla miljonaŭ ludziej. Turyzm, sport, vajskovaja słužba, łahistyka — usio heta vobłaści, dzie ludzi niaredka ciahajuć ciažkija rečy i dzie kožny hram maje značeńnie. Dla alpinistaŭ i padarožnikaŭ novaja technałohija moža aznačać mienš stomlenyja nohi, dla vajskoŭcaŭ — mienšuju ryzyku traŭmaŭ, a dla zvyčajnych rabočych i dastaŭščykaŭ roznych tavaraŭ — palapšeńnie zdaroŭja i pradukcyjnaści.
Novy zaplečnik, pavodle navukoŭcaŭ, moža pastupić u masavuju vytvorčaść u bližejšyja hady, kali buduć zavieršanyja ŭsie etapy testavańnia pryłady.
Unizie možna ŭbačyć prykład pracy ŭžo isnujučych zaplečnikaŭ, jakija istotna źnižajuć vahu rečaŭ, ale patrabujuć tradycyjnych ruchavikoŭ i dadatkovaha enierhasiłkavańnia (batarei).
Ciapier čytajuć
Vałancior «Viasny» Čapiuk raskazaŭ, jak jaho zatrymaŭ HUBAZiK adrazu na vychadzie z kałonii i jak dapytvali pra Mikołu Dziadka2
Kamientary