«Bajsoł» pačaŭ rabić rassyłki danataram. U ludziej uźnikli pytańni da biaśpieki takich listoŭ
«Bajsoł» ź niadaŭniaha času robić rassyłku dla tych, chto raniej danaciŭ u fond. Z ulikam taho, što za danaty ciapier zavodziać kryminalnyja spravy, u mnohich uźnikła pytańnie — ci heta biaśpiečna? Ci prychodzić takaja rassyłka ludziam, jakija znachodziacca ŭnutry krainy? Jak ad jaje možna adpisacca? «Naša Niva» spytała ŭ kiraŭnika fondu Andreja Stryžaka.
Na rassyłku źviarnuli ŭvahu čytačy «Našaj Nivy». Publična temu ŭźniała taksama błohierka Saša Źvierava, jakaja raniej pracavała ŭ fondzie.
«Ja rabiła achviaravańni ŭ fond, ale paciešny fakt: ja nie davała zhodu na rassyłku. Ja nie tykała ni na jakija ptušački, ja prosta ździajśniała achviaravańnie ŭ strajp (płaciežnaja sistema. — NN). Heta značyć, moj email prosta vyhruzili adtul. A vy vypadkova ciapier nie parušyli jeŭrapiejskaje zakanadaŭstva?» — aburyłasia jana ŭ fejsbuku.
«Hałoŭnaje pytańnie. Kali vy robicie hetuju svaju rassyłku, jak vy razumiejecie, što čałaviek nie znachodzicca na terytoryi Respubliki Biełaruś? Jość niejkija prykmiety?» — zakranuła błohierka momant biaśpieki.
«Bajsoł» u kamientary «Našaj Nivie» zapeŭnivaje, što ažyciaŭlaje rassyłku pavodle adfiltravanaha śpisa adrasoŭ, ź jakoha vyklučany donary, jakija fizična na momant danatu znachodzilisia ŭ Biełarusi.
«Rassyłka idzie pa tych ludziach, jakija aktyŭna danaciać ci danacili praz «Bajsoł», jakija nie robiać i nie rabili heta ź Biełarusi, jakija danacili ŭ apošni čas. Niekalki filtraŭ i niekalki śpisaŭ rassyłki.
Rassyłka ažyćciaŭlajecca pa śpisie danataraŭ, jakija rabili danaty paśla pryznańnia našaj arhanizacyi «ekstremisckaj»,
heta značyć, što ludzi śviadoma praciahvali karystacca mahčymaściu akazvać dapamohu praz «Bajsoł», niahledziačy na patencyjny pieraśled z boku ŭład», — kaža Andrej Stryžak.
Jon adznačaje, što rabić rassyłku fond vyrašyŭ paśla kansultacyj ź jurystami.
«Jany padćvierdzili nam takuju mahčymaść, bo adrasy pošty my atrymlivajem praz płaciežnuju sistemu Stripe, kali čałaviek ažyćciaŭlaje płaciež. My ŭličvajem tyja pytańni, jakija atrymlivajem ad ludziej u suviazi z rassyłkaj i viadziom kansultacyi ź jurystami, kab udaskanalvać našuju pracu ŭ hetym kirunku», — raskazvaje Andrej Stryžak.
Jon taksama padziakavaŭ tym, chto danacić paciarpiełym i padtrymlivaje kamandu.
Ad rassyłki «Bajsoł» možna samastojna adpisacca.
U kancy kožnaha lista jość dyskłejmier. Možna nacisnuć na knopku «Unsubscribe from this list» i adpisacca.
Čytajcie taksama:
Ci biaśpiečna rabić achviaravańni praz Stripe?
Stali viadomyja minimalnyja sumy «kampiensacyi» za danaty ź nieajcišnikaŭ
Prakuratura naličyła 30 miljonaŭ rubloŭ škody ad dziejnaści Nexta
Niekatorym palitviaźniam da palityčnych artykułaŭ dadajuć kryminalnuju spravu za parnahrafiju
Kamientary