«Narodnaja Vola» na miesiac prypyniaje vychad i nie vyklučaje pahrozy poŭnaha zakryćcia
Kiraŭnictva adnoj z najstarejšych niezaležnych haziet Biełarusi «Narodnaja Vola» źviarnułasia da čytačoŭ i sponsaraŭ z prośbaj ab terminovaj dapamozie. U inšym vypadku vydańniu pahražaje poŭnaje spynieńnie dziejnaści paśla amal troch dziasiatkaŭ hadoŭ u avanhardzie ajčynnaj žurnalistyki, paviedamlaje BAŽ.
«Šanoŭnyja prychilniki svabodnaha słova! Na žal, abstaviny skłalisia takim čynam, što vydańnie haziety «Narodnaja Vola» ŭ PDF-farmacie stanovicca na miesiacovuju paŭzu. Takaja situacyja vyklikana nadzvyčaj ciažkim finansavym stanoviščam. Redakcyja nie maje mahčymaści pakryvać raschody pa arendzie pamiaškańnia, techničnym absłuhoŭvańni, vypłacie zarobkaŭ i padatkaŭ. My ŭ adnym kroku ad zakryćcia. Kab heta nie zdaryłasia, treba nabrać jak maha bolej padpisčykaŭ na PDF-viersiju», — kanstatuje redaktarat u śpiecyjalnym zvarocie da svaich prychilnikaŭ.
Takim čynam, papiaredni vypusk u elektronnym farmacie dajšoŭ da padpisčykaŭ u piatnicu 28 krasavika, ale płanavaha aŭtorkavaha ŭžo nie budzie. Jak nadoŭha zaciahniecca paŭza — zaležyć ad aktyŭnaści starych i novych čytačoŭ.
Padpisacca na PDF-viersiju haziety «Narodnaja Vola» možna na sajcie belpressa.by. Dla hetaha treba zajści na nazvany resurs, nacisnuć układku «2023» i vybrać miesiacy, na jakija budzie afarmlacca padpiska. Cana pytańnia simvaličnaja — 9 rubloŭ 48 kapiejek.
«Vy, našy siońniašnija čytačy, možacie hetamu aktyŭna paspryjać. Parajcie, kali łaska, siabram, sasłužyŭcam, susiedziam, svajakam, kab i jany taksama padpisalisia na PDF-viersiju haziety, — zaklikaje kiraŭnictva vydańnia. — Viadoma ž, adnačasova staić pytańnie i ab viartańni «Narodnaj Voli» ŭ drukarniu, ale heta ŭžo inšaja razmova. A pakul asobna źviartajemsia da tych, chto maje mahčymaść prajavić adrasnuju dabračynnaść».
Jość niekalki sposabaŭ pieraličyć hrašovyja srodki na redakcyjny rachunak (rekvizity ŭ ruskamoŭnym varyjancie).
1.Praz ARIP:
ŚMI — N (prosto bukva) — «Narodnaja Vola» — Dobrovolnyje vznosy.
2.Praz BANK:
IČUP «Narodnaja Vola». 220030 h.Minsk, uł.Enhielsa, 34a
r/s BY08 PJCB 3012 0065 3510 0000 0933,
Kod PJCBBY2X, CBU 113 «Priorbank» OAO, h.Minsk
UNP 100961759
Redakcyja haziety zahadzia vykazvaje ščyruju ŭdziačnaść usim nieabyjakavym biełarusam. Paźniejšaja losavyznačalnaja infarmacyja źjavicca na sajcie nv-online.info i na elektronnaj pošcie padpisčykaŭ.
Jašče ŭ 2020 hodzie «Narodnaja Vola» razam z šeraham inšych niedziaržaŭnych vydańniaŭ straciła mahčymaść vychodzić u papiarovym vyhladzie — za aśviatleńnie masavych akcyj pratestu Biełaruski dom druku admoviŭsia brać u pracu makiety, a «Biełpošta» vyklučyła hazietu sa svajho padpisnoha katałoha.
Niejki čas u jakaści alternatyvy vystupali rasijskija drukarni, ale 13 listapada 2020-ha ŭ ofis «Narodnaj Voli» pryjšli nieviadomyja biez dakumientaŭ i kanfiskavali ŭvieś nadrukavany nakład — 25 tysiač ekzemplaraŭ. Pad ciskam kantrolnych orhanaŭ ad supracoŭnictva admovilisia i ŭ Rasii.
Śledam skłałasia absurdnaja situacyja: Ekanamičny sud Minska prysudziŭ pradpryjemstvu «Biełpošta» kampiensacyju za toje, što vydańnie… nie dastaviła praduhledžanyja damovami nakłady na poštu i padpisčykam. Toj fakt, što «Narodnuju Volu» admovilisia drukavać paŭsiul u «sajuznaj dziaržavie», sud praihnaravaŭ. Vierdykt — vypłacić zajaŭniku zvyš 108 tysiač rubloŭ «materyjalnych pretenzij».
Tym časam redakcyja «Narodnaj Voli» praciahvała dastaŭlać padpisčykam pa elektronnaj pošcie PDF-viersii numaroŭ, paralelna pracavaŭ sajt. Adnak 18 žniŭnia 2022 hoda ŭłady zabłakavali staronku nv-online.info, da jaje nie było dostupu jak unutry krainy, tak i za miažoj.
Nastupnyja paŭhoda faktyčna adzinaj infarmacyjnaj placoŭkaj dla čytačoŭ haziety zastavaŭsia telehram-kanał t.me/nvonlineby i elektronnaja viersija haziety, PDF-fajły dvojčy na tydzień adpraŭlalisia kožnamu padpisčyku na elektronnuju poštu.
Tolki pry kancy śniežnia 2022 hoda źjaviŭsia zahad za podpisam ministra infarmacyi Uładzimira Piarcova, na padstavie jakoha internet-resursu było aficyjna dazvolena viarnucca ŭ miedyjnaje pole. Sajt paŭnavartasna zapracavaŭ sioleta 9 studzienia.
«Narodnaja Vola» — niezaležnaja biełaruskaja hramadska-palityčnaja hazieta, zasnavanaja ŭ 1995 hodzie Iosifam Siaredzičam paśla taho, jak ukazam Alaksandra Łukašenki jon byŭ adchileny ad kiravańnia parłamienckaj «Narodnaj hazietaj», zasnavalnikam jakoj byŭ Viarchoŭny saviet.
Na praciahu nastupnaj bolš čym čverci stahodździa hazieta pašyrała koła addanych čytačoŭ, samastojna vyrašajučy ekanamičnyja pytańni. Ale ciapierašniaja situacyja, bieź pierabolšańnia krytyčnaja, na kanu — dalejšaje isnavańnie vydańnia.
Čytać taksama:
«This f*cking AI». Pierakładčyk Łukašenki pry prezidencie AAE vykarystaŭ niedypłamatyčnaje słova5
Kamientary