Bankir z atačeńnia Janukoviča, jaki chavaŭsia ad śledstva ŭ Biełarusi, źjechaŭ u ES

Kolišni staršynia praŭleńnia banku «Kijivśka Ruś» Viktar Bratko, jaki z 2016 hodu chavaŭsia ŭ Biełarusi ad śledztva i mieŭ status uciekača, imavierna vyjechaŭ ź biełrauskaj terytoryi i ciapier žyvie ŭ adnoj z eŭrapiejskich krain.

Jak paviedamiła Svabodzie krynica ŭ pravaachoŭnych orhanach Ukrainy, u časie dasudovaha raśledavańnia vyśvietlili «dastatkova padstaŭ», kab ličyć, što bankir moh vyjechać z terytoryi Biełarusi i ciapier žyvie ŭ krainie Eŭrapiejskaha źviazu.

U toj ža čas, praz adsutnaść suviaziaŭ z kampetentnymi orhanami Biełarusi, jakija razarvali paśla rasiejskaha vajennaha ŭvarvańnia va Ŭkrainu, atrymać paćviardžeńnie hetaj infarmacyi ź biełaruskaha boku śledčyja nia mohuć.

U śniežni 2023 hodu Viktara Bratka znoŭ abviaścili ŭ mižnarodny vyšuk paśla taho, jak Interpoł u 2018 hodzie źniaŭ suprać jaho «čyrvonuju kartku» ŭ suviazi z atrymańniem im statusa ŭciekača ŭ Biełarusi.

U čym abvinavačvajuć bankira

Pavodle śledčych, Viktar Bratko za biescań pradaŭ dva ofisnyja budynki ŭ Kijevie i Lvovie, jakija byli ŭ zakładzie ŭ banku. Hetuju aperacyju jon ažyćciaviŭ za dzień da ŭviadzieńnia ŭ banku časovaj administracyi zhodna z rašeńniem Nacyjanalnaha banku Ŭkrainy. U miežach kryminalnaj spravy aryštavanaja ŭsia jahonaja ruchomaja i nieruchomaja majomaść.

Ukrainskija pravaachoŭnyja orhany abvinavačvajuć Viktara Bratka ŭ vyviadzieńni z bankaŭskich rachunkaŭ u 2015 hodzie bolš jak 44 miljonaŭ dalaraŭ.

Va ŭkrainskich ŚMI bank «Kijivśka Ruś» źviazvali ź Jaŭhienam Bakulinym i Juryjem Bojkam — u časy prezydenctva Viktara Janukoviča pieršy ačolvaŭ NAK «Naftohaz Ukrajini», a druhi — Ministerstva enerhietyki. U 2016 hodzie abodva ŭžo pracavali ŭ parlamencie, abranyja deputatami pavodle śpisu «Apazycyjnaha bloku», što byŭ stvorany na pareštkach Partyi rehijonaŭ.

Bank intensiŭna pačaŭ naroščvać svaje aktyvy mienavita ŭ časy prezydenctva Janukoviča, kali ŭ im byli skancentravanyja ŭsie rachunki hazazdabyŭnoj kampanii i kiraŭnictva NAK «Naftohaz Ukrajini». Paśla ŭciokaŭ Viktara Janukoviča pravaachoŭnyja orhany zatrymali Jaŭhiena Bakulina pavodle padazreńnia ŭ suviaziach sa złačynnaj hrupaj, jakaja spryčyniła škodu dziaržavie ŭ pamiery 4 miljardy dalaraŭ. Tady i vyśvietliłasia, što ŭsie rachunki NAK «Naftohaz Ukrajini» znachodzilisia ŭ pryvatnym banku «Kijivśka Ruś».

Kali ŭ bank pryjšła časovaja administracyja, vyśvietliłasia, što ŭsie jahonyja aktyvy paźnikali niedzie ŭ afšorach, u tym liku i praź finansavuju strukturu, jakaja nibyta była źviazanaja z rasiejskim «Hazpromam».

Ułaśnika banku Viktar Bratka abvinavačvajuć u prysabiečvańni i rastracie čužoj majomaści šlacham złoŭžyvańnia ŭ asabliva vialikich pamierach i ŭ składzie arhanizavanaj hrupoŭki. Pavodle ŭkrainskaha zakanadaŭstva jamu pahražaje ad 7 da 12 hadoŭ źniavoleńnia z kanfiskacyjaj majomaści i z pazbaŭleńniem prava zajmacca peŭnaj dziejnaściu ciaham troch hadoŭ.

Jak bankir «znajšoŭsia» ŭ Biełarusi

U žniŭni 2016 hodu Viktara Bratka abviaścili ŭ mižnarodny vyšuk, a praz dva hady jaho zatrymali biełaruskija pravaachoŭniki i źmiaścili pad vartu. Praz try miesiacy paśla zatrymańnia, 9 listapada 2018 hodu, jaho vyzvalili pastanovaju namieśnika prakurora Miensku, bo ŭ hety ž dzień Departament pa hramadzianstvie i mihracyi MUS Biełarusi nadaŭ jamu status uciekača.

Jak vynikała z rašeńnia ŭkrainskaha sudu taho času, Biełaruś nadała eks-bankiru status uciekača, matyvujučy heta tym, što va Ŭkrainie jaho pieraśledujuć z palityčnych matyvaŭ, i admoviła ŭ ekstradycyi. U dalejšym z hetaj pryčyny Interpoł vyklučyŭ Viktara Bratka i ź mižnarodnaha vyšuku.

Advakaty eks-bankira admaŭlalisia ŭdakładniać, čym ichny padabaronny zajmaŭsia ŭ Biełarusi i ŭ jakim horadzie žyŭ.

• 0
• 0
• 0
• 0
• 0
• 0
• 0
• 0