«Krucili, hramili, fatahrafavali». Što viadoma pra zatrymańni ŭ Lachavičach, Miorach, Połacku, Babrujsku, Kruhłym
U rajcentrach adbyvajucca aryšty, pieratrusy i sudovyja pracesy pa palityčna matyvavanych administracyjnych spravach. Previentyŭnyja zatrymańni pačalisia napiaredadni Dnia Voli.
U Lachavičach, jak udałosia vyśvietlić z roznych nie źviazanych miž saboju krynic, siłaviki zabirali ludziej na pracoŭnych miescach.
U źniavoleńni apynulisia rabotniki asnoŭnych pradpryjemstvaŭ rajcentra: małočnaha zavoda «Lachavičok», pradpryjemstvaŭ «Interłak» i «Mietałapłastmas». Taksama byli schoplenyja i niekalki pradprymalnikaŭ. Imiony źniavolenych rodnyja prosiać nie nazyvać, bo ličać, što ahałoska im naškodzić.
U rajcentry abłava pačałasia napiaredadni Dnia Voli i, jak śćviardžajecca, adzinkavyja zatrymańni praciahvajucca paśla jaho. Kolkaść źniavolenych siahaje dziasiatka čałaviek: piać hadoŭ tamu stolki ludziej na biełaruskaje śviata zvyčajna zatrymlivali ŭ stalicy, ciapier — u rajcentry z nasielnictvam 10500 čałaviek. Nahodaj dla zatrymańnia byli padazreńni ŭ nielubovi da dyktatury, a taksama ŭdzieł u minułym u apazicyjnych čatach.
Jak pišuć pravaabaroncy, adnaho z zatrymanych supracoŭniki AMAPa katavali na vačach u siamji.
U Połacku zatrymańni išli ciaham apošniaha tydnia.
Mužčyny na kamieru supracoŭnikam HUBAZiK havorać, što ich zabrali za raspaŭsiudvžańnie «ekstremisckich» materyjałaŭ (tak łukašysty nazyvajuć niezaležnuju hramadska-palityčnuju ci kulturnuju infarmacyju), a taksama za padpisku na «zabaronienyja telehram-kanały». Adzin ź ich kaža, što ŭ jaho na telefonie byŭ biełaruski nacyjanalny ściah.
Na videa pakazana, jak siłaviki kruciać pažyłoha mužčynu i načeplivajuć jamu na ruki kajdanki. Dalej jon siadzić na taburecie z rukami za śpinaj.
Pavodle krynic «Našaj Nivy», 29 sakavika siłaviki praviali maštabnuju abłavu ŭ Nacyjanalnym Połackim historyka-kulturnym muziei-zapaviedniku.
Zatrymanyja prynamsi 8 čałaviek. Pa infarmacyi pravaabaroncaŭ, siarod ich byłaja dyrektarka zapaviednika Tamara Džumantajeva, navapołackija fatohrafy Kirył Smalakoŭ i Ihar Supranionak, kandydat fiłasofskich navuk, supracoŭnik Muzieja knihadrukavańnia ŭ Połacku Ihar Bortnik.
Zabrali kampjutarnuju techniku, im zakidajecca raspaŭsiudžvańnie «ekstremisckaj» infarmacyi, kamientaryi, łajki i h.d.
U rajcentry Miory Viciebskaj vobłaści, jak kažuć krynicy «Našaj Nivy», jak minimum šaściarych žycharoŭ asudzili za «raspaŭsiudžvańnie ekstremisckich materyjałaŭ».
U pasiołku Akciabrski Homielskaj vobłaści viadoma prynamsi pra adzin sudovy praces za «raspaŭsiudžvańnie ekstremisckich materyjałaŭ».
Previentyŭnyja zatrymańni adbylisia i ŭ najbujniejšym rajcentry krainy — Babrujsku.
Pavodle praŭładnych telehram-kanałaŭ zabrali i asudzili na administracyjny aryšt prafsajuznuju aktyvistku Halinu Śmirnovu. U domie žančyny praviali pieratrus, a zatym sfatahrafavali razhrom i stomlenuju haspadyniu.
Schapili žycharku Babrujska Alenu Miadźviedzievu. Na videa prapahandysckaha telehram-kanała jana kaža, što nie padpisanaja na «ekstremisckija telehram-kanały» i nie zjaŭlajecca aktyvistkaj «ekstremisckich» arhanizacyj.
Pieratreśli žytło i staršyni mahiloŭskaj abłasnoj arhanizacyi sacyjał-demakrataŭ, žychara Babrujska Juryja Hryniavieckaha. Siłaviki ŭ telehram-kanale pachvalilisia fotazdymkam pažyłoha aktyvista z raskładzienymi pierad im nibyta zabaronienymi materyjałami. Varta adznačyć, što hetyja vydańni nie ŭvachodziać ni ŭ jakija śpisy «ekstremisckich materyjałaŭ» i byli advolna vyznačanyja łukašystami, jakija pravodzilisia pieratrus.
Vobšuk siłaviki praviali i ŭ žychara Babrujska Andreja Karelina. U čym mužčynu vinavaciać, niezrazumieła. Jaho sfatahrafavali ŭ razhromlenaj kvatery i paabiacali, što «praciah budzie».
U Kruhłym, rajcentry na Mahiloŭščynie, taksama adbylisia zatrymańni. Pavodle pravaabaroncaŭ z «Viasny», 28 sakavika zabrali šaściarych miascovych žycharoŭ za ŭdzieł u pratestach 2020 hoda. Nazyvałasia imia adnoj z zatrymanych — Alina Horava.
30 sakavika adzin z praŭładnych telehram-kanałaŭ paviedamiŭ pra zatrymańnie miascovaha pradprymalnika Alaksandra Kalina. Nahodaj staŭ jaho ŭdzieł u «niesankcyjanavanych mierapryjemstvach» 2020 hoda. Za toje ž dačka biznesoŭca abvieščanaja ŭ vyšuk. Zajaŭlajecca, što suprać zatrymanych raspačataja kryminalnaja sprava i im pahražaje da 4 hadoŭ pazbaŭleńnia voli.
U 2021 hodzie Alaksandr Kalin sudziŭsia sa staršyniom Kruhlanskaha rajvykankama Ściapanam Pałońnikavym, jakoha vinavaciŭ u źniavazie honaru, hodnaści i dziełavoj reputacyi. Z čynoŭnika namahaŭsia spahnać 10 tysiač rubloŭ kampiensacyi maralnaj škody.
Čynoŭnik na praŭładnym mitynhu 19 śniežnia 2020 hoda abvinavaciŭ Kalina ŭ zdradzie i vyhukvaŭ źniavažlivyja vykazvańni. Videa ź jaho vystupam było raźmieščanaje na sajcie rajonnaj arhanizacyi BRSM i miascovaj rajonki, ale praź dzień film prybrali. Reakcyja Pałońnika była vyklikanaja publičnym pratestam žycharoŭ rajcentra suprać falšavańnia vynikaŭ vybaraŭ i hvałtu siłavikoŭ.
Sud, jaki prachodziŭ u Škłovie, pradprymalniku vyjhrać nie ŭdałosia.
Masavyja palityčnyja represii ŭ Biełarusi praciahvajucca z 2020 hoda. Paśla vybaraŭ ludzi vyjšli na pratesty suprać falsifikacyi ich vynikaŭ i hvałtu siłavikoŭ. Z pačatkam poŭnamaštabnaj vajny va Ukrainie biełarusy zaznali pieraśled za antyvajennyja nastroi. Za 2,5 hoda teroru ŭ krainie adbyłosia kala 50 tysiač palityčna matyvavanych zatrymańniaŭ, zaviedziena kala 12 tysiač palityčna-kryminalnych spraŭ i adkinutyja bazavyja normy zakonnaści i marali.
«Naša Niva» — bastyjon biełaruščyny
PADTRYMAĆU Breście na tym tydni zatrymali jak minimum 6 čałaviek
Minimum 166 asudžanych pierad Dniom Voli — i heta tolki ŭ rehijonach
Masavyja zatrymańni prajšli ŭ rajcentry Kruhłaje
Favarytka Łukašenki i Čyža — što pryniesła himnastcy Ksienii Sankovič blizkaść z palityčnymi elitami?6
Kamientary