Baćka padazravanaha pa spravie zabojstva ŭ Varšavie biełaruski Lizy staŭ na kaleni pierad synam u sudzie
Druhoje pasiedžańnie pa spravie ab zhvałtavańni i zabojstvie biełaruskaj Lizy prajšło 16 śniežnia ŭ rajonnym sudzie Varšavy. Prysud abvinavačanamu 23-hadovamu Doryjanu S. moža być abvieščany ŭ studzieni, piša Most.
Pasiadžeńnie prajšło za začynienymi dźviaryma. Sud dapytvaŭ ekśpiertaŭ: seksołaha, psichijatra i taksikołaha, a taksama śviedak, pra vystup jakich chadajničała abarona abvinavačanaha. Siarod ich byŭ baćka Doryjana S. Jamu abvinavačany vysłaŭ sms z prośbaj ab dapamozie adrazu paśla ździajśnieńnia złačynstva.
Padčas pierapynku ŭ sudovym pasiadžeńni, kali palicejskija vyvodzili Doryjana z zały suda, baćka znachodziŭsia ŭ kalidory. Vierahodna pad uździejańniem emocyj, jon staŭ na kaleni pierad synam. Paśla hetaha jaho paprasili adyści dalej ad zały suda. Razam z baćkam była babula Doryjana S.
Pradstaŭnica paciarpiełaha boku — siamji i chłopca Lizy — advakat Evielina Zduniek raspaviała žurnalistam, što prakuratura zapatrabuje dla abvinavačanaha pažyćciovaha źniavoleńnia. Jana hatovaja padtrymać hetaje patrabavańnie:
— Heta niezvyčajna ciažkaje złačynstva, jakoje patrabuje sapraŭdy žorstkaj reakcyi z boku orhana pravasudździa. Prašu mieć na ŭvazie, što pakarańnie pavinna ŭździejničać nie tolki na abvinavačanaha, ale taksama i na hramadstva. A z boku hramadstva sapraŭdy jość takoje čakańnie [surovaha pakarańnia], — skazała advakatka žurnalistam.
Płanavałasia, što na pasiadžeńni 16 śniežnia buduć pramoŭlenyja i zaklučnyja pramovy, adnak sud zaciahnuŭsia praz dopyty ekśpiertaŭ. Nastupnaje pasiadžeńnie pryznačana na 13 studzienia 2025 hoda. Mahčyma, prysud abvieściać užo ŭ studzieni.
Ciapier čytajuć
Bližejšym časam buduć vyzvaleny bolš za 150 palitźniavolenych17
Kamientary