Eks-kiraŭniku Nahornaha Karabacha Baku vystaviŭ 45 abvinavačvańniaŭ. Jamu pahražaje pažyćciovaje
Prakuratura Azierbajdžana vystaviła eks-dziaržaŭnamu ministru Nahornaha Karabacha Rubienu Vardanianu, jaki ŭžo bolš za hod znachodzicca ŭ źniavoleńni ŭ bakinskaj turmie, novy abjomny pakiet abvinavačvańniaŭ pa 45 punktach. Jak paviedamlaje jaho advakackaja hrupa, pa hetych abvinavačvańniach Vardanianu pahražaje pažyćciovaje pazbaŭleńnie voli, piša Armianskaja słužba Radyjo Svaboda.
Pavodle zajavy abaroncaŭ, novyja abvinavačvańni na adras Vardaniana źviazanyja z 20 artykułami Kryminalnaha kodeksa Azierbajdžana.
Eks-čynoŭnik byŭ aryštavany azierbajdžanskimi pamiežnikami 27 vieraśnia 2023 hoda na prapusknym punkcie na moście Chakary paśla napadu Azierbajdžana na Nahorny Karabach i nastupnaj likvidacyi rehijonu.
Baku abvinavačvaje Vardaniana ŭ «finansavańni teraryzmu, stvareńni niezakonnych uzbrojenych farmiravańniaŭ i niezakonnym pierasiačeńni miažy Azierbajdžana».
U zajavie advakackaj hrupy Vardaniana adznačajecca, što mierkavanyja «dokazy» novych abvinavačvańniaŭ całkam schavanyja jak ad samoha Vardaniana, tak i ad hramadskaści pad padstavaj ich suviazi z «nacyjanalnaj biaśpiekaj Azierbajdžana».
Baku taksama admoviŭsia pieradać kopii «dokazaŭ» Vardanianu i jaho advakatam.
Mižnarodny jurydyčny daradca siamji Vardaniana Džared Hiensier niadaŭna ŭ intervju Azierbajdžanskaj słužbie «Radyjo Svaboda» zajaviŭ, što administracyja Alijeva paśladoŭna adchilaje jaho zapyty na naviedvańnie Vardaniana ŭ Baku.
«Admova Azierbajdžana apublikavać i dać dostup da ŭsich abvinavačvańniaŭ suprać Vardaniana i tak zvanych dokazaŭ paćviardžaje ich palityčnuju matyvacyju», — adznačyŭ jon.
Azierbajdžanskija ŭłady abvierhli hetyja zajavy, ale adnačasova adchilili zapyt advakataŭ na naviedvańnie turmy, što robić niemahčymym zbor dokazaŭ.
Stała viadoma pra aryšt minskaha chirurha z 17-hadovym stažam. Joj pahražaje ahromnisty termin za palityku5
Kamientary